ພັດທະນານະຄອນຫຼວງ ຕາມທິດເປັນເມືອງໜ້າຢູ່ 6ສ ຂະຫຍາຍຕົວສົມສ່ວນ-ຍືນຍົງ

ນະຄອນຫຼວງ​ວຽງ​ຈັນ (ນວ) ຮ່ວມ​ກັບ​ກະຊວງ​ໂຍທາ​ທິ​ການ ແລະ ຂົນສົ່ງ (​ຍທຂ) ຈັດ​ສຳ​ມະນາ​ກ່ຽວ​ກັບ​ການ​ຈັດ​ສັນ​ຄວາມ​ບໍ່ເປັນ​ລະບຽບ​ຮຽບ​ຮ້ອຍ​ໃນ​ຕົວເມືອງ ນວ ໃນ​ໂອກາດ​ການ​ສະເຫຼີມ​ສະຫຼອງ​ວັນ​ສັບປະດາ​ເຄຫາສະຖານ​ໂລກ ຄົບຮອບ 32 ປີ ຂຶ້ນ ວັນ​ທີ 10 ຕຸລາ 2017 ຢູ່​ຫ້ອງ​ວ່າການ ນວ ໂດຍ​ເປັນ​ປະທານ​ຂອງທ່ານ ແກ້ວ​ພິລາ​ວັນ ອາ​ໄພ​ລາດ ຮອງ​ເຈົ້າ​ຄອງ ນວ ແລະ ທ່ານນາງ ວິໄລ​ຄຳ ໂພ​ສາ​ລາດ ຮອງລັດຖະມົນຕີ​ກະຊວງ ​ຍທຂ ມີ​ບັນດາ​ຮອງ​ເຈົ້າແຂວງ ຮອງ​ລັດ​ຖະມົນຕີ ແລະ ພາກສ່ວນ​ກ່ຽວຂ້ອງ ເຂົ້າ​ຮ່ວມ.

ທ່ານ​ຮອງ​ເຈົ້າ​ຄອງ ກ່າວ​ວ່າ: ປັດຈຸບັນ​ໂລກ​ກຳລັງ​ໄດ້​ຮັບ​ການພັດທະນາ ແລະ ຂະຫຍາຍຕົວຢ່າງ​ບໍ່​ຢຸດ​ຢັ້ງ ປະຊາກອນ​ໃນ​ໂລກເກືອບ 2/3 ໄດ້​ມາ​ອາໄສ​ຢູ່​ຕົວເມືອງ ແລະ ມີ​ທ່ຽງ​ອ່ຽງ​ນັບ​ມື້ຫຼາຍ​ຂຶ້ນ ໃນ​ນີ້ 60% ແມ່ນ​ມີ​ອາຍຸ​ຕ່ຳ​ກວ່າ 18 ປີ​ທີ່​ເຂົ້າ​ມາ​ຊອກວຽກ​ເຮັດ​ງານ​ທຳ ສຶກ​ສາ ແລະ ປະກອບ​ອາຊີບ​ອື່ນໆ ເຊິ່ງ​ໄດ້​ສົ່ງຜົນ​ດ້ານ​ຕັ້ງໜ້າ ແລະ ຫຍໍ້ທໍ້​ດ້ານເສດຖະກິດ-ສັງຄົມ ສິ່ງ​ແວດລ້ອມ ຂາດ​ທີ່ຢູ່​ອາໄສ ການ​ພັດທະ​ນາ​ບໍ່​ສົມ​ຄູ່​ກັບ​ຄວາມ​ຕ້ອງການ ແລະ ອື່ນໆ ໂດຍ​ເຫັນ​ໄດ້ຄວາມ​ສຳຄັນ​ດັ່ງກ່າວ ລັດ​ຖະບານ​ລາວ ເວົ້າ​ສະເພາະ ນວ ຈຶ່ງໄດ້​ວາງ​ຍຸດ​ທະ​ສາດ​ເພື່ອ​ການ​ພັດທະ​ນາ ນວ ໄລຍະ​ສັ້ນ ແຕ່​ປີ 2015-2020 ໄລຍະ​ກາງ 2020-2025 ແລະ ໄລຍະ​ຍາວ 2025-2030 ໂດຍ​ການ​ເອົາໃຈໃສ່​ປັບປຸງ​ຜັງເມືອງ ເພື່ອ​ສະໜັບສະ​ໜູນ​ການ​ພັດທະນາ​ເສດ​ຖະກິດ-ສັງຄົມ ຍົກ​ລະດັບ​ຊີວິດການ​ເປັນ​ຢູ່​ຂອງ​ປະຊາຊົນ​ໃຫ້​ນັບມື້​ດີ​ຂຶ້ນ ແລະ ຫຼຸດຜ່ອນ​ຄວາມທຸກ​ຍາກ ເອົາໃຈໃສ່​ວາງ​ແຜນພັດທະນາ​ກໍ່ສ້າງ​ໂຄງ​ລ່າງ​ພື້ນຖານ​ໃຫ້​ທົ່ວ​ເຖິງ ພ້ອມ​ທັງ​ວາງເປົ້າ​ໝາຍ​ສູ້​ຊົນ​ໃຫ້ ນວ ກາຍເປັນ​ນະຄອນ​ທີ່​ມີ​ຄວາມ​ສີວິໄລເປັນ​ຕົວ​ເມືອງ ສີຂຽວ ສວຍ​ງາມ ມີ​ຄວາມ​ສະຫງົບໜ້າ​ຢູ່ ແລະ ຍືນ​ຍົງ.

ເພື່ອ​ຜັນ​ຂະຫຍາຍ​ມະຕິ​ກອງປະຊຸມ​ໃຫຍ່ ຄັ້ງ​ທີ VI ຂອງ​ອົງຄະນະ​ພັກ ນວ ໄດ້​ກຳນົດ​ຍຸດ​ທະສາດ​ການ​ພັດທະນາ ນວ ຕາມທິດ​ເປັນ​ເມືອງ​ໜ້າ​ຢູ່ (6ສ) ຂະຫຍາຍ​ຕົວ​ສົມສ່ວນ ແລະ ຍືນ​ຍົງ ໂດຍ​ຢຶດ​ຖື​ການ​ພັດທະນາ​ຕາມແຜນຜັງ​ກວມ​ລວມ ແຕ່​ລະ​ຕົວເມືອງ ສະເພາະ​ເຂດຖະໜົນ ຍົກລະດັບ​ພື້ນຖານ​ໂຄງ​ລ່າງ​ເຂດ​ຕົວເມືອງເກົ່າ​ໃຫ້​ເໝາະ​ສົມ ແລະ ກາຍເປັນ​ເມືອງ​ທ່ອງ​ທ່ຽວ ເຂດບໍລິການ ສ້າງ​ເຂດ​ຊານເມືອງ​ໃຫ້ເປັນ​ເມືອງ​ນ້ອຍ​ທີ່​ມີ​ສະພາບ​ແວດລ້ອມ​ທຳ​ມະ​ຊາດ​ດີ ເຊິ່ງ​ຂະແໜງ ​ຍທຂ ທີ່​ເປັນ​ຂະແໜງ​ຫຼັກ​ ຈະ​ຕ້ອງໄດ້​ເອົາໃຈໃສ່​ຈັດ​ສັນ​ແຜນຜັງ​ລະອຽດ​ໃຫ້​ຄົບ​ຊຸດ ຮັບປະກັນ​ໃຫ້ການ​ພັດທະນາ​ຕາມ​ແຜນຜັງ​ຊີ້ນຳ​ລວມ ສືບຕໍ່​ພັດທະນາ​ລະບົບພື້ນຖານ​ໂຄງ​ລ່າງ ບໍລິຫານ​ຕົວເມືອງ ແລະ ລະບົບ​ສຸຂາພິບານໃຫ້​ຄົບ​ຊຸດ ສ້າງ​ຕົວ​ເມືອງ​ໃຫ້​ມີຫຼາຍ​ສີສັນ ໂດຍ​ການ​ປົກ​ປັກ​ຮັກສາບູລະນະ​ຕົວ​ເມືອງເກົ່າ ປະສານ​ກົມ​ກືນ​ກັບ​ການ​ກໍ່ສ້າງ​ພື້ນຖານ​ໂຄງ​ລ່າງ​ໃໝ່ ສືບຕໍ່​ປັບປຸງ ແລະ ຍົກ​ລະດັບ​ຄວາມ​ສາມາດຂອງ​ການຈັດຕັ້ງ ແລະ ເຄື່ອງມືທາງ​ດ້ານ​ນິຕິ​ກຳ​ໃນ​ການ​ຄຸ້ມ​ຄອງຕົວ​ເມືອງ​ໃຫ້​ຄົບ​ຊຸດ ເພື່ອ​ຮັບ​ປະກັນ​ການ​ຄຸ້ມ​ຄອງ ແລະ ບໍລິການຕົວ​ເມືອງ​ໃຫ້​ມີ​ປະສິດທິພາບ. (ຂ່າວຫນັງສືພິມວຽງຈັນໃຫ່ມ)