ປກສ ຕ້ອງເປັນເຈົ້າການຢ່າງຕັ້ງໜ້າ ແກ້ໄຂປາກົດການຫຍໍ້ທໍ້ໃນສັງຄົມ

ກຳລັງ​ປ້ອງ​ກັນ​ຄວາມ​ສະຫງົບ​ ໄດ້​ເອົາໃຈໃສ່​ຢ່າງ​ຕັ້ງໜ້າ ເຂົ້າ​ໃນ​ການ​ຕ້ານ-ສະກັດ​ກັ້ນ ແລະ ແກ້​ໄຂ​ປາກົດການ​ຫຍໍ້ທໍ້ໃນ​ສັງຄົມ ອັນ​ເຮັດ​ໃຫ້​ປີ 2016 ສັງຄົມ​ມີ​ຄວາມ​ສະຫງົບ​ໂດຍ​ພື້ນຖານ ຂະນະ​ທີ່​ພວກ​ກຸ່ມ​ຄົນ​ບໍ່​ດີຈຳນວນ​ໜຶ່ງ ຍັງ​ພະຍາຍາມ​ສ້າງຄວາມ​ບໍ່​ສະຫງົບ ແລະ ກໍ່​ຄວາມເດືອດຮ້ອນ​ໃຫ້​ແກ່​ບຸກຄົນ​ອື່ນ ໂດຍ​ສະເພາະແມ່ນ​ບັນຫາການຄາດ​ຕະ​ກຳ ປຸ້ນ​ຈີ້ ຊີງ​ຊັບ ແລະ ລັກ​ຊັບ​ພົນລະເມືອງ ເກີດ​ຂຶ້ນ​ຈຳນວນ 3 ພັນ​ກວ່າ​ລາຍ ເຊິ່ງ​ເຈົ້າໜ້າທີ່​ສາມາດ​ກັກ​ຕົວ​ຜູ້​ຖືກ​ຫາເກືອບ 3 ພັນ​ຄົນ ທຽບໃສ່​ປີ 2015 ຫຼຸດ​ລົງ 70 ລາຍ ແຕ່​ສະພາບ​ການ​ເກີດ​ອຸບັດ​ຕິ​ເຫດ​ສູງ​ຂຶ້ນ ພາໃຫ້​ມີ​ຜູ້​ເສຍ​ຊີວິດ 900 ກວ່າຄົນ.
ຕາມ​ການ​ລາຍ​ງານ​ຂອງ​ທ່ານ ພົນ​ຕີ ສິນ​ທະ​ວົງ ໄຊ​ຍະ​ກອນ ຮອງ​ລັດຖະມົນຕີ​ກະຊວງ​ປ້ອງ​ກັນຄວາມ​ສະຫງົບ ຕໍ່​ກອງ​ປະຊຸມ​ປະຈຳປີ 2016 ໃຫ້​ຮູ້​ວ່າ: ຕະຫຼອດໄລຍະ 1 ປີ ກຳລັງ​ປ້ອງ​ກັນ​ຄວາມສະຫງົບ ​ໄດ້​ເອົາໃຈໃສ່​ຢ່າງ​ຫ້າວຫັນ​ເຂົ້າ​ໃນ​ການ​ເຜີຍແຜ່ ແລະ ສຶກ​ສາ​ອົບຮົມ​ການເມືອງ-ແນວຄິດ​ໃຫ້​ບັນດາກຳລັງ​ປະກອບ​ອາວຸດ ​ທັງ​ລະດັບ​ສູນ​ກາງ-ທ້ອງຖິ່ນ ເປັນ​ເຈົ້າ​ການ​ປັບປຸງ​ກົງຈັກ​ການຈັດ​ຕັ້ງ​ໃຫ້​ມີ​ຄວາມ​ເຂັ້ມແຂງ​ຮອບດ້ານ ແລະ ສອດຄ່ອງ ຄຽງ​ຄູ່​ກັນນັ້ນ ​ກຳລັງ​ປ້ອງ​ກັນ​ຄວາມ​ສະຫງົບ ​ຍັງ​ໄດ້​ເອົາໃຈໃສ່​ດ້ວຍຄວາມ​ຮັບຜິດຊອບ​ສູງ​ ໃນ​ການຈັດ​ຕັ້ງ​ປະຕິບັດ​ວຽກ​ງານ​ວິຊາ​ສະເພາະ​ຂອງ​ຕົນ ເຂົ້າ​ໃນ​ການ​ແກ້ໄຂ​ປາກົດການ​ຫຍໍ້ທໍ້​ໃນ​ທົ່ວ​ສັງຄົມ ເຊິ່ງ​ໃນ​ປີ 2016 ມີ​ຄະດີ​ອາຍາ​ເກີດ​ຂຶ້ນ​ທົ່ວ​ປະເທດ​ທັງ​ໝົດ 3.231 ລາຍ ມ້າງ​ໄດ້ 2.013 ລາຍ ກັກ​ຕົວ​ຜູ້​ຖືກ​ຫາ 2.924 ຄົນ ຍິງ 320 ຄົນ ທົ່ວ​ປະເທດມີ​ການ​ເກີດ​ອຸບັດ​ຕິ​ເຫດ​ທາງ​ຖະໜົນ​ທັງ​ໝົດ 5.076 ລາຍ ເພີ່ມຂຶ້ນ​ຈາກ​ປີ 2015 ຈຳນວນ 727 ລາຍ ພາຫະນະ​ເປ່​ເພ 9.331 ຄັນ ຄົນ​ໄດ້​ຮັບ​ບາດເຈັບ 8.098 ຄົນ ເສຍ​ຊີວິດ 981 ຄົນ ສະເພາະ​ຢູ່ນະຄອນຫຼວງ​ວຽງ​ຈັນ ມີ 1.412 ລາຍ ພາຫະນະ​ເປ່​ເພ 2.875 ຄັນ ຄົນ​ໄດ້​ຮັບ​ບາດເຈັບ 1.851 ຄົນ ເສຍ​ຊີວິດ 239 ຄົນ ທຽບໃສ່ປີຜ່ານມາ ການ​ເກີດ​ອຸບັດ​ຕິ​ເຫດຢູ່​ນະຄອນຫຼວງ​ເພີ່ມ​ຂຶ້ນ 236 ລາຍ ເສຍ​ຊີວິດ​ເພີ່ມ​ຂຶ້ນ 46 ຄົນ ທົ່ວ​ປະເທດ​ມີ​ອັກຄີ​ໄພ​ເກີດ​ຂຶ້ນ​ທັງໝົດ 140 ຄັ້ງ ສ້າງ​ຜົນ​ເສຍ​ຫາຍເຮືອນ 110 ຫຼັງ ຫ້ອງ​ແຖວ 9 ຫ້ອງ ແລະ ຮ້ານ​ຂາຍເຄື່ອງ 182 ຮ້ານ ​ເປັນຕົ້ນ ມູນ​ຄ່າ​ເສຍ​ຫາຍ 102.753.782.000 ກີບ ທຽບໃສ່​ປີ 2015 ຫຼຸດ​ລົງ 30 ຄັ້ງ ວຽກ​ງານການ​ສະກັດ​ກັ້ນ ແລະ ດຳເນີນ​ຄະດີ​ຢາ​ເສບ​ຕິດ ມີ​ຄະດີເກີດ​ຂຶ້ນ​ທັງ​ໝົດ 2.508 ລາຍ ກັກ​ຕົວ​ຜູ້​ຖືກ​ຫາ 3.740 ຄົນ ຍິງ 558 ຄົນ ເພີ່ມ​ຂຶ້ນ 250 ລາຍ ສາມາດ​ຢຶດ​ຂອງ​ກາງ​ຢາ​ເສບ​ຕິດປະເພດ​ຕ່າງໆ ໄດ້​ກວ່າ 9.000 ກິ​ໂລ ຢຶດ​ເຄື່ອງ​ອັດ​ເມັດ​ຢາ​ບ້າ 7 ເຄື່ອງ ລົດ​ໃຫຍ່ 97 ຄັນ ລົດຈັກ 135 ຄັນ ປືນ 58 ກະບອກ ລວມທັງ​ໝາກ​ແຕກ ແລະ ລູກ​ບົ່ມ​ບີ້ອີກ 22 ໜ່ວຍ.
ກອງ​ປະຊຸມ​ປະຈຳ​ປີ 2016 ຂອງ​ກຳລັງ​ປ້ອງ​ກັນ​ຄວາມ​ສະຫງົບ ໄດ້​ຈັດ​ຂຶ້ນລະຫວ່າງວັນ​ທີ 26-27 ມັງກອນ 2017 ຢູ່​ທີ່​ກະຊວງ​ປ້ອງ​ກັນ​ຄວາມ​ສະຫງົບ ມີທ່ານ ພົນ​ຕີ ສົມ​ແກ້ວ ສີ​ລາ​ວົງ ລັດຖະມົນຕີກະຊວງ​ປ້ອງ​ກັນຄວາມ​ສະຫງົບ​ເປັນ​ປະທານ ເຊິ່ງກອງ​ປະຊຸມ​ນອກຈາກ​ຮັບ​ຟັງ​ບົດລາຍ​ງານ​ການເຄື່ອນໄຫວ 1 ປີຜ່ານ​ມາ ບົດ​ສະຫຼຸບ​ວຽກ​ງານປ້ອງ​ກັນ​ກອງ​ປະຊຸມ​ສຸດ​ຍອດອາ​ຊຽນ ຄັ້ງ​ທີ 28-29 ແລະ ພ້ອມ​ກັນ​ປະກອບ​ຄຳ​ຄິດ​ເຫັນ​ໃສ່ບັນດາ​ແຜນ​ງານ​ຂອງ 4 ກົມ 4 ແຜນ​ງານ​ໃຫຍ່ 41 ໂຄງການ ແລະ ວຽກ​ງານ​ຈຸດ​ສຸມ​ໃນ​ປີ 2017 ແລ້ວ ຕອນ​ບ່າຍ​ວັນ​ທີ 27 ມັງກອນ ທ່ານ ທອງ​ລຸນ ສີ​ສຸ​ລິດ ນາຍົກລັດຖະມົນຕີ ໄດ້​ໃຫ້​ກຽດເຂົ້າ​ຮ່ວມ ແລະ ໂອ້​ລົມ​ກຳລັງປ້ອງ​ກັນ​ຄວາມ​ສະຫງົບ ທ່ານ​ໄດ້ສະແດງ​ຄວາມ​ຊົມເຊີຍ​ຕໍ່​ຜົນງານ​ທີ່​ຍາດ​ມາ​ໄດ້​ຕະຫຼອດ​ໄລຍະ 1 ປີຜ່ານມາ ເຊິ່ງ​ເປັນ​ການ​ປະກອບ​ສ່ວນ​ຢ່າງ​ຕັ້ງໜ້າ ​ເຂົ້າ​ໃນການ​ປົກ​ປັກ​ຮັກສາ ແລະ ສ້າງສາ​ພັດທະນາ​ປະເທດ​ຊາດ ​ໃຫ້​ມີຄວາມ​ເຂັ້ມແຂງ​ຮອບດ້ານ ພ້ອມນີ້ ເພື່ອ​ເປັນ​ການ​ສືບຕໍ່​ຮັກສາມູນເຊື້ອ​ອັນ​ດີ ແລະ ແກ້​ໄຂ​ຈຸດອ່ອນ ຂໍ້ຄົງຄ້າງ ທ່ານ​ນາຍົກ​ໄດ້ເນັ້ນ​ໃຫ້​ກຳລັງ​ປ້ອງ​ກັນ​ຄວາມສະຫງົບ ​ເອົາໃຈໃສ່​ຈັດ​ຕັ້ງ​ປະຕິບັດ​ວຽກ​ງານ​ວິຊາ​ສະເພາະ​ຂອງຕົນ​ ດ້ວຍ​ຄວາມ​ວ່ອງໄວ ທັນ​ການ ແລະ ແທດເໝາະ​ກັບ​ສະພາບການ​ພັດທະນາ​ທັງ​ພາຍ​ໃນ​ພາກພື້ນ-ສາກົນ ແກ້​ໄຂ​ບັນຫາ​ດ້ວຍຄວາມ​ຍຸຕິ​ທຳ ປອດ​ໃສ ເປັນ​ທຳ ພ້ອມ​ກັບ​ເອົາໃຈໃສ່​ເຂົ້າ​ເຖິງ​ປະຊາ​ຊົນ ໃກ້ຊິດຕິດແທດ ເຮັດ​ໃຫ້ເຂົາເຈົ້າ​ຮັບ​ຮູ້​ແນວທາງ​ນະ​ໂຍບາຍ​ຂອງ​ພັກ-ລັດ ລະບຽບ​ກົດໝາຍ​ຢ່າງ​ຈະແຈ້ງ ໂດຍ​ສະເພາະແມ່ນ​ການ​ປະກອບສ່ວນ​ເຂົ້າ​ໃນຂະ​ບວນ​ການ​ປ້ອງ​ກັນ​ຄວາມ​ສະຫງົບ ​ໃນ​ຂອບ​ເຂດ​ທົ່ວ​ປະເທດ​ຢ່າງ​ຕັ້ງໜ້າ ຄຽງ​ຄູ່​ກັນ​ນັ້ນ ກຳລັງປ້ອງ​ກັນ​ຄວາມ​ສະຫງົບ ຕ້ອງເປັນ​ເຈົ້າ​ການ​ຢ່າງ​ຕັ້ງໜ້າ​ແກ້​ໄຂປາກົດການ​ຫຍໍ້ທໍ້​ໃນ​ສັງຄົມ ເປັນຕົ້ນ​ແມ່ນ​ຢູ່​ຕາມ​ຊາຍ​ແດນ ແລະ ບັນດາ​ຕົວ​ເມືອງ​ໃຫຍ່ ເພື່ອ​ສະກັດ​ກັ້ນ​ແກ້​ໄຂ​ບັນຫາ​ອຸບັດ​ຕິ​ເຫດ ຢາ​ເສບ​ຕິດ ແລະ ການ​ຄ້າຂາຍຜິດ​ກົດໝາຍ.(ຫນັງສືພິມວຽງຈັນໃຫ່ມ)