ເຈົ້າໜ້າທີ່ຮູ້ເປົ້າໝາຍ ກຸ່ມກໍ່ເຫດຄາດຕະກຳນັກທຸລະກິດຈີນແລ້ວ

ເຫດການ​ຄາດ​ຕະ​ກຳ ທ້າວ ຊູ​ຫວ່າງ​ທຽນ ອາຍຸ 60 ປີ ອາຊີບນັກທຸລະກິດ (ປະທານ​ສູນ​ການ​ຄ້າ​ສີ​ໄຄ​ພຣາ​ຊາ) ເຊື້ອ​ຊາດສັນຊາດ​ຈີນ​ໄຕ້​ຫວັນ ໃນ​ວັນ​ທີ 07 ຕຸລາ 2017 ຢູ່​ສູນ​ການ​ຄ້າ​ສີ​ໄຄພຣາ​ຊາ ເມືອງ​ສີ​ໂຄດ​ຕະບອງ ນະຄອນຫຼວງ​ວຽງ​ຈັນ ເຊິ່ງ​ສາເຫດຈູງ​ໃຈ​ທີ່​ພາໃຫ້​ເກີດ​ການ​ຄາດ​ຕະ​ກຳ​ນັ້ນ ເບື້ອງ​ຕົ້ນ​ອາດ​ເກີດ​ມາ​ຈາກການ​ຄັດ​ແຍ່ງ​ທາງ​ດ້ານ​ທຸລະ​ກິດ.

ທ່ານ​ພັນ​ໂທ ຈັນ​ຫອມ ແກ້ວ​ສຸລະ​ໄຊ ຫົວໜ້າ​ຫ້ອງ​ຕຳຫຼວດ​ກອງບັນຊາ​ການ ​ປກສ ນະຄອນຫຼວງ​ວຽງ​ຈັນ ໄດ້​ລາຍ​ງານ​ໃຫ້​ຊາບ​ວ່າ: ພາຍຫຼັງ​ເກີດ​ເຫດການ​ດັ່ງກ່າວ ການ​ນຳ​ຂອງ​ກະຊວງ​ປ້ອງ​ກັນຄວາມ​ສະຫງົບ ໄດ້​ຊີ້​ນຳ​ແຕ່ງຕັ້ງ​ມອບ​ໝາຍ​ໃຫ້​ກົມ​ວິຊາ​ສະເພາະ ແລະ ກອງ​ບັນຊາ​ການ ​ປກສ ນະຄອນຫຼວງ​ວຽງ​ຈັນ ຮີບ​ຮ້ອນ​ດຳເນີນ​ການ​ສືບສວນ-ສອບ​ສວນຊອກ​ຄົ້ນ​ຫາ​ຜູ້​ກະທຳ​ຜິດ​ຕາມ​ຫຼັກການ​ວິຊາ​ສະເພາະ ເພື່ອ​ນຳ​ເອົາ​ຕົວ​ຜູ້​ກະທຳ​ຜິດ​ມາ​ດຳເນີນ​ຄະດີຕາມ​ຂັ້ນ​ຕອນ​ຂອງ​ກົດໝາຍ​ໂດຍ​ໄວ.
ຜ່ານ​ການເຄື່ອນໄຫວ​ເຮັດ​ວຽກ​ງານ​ສືບສວນ-ສອບ​ສວນ ແລະ ຊອກ​ຄົ້ນ​ຫາ​ຢ່າງ​ຕັ້ງໜ້າ​ຂອງ​ເຈົ້າ​ໜ້າທີ່​ຕຳຫຼວດ ແລະ ການ​ຮ່ວມ​ມືຂອງ​ປະຊາຊົນ ຕະຫຼອດ​ຮອດ​ອຳນາດ​ການ​ປົກຄອງ​ບ້ານ​ທຸກ​ພາກສ່ວນ​ ໄດ້​ສຸມ​ໃສ່​ເຮັດວຽກ​ງານ​ຊອກ​ຄົ້ນ​ຫາ​ຜູ້​ກະທຳຜິດ ​ຕົກ​ມາ​ຮອດ​ຕອນ​ເຊົ້າວັນ​ທີ 8 ຕຸລາ 2017 ເຈົ້າ​ໜ້າທີ່​ພວກ​ເຮົາຈຶ່ງ​ໄດ້​ພົບ​ເຫັນ​ລົດຈັກ​ຂອງ​ເປົ້າໝາຍ ​ທີ່​ນຳ​ໃຊ້​ເຂົ້າ​ໃນ​ການ​ກໍ່​ເຫດກະທຳ​ຜິດ​ ຈອດ​ຊຸກເຊື່ອງ​ໄວ້​ໃນປ່າເຂດ​ບ້ານ​ສີ​ຊົມຊື່ນ ເມືອງ​ສີໂຄດ​ຕະບອງ ນະຄອນຫຼວງ​ວຽງຈັນ.

ຜ່ານ​ການ​ລົງ​ກວດກາ​ສະຖານທີ່​ຊຸກເຊື່ອງ​ຂອງ​ຄົນ​ຮ້າຍ ເຈົ້າໜ້າທີ່​ໄດ້​ພົບ​ເຫັນ​ວັດຖຸ​ສິ່ງ​ຂອງຈຳນວນ​ໜຶ່ງ​ທີ່​ເປັນ​ຫຼັກ​ຖານ​ສຳຄັນ ທີ່​ສາມາດ​ຢັ້ງຢືນ​ເຖິງ​ເຫດການ​ຄາດ​ຕະ​ກຳ​ໃນ​ຄັ້ງ​ນີ້ ຈາກນັ້ນ ເຈົ້າ​ໜ້າທີ່​ກໍ່​ໄດ້​ສືບຕໍ່​ເຮັດວຽກ​ງານສືບສວນ-ສອບ​ສວນ ແລະ ວຽກ​ງານ​ສືບ​ຄົ້ນ​ຫາ​ ຈຶ່ງ​ສາມາດ​ກຳນົດ​ເປົ້າ​ໝາຍ​ກໍ່​ເຫດ​ຄາດ​ຕະ​ກຳ​ຄັ້ງ​ນີ້​ໄດ້​ຢ່າງ​ຊັດ​ເຈນ​ແລ້ວ ໄດ້​ສືບຕໍ່​ເກັບ​ກຳ​ຂໍ້​ມູນ​ກວດກາເປົ້າ​ໝາຍ​ຕົວ​ຈິງ ​ຈຶ່ງ​ຮູ້​ວ່າເປົ້າໝາຍ​ໄດ້​ເອົາ​ຕົວ​ລົບ​ໜີ​ໄປ​ຕ່າງ​ປະເທດພາຍຫຼັງ​ທີ່​ກໍ່​ເຫດ​ສຳເລັດ ເຊິ່ງ​ເຈົ້າ​ໜ້າທີ່​ໄດ້​ປະສານ​ສົມທົບກັບ​ເຈົ້າ​ໜ້າທີ່​ປະເທດ​ໃກ້​ຄຽງ ແລະ ຕຳຫຼວດ​ສາກົນ (INTERPOL) ເພື່ອ​ນຳ​ຈັບ​ຕົວເປົ້າ​ໝາຍ​ມາ​ດຳເນີນ​ຄະດີ​ຕາມຂັ້ນ​ຕອນ​ຂອງ​ກົດໝາຍ ​ສປປ ລາວ.

ສັງ​ລວມ​ແລ້ວ​ເຫດການ​ຄາດຕະ​ກຳ​ຄັ້ງ​ນີ້ ຜູ້​ກະທຳ​ຜິດ​ໄດ້​ມີການ​ກະກຽມ ແລະ ມີ​ການ​ວາງແຜນການ​ມາ​ຢ່າງ​ລະອຽດພໍ​ສົມຄວນ ເຊິ່ງ​ສະແດງ​ອອກວັນ​ທີ 5 ຕຸລາ 2017 ເປົ້າ​ໝາຍ​ແມ່ນ​ໄດ້ໄປ​ຊື້​ລົດຈັກ​ຢູ່​ບໍລິສັດ​ຂາຍ​ລົດຈັກແຫ່ງ​ໜຶ່ງ ໃນ​ນະຄອນຫຼວງ​ວຽງຈັນ ເພື່ອ​ມາ​ຮັບ​ໃຊ້​ໃນ​ການ​ກໍ່ເຫດ​ຄາດ​ຕະ​ກຳ ໂດຍ​ສະເພາະ ຕົກ​ມາ​ຮອດ​ວັນ​ທີ 7 ຕຸລາ 2017 ເປົ້າ​ໝາຍ​ຈຶ່ງ​ໄດ້​ນຳ​ໃຊ້​ລົດຈັກ​ຄັນດັ່ງກ່າວ​ໄປ​ກໍ່​ເຫດ​ຄາດ​ຕະ​ກຳ ສະນັ້ນ ສາເຫດ​ຈູງ​ໃຈ​ທີ່​ພາໃຫ້​ເກີດການ​ຄາດ​ຕະ​ກຳ​ຄັ້ງ​ນີ້ ເບື້ອງ​ຕົ້ນອາດ​ເກີດ​ມາ​ຈາກ​ການ​ຄັດ​ແຍ່ງທາງ​ດ້ານ​ທຸລະ​ກິດ. (ຂ່າວຫນັງສືພິມວຽງຈັນໃຫ່ມ)