ນະຄອນຫຼວງ ຈະສຳຫຼວດຖານລາຍຮັບງົບປະມານຄືນໃໝ່
ກອງປະຊຸມວຽກງານເດີນສຳຫຼວດຖານລາຍຮັບງົບປະມານຄືນໃໝ່
ທົ່ວນະຄອນຫຼວງວຽງຈັນ (ນວ) ຈັດຂຶ້ນວັນທີ 25 ມັງກອນ 2017
ທີ່ພະແນກສ່ວຍສາອາກອນ ນວ ເປັນປະທານຂອງທ່ານ ພັນຄຳ ມາລາບັນດິດ
ຫົວໜ້າພະແນກການເງິນ ນວ ມີທ່ານ ຄຳຟານ ວົງສາຄຳຜຸຍ
ຫົວໜ້າກົມສ່ວຍສາອາກອນ ກະຊວງການເງິນ ແລະ ທ່ານ ແກ້ວພິລາວັນ ອາໄພລາດ
ຮອງເຈົ້າຄອງ ນວ ພ້ອມດ້ວຍບັນດາຫົວໜ້າພະແນກການ ຮອງເຈົ້າເມືອງ
ຫົວໜ້າຫ້ອງການສ່ວຍສາອາກອນ 9 ຕົວເມືອງອ້ອມຂ້າງ ແລະ
ພະນັກງານກ່ຽວຂ້ອງເຂົ້າຮ່ວມ.ເພື່ອເປັນການປຶກສາຫາລືແລກປ່ຽນບົດຮຽນເຊິ່ງກັນ ແລະ ກັນ ໃນການເດີນສຳຫຼວດຖານລາຍຮັບງົບປະມານຄືນໃໝ່ທົ່ວ ນວ ໃຫ້ໄດ້ຮັບການຈັດຕັ້ງປະຕິບັດມີຄວາມສະດວກວ່ອງໄວ ແລະ ສຳເລັດຕາມເປົ້າໝາຍທີ່ກະຊວງການເງິນມອບໃຫ້ ສະນັ້ນ ບັນດາຜູ້ເຂົ້າຮ່ວມກອງປະຊຸມໄດ້ຮັບຟັງການລາຍງານ ສະພາບການກະກຽມການເກັບກຳຂໍ້ມູນ ແລະ ເດີນສຳຫຼວດຖານລາຍຮັບງົບປະມານ ທີ່ຂຶ້ນກັບຄວາມຮັບຜິດຊອບຂອງພະແນກສ່ວຍສາອາກອນ ນວ ແລະ ບັນດາເມືອງອ້ອມຂ້າງຈາກທ່ານ ຄຳມອນ ບົວພັນ ຫົວໜ້າພະແນກສ່ວຍສາອາກອນ ນວ ເຊິ່ງຈະໄດ້ເດີນສຳຫຼວດຫົວໜ່ວຍທຸລະກິດຂະໜາດໃຫຍ່-ກາງທີ່ມີລາຍຮັບເກີນ 4 ຮ້ອຍລ້ານກີບ ທີ່ຂຶ້ນກັບພະແນກ ແລະ ບັນດາເມືອງ ສຳຫຼວດທຸລະກິດທີ່ມີລາຍຮັບຫຼຸດ 4 ຮ້ອຍລ້ານກີບ ພ້ອມທັງສຳຫຼວດກ່ຽວກັບເນື້ອທີ່ດິນຄ່າເຊົ່າທີ່ຂຶ້ນກັບເມືອງ ສຳຫຼວດ ແລະ ເກັບກຳຂໍ້ມູນບັນດາພະແນກການທີ່ມີລາຍຮັບຄ່າທຳນຽມ-ຄ່າບໍລິການ ວິຊາການ ໂດຍແບ່ງເປັນລະດັບເກຣດ A (ພື້ນຖານທີ່ມາແຈ້ງອາກອນເປັນປົກກະຕິ) ເກຣດ B (ພື້ນຖານທີ່ມາແຈ້ງອາກອນບໍ່ປົກກະຕິ ໃນນີ້ ແຈ້ງສູນ ຫຼື ແຈ້ງບໍ່ມີລາຍຮັບ) ເກຣດ C (ພື້ນຖານທີ່ບໍ່ມາແຈ້ງອາກອນປະເພດໃດເລີຍ) ສຳລັບເປົ້າໝາຍໃນການເດີນສຳຫຼວດມີທັງໝົດ 2.460 ພື້ນຖານ ໃນນີ້ ຂັ້ນພະແນກ 777 ພື້ນຖານ ໃຊ້ຈຳນວນຄົນ 94 ຄົນ ແບ່ງເປັນ 40 ຈຸ ແລະ ບັນດາເມືອງ 1.683 ພື້ນຖານ ນຳໃຊ້ຈຳນວນຄົນທັງໝົດ 223 ຄົນ ແບ່ງເປັນ 67 ຈຸ ຄາດວ່າຈະໃຫ້ສຳເລັດພາຍໃນ 30 ວັນ ໂດຍເລີ່ມຈັດຕັ້ງປະຕິບັດແຕ່ວັນທີ 26 ມັງກອນ 2017 ເປັນຕົ້ນໄປ (ຂ່າວໜັງສືພິມວຽງຈັນໃຫ່ມ)
ນະຄອນຫຼວງ ຈະສຳຫຼວດຖານລາຍຮັບງົບປະມານຄືນໃໝ່
![]()
Reviewed by makarow
on
3:34:00 AM
Rating:
