ການປະເມີນຄວາມສ່ຽງລະດັບຊາດ ໃນການຕ້ານການຟອກເງິນ

ລະຫວ່າງ​ວັນ​ທີ 9-10 ມັງກອນ 2017 ສຳນັກງານ​ຂໍ້​ມູນ​ຕ້ານການ​ຟອກ​ເງິນ ທະນາຄານ​ແຫ່ງ ​ສປປ ລາວ ຮ່ວມ​ກັບ​ທະນາຄານໂລກ ຈັດ​ກອງ​ປະຊຸມ​ເຜີຍແຜ່ຄວາມ​ຮູ້​ພື້ນຖານ​ກ່ຽວ​ກັບ​ການປະ​ເມີນ​ຄວາມ​ສ່ຽງ​ລະດັບ​ຊາດ ໃນ​ການ​ຕ້ານ​ການ​ຟອກ​ເງິນ ແລະ ສະໜອງ​ທຶນ​ໃຫ້​ແກ່​ການ​ກໍ່ການ​ຮ້າຍ​ທີ່​ໂຮງແຮມ​ເມີ​ກຽວ ນະຄອນ​ຫຼວງ​ວຽງ​ຈັນ ເປັນ​ປະທານຮ່ວມ​ຂອງ​ທ່ານ​ນາງ ວັດທະນາ ດາລາ​ລອຍ ຮອງ​ຜູ້​ວ່າການ​ທະນາ​ຄານ ແຫ່ງ ​ສປປ ລາວ ຄະນະ​ກຳມາ​ທິ​ການ​ແຫ່ງ​ຊາດ ​ເພື່ອຕ້ານ​ການ​ຟອກ​ເງິນ ແລະ ສະໜອງ​ທຶນ​ໃຫ້ການ​ກໍ່​ການ​ຮ້າຍ ແລະ ທ່ານ ອິຟ​ເກ​ນີ ນາ​ໂດຟ ຮັກສາ​ການ​ຫົວໜ້າ​ຫ້ອງການ​ທະນາ​ຄານ​ໂລກ ປະຈຳ ​ສປປ ລາວ ມີ​ຊ່ຽວຊານຂະແໜງການ​ເງິນ-ເງິນຕາ ພະນັກງານ​ວິຊາ​ການທີ່​ກ່ຽວຂ້ອງ​ເຂົ້າ​ຮ່ວມ.
ການ​ປະ​ເມີນ​ຄວາມ​ສ່ຽງ​ລະດັບ​ຊາດ​ຕ້ານ​ການ​ຟອກ​ເງິນ ແລະ ການ​ສະໜອງ​ທຶນ​ໃຫ້​ແກ່ການ​ກໍ່​ການ​ຮ້າຍ​ ເປັນ​ການຈັດຕັ້ງປະຕິບັດ​ຕາມ​ຂໍ້​ແນະນຳ​ທີ 1 ການປະ​ເມີນ​ຄວາມ​ສ່ຽງ ແລະ ຂະບວນ​ການ​ບໍລິຫານ​ຄວາມ​ສ່ຽງຂອງ 40 ຂໍ້​ແນະນຳ​ໃໝ່​ຂອງ​ອົງການ​ຕ້ານ​ການ​ຟອກ​ເງິນ​ສາກົນ ໃຫ້​ໄດ້​ມາດຕະຖານ​ສາກົນ ເຊິ່ງບັນດາ​ປະເທດ​ທີ່​ເປັນ​ສະມາຊິກຂອງ​ອົງການ​ຕ້ານ​ການ​ຟອກ​ເງິນສາກົນ ຫຼື ບັນ​ປະເທດ​ທີ່​ເປັນ​ສະມາ​ຊິກ​ຂອງ​ອົງການ​ຍ່ອຍ ໂດຍສະເພາະແມ່ນ​ອົງການ​ຕ້ານການ​ຟອກ​ເງິນ​ໃນ​ເຂດ​ອາຊີ​ປາ​ຊີຟິກ​ ຈະ​ຕ້ອງ​ມີ​ການຈັດຕັ້ງ​ປະຕິບັດກ່ອນ​ມີ​ການ​ປະ​ເມີນ​ຜົນ ເຊິ່ງລາວ​ໄດ້​ກະກຽມ​ໃນ​ການ​ປະ​ເມີນຜົນ​ກ່ຽວ​ກັບ​ວຽກ​ງານ​ຕ້ານ​ການຟອກ​ເງິນ ແລະ ສະໜອງ​ທຶນ​ໃຫ້ແກ່​ການ​ກໍ່​ການ​ຮ້າຍ ຮອບ​ທີ 2 ໃນ​ສົກ​ປີ 2020-2021.
ນອກຈາກ​ນີ້ ກອງ​ປະຊຸມ​ຍັງໄດ້​ຮັບ​ຟັງ​ການ​ສະເໜີ​ຂັ້ນ​ຕອນການ​ດຳເນີນ​ການ ແລະ ຈຸດ​ປະສົງ​ຂອງ​ທະນາຄານ​ໂລກ​ ກ່ຽວກັບ​ກົນ​ໄກ​ປະ​ເມີນ​ຄວາມ​ສ່ຽງ ປຶກສາ​ຫາລື​ກົນ​ໄກ​ປະ​ເມີນ​ຄວາມສ່ຽງ​ໃນ​ຂັ້ນ​ຕອນ​ການ​ປະຕິບັດ ສົນທະນາ​ບັນຫາ​ທີ່​ຍັງ​ຄົງ​ຄ້າງ ກ່ຽວ​ກັບ​ຂັ້ນ​ຕອນ​ການ​ປະ​ເມີນຄວາມ​ສ່ຽງ ທ່າ​ອ່ຽງ ແລະ ຄວາມ​ອາດ​ສາມາດ​ໃນ​ການ​ຕໍ່ຕ້ານ​ກັບ​ບັນຫາ​ທີ່​ເກີດ​ຂຶ້ນ.
(ຫນັງສືພິມວຽງຈັນໃຫ່ມ)