ພັດທະນາຊັບພະຍາກອນມະນຸດ ໃຫ້ໄດ້ຕາມຄວາມຕ້ອງການ
ກອງປະຊຸມຄັ້ງທີ V ຄະນະກຳມາທິການແຫ່ງຊາດ ເພື່ອການພັດທະນາຊັບພະຍາກອນມະນຸດ (ຄຊພຊ) ຈັດຂຶ້ນວັນທີ 27 ທັນວາ 2016 ທີໂຮງແຮມລ້ານຊ້າງ ເປັນປະທານຂອງທ່ານນາງ ແສງເດືອນ ຫຼ້າຈັນທະບູນ ລັດຖະມົນຕີກະຊວງສຶກສາທິການ ແລະ ກີລາ ປະທານກຳມາທິການແຫ່ງຊາດ ເພື່ອພັດທະນາຊັບພະຍາກອນມະນຸດ.
ທ່ານນາງ ແສງເດືອນ ຫຼ້າຈັນທະບູນ ກ່າວວ່າ: ເພື່ອເປັນການຄົ້ນຄວ້າກ່ຽວກັບການຜັນຂະຫຍາຍ ແລະ ປະຕິບັດຍຸດທະສາດການພັດທະນາຊັບພະຍາກອນມະນຸດແຫ່ງຊາດ ຮອດປີ 2015 ໂດຍສະເພາະແມ່ນແຜນປະຕິບັດງານຊັບພະຍາກອນມະນຸດໄລຍະ 5 ປີ (2016-2020) ແລະ ແຜນແຕ່ລະປີໃຫ້ລະອຽດຊັດເຈນ ສາມາດປະຕິບັດໄດ້ ເຊິ່ງແຜນການດັ່ງກ່າວ ຕ້ອງໄດ້ອີງໃສ່ສະພາບບັນຫານິຕິກຳທີ່ມີແລ້ວ ຕ້ອງກວມເອົາທຸກຂະແໜງການ ພ້ອມທັງກຳນົດວ່າແຕ່ລະຂະແໜງການຕ້ອງມີພະນັກງານວິຊາການດ້ານໃດ ລະດັບໃດ ຈຳນວນເທົ່າໃດ ແລະ ຕ້ອງເລີ່ມສ້າງແຕ່ດຽວນີ້ຮອດ 2-5 ປີຕໍ່ໜ້າ ຕ້ອງໃຫ້ໄດ້ພະນັກງານທີ່ຕ້ອງການຕາມແຜນທີ່ວາງໄວ້.
ນອກຈາກນີ້ ກອງປະຊຸມຍັງຮັບຟັງການສະເໜີຄວາມຄືບໜ້າ ການປັບປຸງໂຄງສ້າງດ້ານບຸກຄະລາກອນກ່ຽວກັບ ຄຊພຊ ແລະ ຄະນະປະສານງານຊຸດໃໝ່ ປຶກສາຫາລືກ່ຽວກັບການແຕ່ງຕັ້ງຄະນະປະສານງານວຽກງານ ການພັດທະນາຊັບພະຍາກອນມະນຸດຂັ້ນນະຄອນຫຼວງ ຂັ້ນແຂວງ ຍຸດທະສາດການພັດທະນາຊັບພະຍາກອນມະນຸດແຫ່ງຊາດ ຮອດປີ 2025 ຄວາມຄືບໜ້າຂອງການກະກຽມການຈັດຕັ້ງປະຕິບັດຍຸດທະສາດ ແລະ ແຜນໃນຕໍ່ໜ້າ ບົດສະເໜີກ່ຽວກັບການສ້າງບຸກຄະລາກອນຜ່ານມາ ທັງພາຍໃນ ແລະ ຕ່າງປະເທດຂອງວຽກງານຊັ້ນສູງ ອາຊີວະສຶກສາ ແລະ ອື່ນໆ.(ຫນັງສືພິມວຽງຈັນໃຫ່ມ)
ພັດທະນາຊັບພະຍາກອນມະນຸດ ໃຫ້ໄດ້ຕາມຄວາມຕ້ອງການ
![]()
Reviewed by makarow
on
12:37:00 AM
Rating:
