ລາວ-ຝຣັ່ງ ຮ່ວມກັນສ້າງຄວາມເຂັ້ມແຂງດ້ານເສດຖະກິດ

ກອງ​ປະຊຸມ​ກ່ຽວ​ກັບ​ວຽກ​ງານເສດຖະກິດ​ຝຣັ່ງ​ໂກ​ໂຟ​ນີ ​ເປັນ​ກອງປະຊຸມ​ທີ່​ສຳຄັນ​ຂອງ​ປະຊາຊົນລາວ ເຊິ່ງ​ເປັນ​ບາດກ້າວ​ຂອງການ​ຮ່ວມ​ມື​ທາງ​ດ້ານ​ເສດຖະກິດຂອງ​ລາວ ແລະ ບັນດາ​ປະເທດທີ່​ໃຊ້​ພາສາ​ຝຣັ່ງ ແລະ ມີ​ຫຼາຍໂຄງການ​ທີ່​ກ່ຽວຂ້ອງ​ກັບ​ເສດ​ຖະກິດ ສິ່ງ​ເຫຼົ່າ​ນີ້​ເປັນຄວາມ​ຕ້ອງການ​ຂອງ​ປະເທດ​ລາວ ​ເພື່ອ​ວາງຍຸດ​ທະ​ສາດ​ທາງ​ດ້ານ​ເສດຖະກິດ ໃຫ້​ສອດຄ່ອງ​ກັບ​ສະພາບ​ຄວາມເປັນ​ຈິງ ຍຸດ​ທະ​ສາດ​ດັ່ງກ່າວ ສ້າງ​ຂຶ້ນ​ເພື່ອ​ເຮັດ​ໃຫ້ການ​ປະຕິບັດ​ວຽກ​ງານ​ທາງ​ດ້ານ​ເສດ​ຖະກິດ ​ໃຫ້​ນັບ​ມື້​ນັບ​ເຂັ້ມແຂງ​ຍິ່ງໆຂຶ້ນ.
ກອງ​ປະຊຸມ​ດັ່ງກ່າວ​ຈັດ​ຂຶ້ນ​ວັນທີ 26 ມັງກອນ 2017 ທີ່​ໂຮງແຮມ​ແລນ​ມາກ ເປັນ​ກຽດ​ເຂົ້າຮ່ວມ​ຂອງ​ທ່ານ ບຸນ​ເກີດ ສັງ​ສົມສັກ ລັດຖະມົນຕີ​ປະຈຳ​ສຳນັກງານ​ນາຍົກລັດຖະມົນຕີ ທ່ານ Caudine LEDOUX ເອກອັກ​ຄະ​ລັດ​ຖະ​ທູດ​ຝຣັ່ງ ປະຈຳລາວ ອຸປະ​ທູດ​ກາ​ນາ​ດາ ແລະ ຂະແໜງການ​ກ່ຽວຂ້ອງ.
ຂົງເຂດ​ເສດຖະກິດ​ການ​ຮ່ວມມື​ລະຫວ່າງ​ລາວ-ຝຣັ່ງ ແລະ ບັນດາ​ປະເທດ​ສະມາຊິກ​ຍັງ​ມີ​ຫຼາຍບັນຫາ ​ທີ່​ຕ້ອງ​ໄດ້​ສືບຕໍ່​ຈັດ​ຕັ້ງ​ປະຕິບັດ​ເພື່ອ​ແກ້​ໄຂ​ບັນຫາ​ເສດຖະກິດ ກໍ່​ຄືວຽກ​ເຮັດ​ງານ​ທຳ ພ້ອມ​ນີ້ ກອງ​ປະຊຸມ​ຍັງ​ໄດ້​ແລກປ່ຽນ​ຄຳຄິດ​ເຫັນ​ເຊິ່ງ​ກັນ ແລະ ກັນ ໃນວຽກ​ງານ​ການ​ຮ່ວມ​ມື ສ້າງ​ບັນດາ​ຂົງເຂດ​ເສດຖະກິດ ຊຸກຍູ້​ໃຫ້ແກ່​ນັກທຸລະກິດ​ໃໝ່ ແລະ ອື່ນໆ. (ຫນັງສືພິມວຽງຈັນໃຫ່ມ)