ແຂວງອຸດົມໄຊ ຫາລືກ່ຽວກັບການກຳນົດອັດຕາຄ່າເວນຄືນ ໃຫ້ປະຊາຊົນທີ່ຖືກໂຄງການເສັ້ນທາງລົດໄຟ ລາວ-ຈີນ

     ກອງປະຊຸມປຶກສາຫາລືກ່ຽວກັບອັດຕາຄ່າເວນຄືນ ຫຼື ທົດແທ່ນຄືນ ໃຫ້ແກ່ບັນດາປະຊາຊົນທີ່ຖືກໂຄງການເສັ້ນທາງລົດໄຟ ລາວ-ຈີນ ໃນໄລຍະຜ່ານແຂວງອຸດົມໄຊ ໄດ້ຈັດຂຶ້ນໃນຕອນເຊົ້າວັນທີ 05 ມັງກອນ 2017 ຢູ່ທີ່ຫ້ອງປະຊຸມພະແນກໂຍທາທິການ ແລະຂົນສົ່ງແຂວງ ໂດຍການເປັນປະທານຂອງທ່ານ ສົມແກ້ວ ມະນີວັນ ຫົວໜ້າພະແນກຊັບພະຍາກອນທຳມະຊາດ ແລະສິ່ງແວດລ້ອມແຂວງ ມີບັນດາພະແນກການ ຄະນະຮັບຜິດຊອບວຽກງານໄກ່ເກ່ຍ ສິ່ງກີດຂວາງສະຖານີ ແລະ ແລວທາງລົດໄຟ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

     ການດໍາເນີນກອງປະຊຸມໃນຄັ້ງນີ້ ບັນດາຜູ້ເຂົ້າຮ່ວມແມ່ນໄດ້ຮັບຟັງກ່ຽວກັບຜົນກະທົບຕໍ່ກັບສະພາບແວດລ້ອມ ແລະ ສັງຄົມ ຄວາມເສຍຫາຍຂອງທີ່ດິນ ແລະ ຊັບສິນຂອງພໍ່ແມ່ປະຊາຊົນທີ່ຖືກໂຄງການກໍ່ສ້າງເສັ້ນທາງລົດໄຟ ໄລຍະທີ່ຜ່ານແຂວງອຸດົມໄຊ ໂຮມທັງລະບຽບຫຼັກການ ກົດໝາຍ ແລະ ຄວາມເໝາະສົມຂອງອັດຕາຄ່າທົດແທນຄືນໃຫ້ແກ່ປະຊາຊົນ ເພື່ອເປັນແນວທາງໃນການປຶກສາຫາລື ແລະ ປະກອບຄຳເຫັນໃສ່ຫົວຂໍ້ບັນຫາດັ່ງກ່າວ ໃຫ້ມີຄວາມເປັນເອກະພາບ ແລະ ເໝາະສົມ ໃນການທີ່ຈະລົງໄປຈັດຕັ້ງປະຕິບັດໂຕຈິງໃນຂັ້ນຕອນຕໍ່ໄປ ໃຫ້ໄດ້ຮັບໝາກຜົນ ແລະ ຫຼີກເວັ້ນບັນຫາທີ່ຈະເກີດຂຶ້ນຕາມມາ ເຊິ່ງເສັ້ນທາງລົດໄຟ ລາວ-ຈີນ ດັ່ງກ່າວແມ່ນມີຄວາມຍາວທັງໝົດ 427 ກ.ມ ໃນນັ້ນ ໄລຍະຜ່ານແຂວງອຸດົມໄຊ ແມ່ນມີຄວາມຍາວ 126.6 ກ.ມ ຕັ້ງແຕ່ຊາຍແດນເມືອງນາໝໍ້ ແຂວງອຸດົມໄຊ ກັບ ນາເຕີຍ ແຂວງຫຼວງນ້ຳທາ ຫາ ບ້ານລາດຫານ ເມືອງງາ ກວມເອົາ 3 ເມືອງຄື ເມືອງນາໝໍ້ ເມືອງໄຊ ແລະ ເມືອງງາ ທີ່ປະກອບມີ 3 ສະຖານີຫຼັກ ເຊິ່ງມີປະຊາຊົນໄດ້ຮັບຜົນກະທົບຈາກໂຄງການໃນຄັ້ງນີ້ຈໍານວນທັງໝົດ 41 ບ້ານ 953 ຄອບຄົວ ທີ່ຈະໄດ້ຮັບການທົດແທນ ຊົດເຊີຍ ແລະ ເວນຄືນ ເຊິ່ງເປົ້າໝາຍຫຼັກຂອງການປຶກສາຫາລືກັນກ່ຽວກັບອັດຕາຄ່າທົດແທນຄືນໃຫ້ແກ່ປະຊາຊົນໃນຄັ້ງນີ້ ກໍເພື່ອກຳນົດອັດຕາຄ່າທົດແທນຄືນໃຫ້ລະອຽດ ເໝາະສົມຕາມທີ່ດິນ ຊັບສິນ ແລະ ອື່ນໆ ຂອງປະຊາຊົນທີ່ໄດ້ຮັບຄວາມເສຍຫາຍ ໂດຍອີງໃສ່ບັນດານິຕິກຳ ແລະ ລະບຽບກົດໝາຍທີ່ໄດ້ກຳນົດໄວ້ ຫຼີກເວັ້ນຫາງສຽງຂອງປະຊາຊົນຕໍ່ການໄກ່ເກ່ຍບັນຫາສິ່ງກີດຂວາງຕ່າງໆ ເພື່ອເຮັດໃຫ້ການກໍ່ສ້າງດັ່ງກ່າວດຳເນີນໄປຢ່າງສະດວກສະບາຍ ໄປຕາມແຜນການ ແລະ ໄລຍະເວລາທີ່ໄດ້ກຳນົດໄວ້ ນອກນັ້ນ ຍັງເປັນການຫາລືກ່ຽວກັບການຮັບມືຕໍ່ກັບບັນດາຜົນກະທົບທີ່ຈະຕາມມາຈາກການກໍ່ສ້າງເສັ້ນທາງລົດໄຟ ລາວ-ຈີນ ໃນຄັ້ງນີ້ ຕື່ມອີກ ເປັນຕົ້ນແມ່ນ ບັນຫາສະພາບແວດລ້ອມ ສັດນ້ຳ ສັດປ່າ ການສັນຈອນ ສຸຂະພາບ ສິ່ງເສດເຫຼືອ ແລະ ອື່ນໆ.

ຂ່າວ/ພາບ: ຄານມະນີ ຮຽນດໍຈັນ