ເລີ່ມເກັບກຳຫົວໜ່ວຍວິສາຫະກິດ ຍົກຖານລາຍຮັບສູ່ລະບົບທັນສະໄໝ

ນະຄອນຫຼວງ​ວຽງ​ຈັນ (ນວ) ຈະ​ໄດ້​ເລີ່ມ​ຈັດ​ຕັ້ງ​ປະຕິບັດ ຕິດຕາມ​ກວດກາ​ການ​ເກັບ​ກຳ​ຂໍ້​ມູນຫົວໜ່ວຍ​ວິ​ສາ​ຫະ​ກິດ (ເດີນ​ສຳຫຼວດ​ຖານ​ລາຍ​ຮັບ​ງົບປະມານຄືນໃໝ່) ເພື່ອ​ເປັນ​ການ​ຍົກ​ຖານລາຍ​ຮັບ​ສ່ວຍ​ສາ​ອາກອນ ແລະ ຫັນ​ເປັນ​ທັນ​ສະໄໝ ວັນ​ທີ 11 ມັງກອນ 2017 ທີ່​ພະແນກການ​ເງິນ ນວ ໄດ້​ຈັດ​ກອງ​ປະຊຸມ​ພົບ​ປະ​ກັບຄະນະ​ຊີ້​ນຳ​ລວມ​ທີ່​ຖືກ​ແຕ່ງຕັ້ງ​ໃນຄັ້ງ​ນີ້ ໂດຍ​ເຂົ້າ​ຮ່ວມ​ຂອງ​ທ່ານ ສົມ​ດີ ດວງ​ດີ ຮອງ​ນາຍົກ​ລັດ​ຖະມົນຕີ ລັດຖະມົນຕີ​ກະຊວງ​ການເງິນ ທ່ານ ຄຳ​ພັນ ມາລາ​ບັນດິດ ຫົວໜ້າ​ພະແນກການ​ເງິນ ນວ ພ້ອມ​ດ້ວຍ​ທ່ານ​ເຈົ້າເມືອງ ຮອງເຈົ້າເມືອງ ແລະ ຫົວໜ້າ​ພະ​ແນກການ​ອ້ອມ​ຂ້າງ.
ທ່ານ ຄຳ​ມອນ ບົວ​ພັນ ຫົວໜ້າ​ພະ​ແນກ​ສ່ວຍ​ສາ​ອາກອນ​ນະຄອນ​ຫຼວງ​ວຽງ​ຈັນ ໄດ້​ລາຍ​ງານວ່າ: ອີງ​ຕາມ​ຂໍ້​ຕົກລົງ​ຂອງ​ເຈົ້າຄອງ ນວ ວ່າ​ດ້ວຍ​ການ​ແຕ່ງຕັ້ງຄະນະ​ຊີ້​ນຳ​ລວມ​ ຕິດຕາມກວດກາ​ການ​ເກັບ​ກຳ​ຂໍ້​ມູນ​ຫົວໜ່ວຍ​ວິສາ​ຫະ​ກິດ (ເດີນ​ສຳ​ຫຼວດ​ຖານລາຍ​ຮັບ​ງົບປະມານ​ຄືນໃໝ່) ເພື່ອ​ເປັນ​ການຍົກ​ຖານ​ລາຍ​ຮັບສ່ວຍ​ສາ​ອາກອນ ແລະ ຫັນ​ເປັນທັນ​ສະໄໝ​ໃນ​ຂອບ​ເຂດ​ທົ່ວ ນວ ປັດຈຸບັນ​ຜ່ານ​ການ​ເດີນ​ສຳ​ຫຼວດຖານ​ລາຍ​ຮັບ​ງົບປະມານ​ຄືນໃໝ່ທົ່ວ ນວ ທີ່​ຂຶ້ນ​ກັບ​ຄວາມ​ຮັບ​ຜິດຊອບ​ຂອງ​ພະ​ແນກ​ສ່ວຍ​ສາ​ອາກອນ ນວ ແລະ ບັນດາ​ເມືອງອ້ອມ​ຂ້າງ​ໃນ​ສົກ​ປີ 2015-2016 ມີ​ທັງ​ໝົດ 41.391 ພື້ນຖານ (ເຊິ່ງບໍ່​ລວມ​ຈຳນວນ 2.769 ພື້ນຖານ​ ທີ່​ໄດ້​ສະເໜີ​ຫາ​ຂະແໜງການ​ກ່ຽວຂ້ອງ​ເພື່ອ​ລົບ​ລ້າງ​ອອກຈາກ​ສະຖິຕິ) ໃນ​ນັ້ນ ຂັ້ນ​ພະແນກ​ຄຸ້ມ​ຄອງ 11.428 ພື້ນຖານ ໃນ​ນີ້ ຖື​ບັນຊີ 2.951 ພື້ນຖານ ມອບ​ເໝົາ 8.394 ພື້ນຖານ ອອກ​ບັດ 83 ພື້ນຖານ ຂັ້ນ​ເມືອງຄຸ້ມ​ຄອງ 19.296 ພື້ນຖານ ໃນນັ້ນ ຖື​ບັນຊີ 2.316 ພື້ນຖານ ຄາດໝາຍ​ຕາມ​ການ​ປະ​ເມີນລາຍ​ຮັບ​ເກີນ 400 ລ້ານ​ກີບ 1.023 ພື້ນຖານ ມອບ​ເໝົາ 4.920 ພື້ນຖານ ອອກ​ບັດ 2.434 ພື້ນຖານ ເກັບ​ປີ້ 2.917 ພື້ນຖານ ຄ່າ​ເຊົ່າ 5.686 ພື້ນຖານ ແລະ ຂັ້ນ​ບ້ານ​ຄຸ້ມ​ຄອງ​ຈຳນວນ 10.667 ພື້ນຖານ.
ສຳລັບ​ແຜນການ ແລະ ວິທີການ​ໃນ​ການ​ລົງ​ເກັບ​ກຳ ແລະ ສຳ​ຫຼວດ​ຖານ​ລາຍ​ຮັບ​ງົບປະມານ​ຂອງ​ຫົວໜ່ວຍ​ທຸລະ​ກິດ​ຂະໜາດໃຫຍ່-ກາງ ​ທີ່​ມີ​ລາຍ​ຮັບ​ເກີນ 400 ລ້ານ​ກີບ​ທີ່​ຂຶ້ນ​ກັບ​ພະ​ແນກ ແລະ ບັນດາ​ເມືອງ ເດີນ​ສຳ​ຫຼວດ​ທຸລະກິດ​ທີ່​ມີ​ລາຍ​ຮັບ​ຫຼຸດ 400 ລ້ານກີບ ເດີນ​ສຳ​ຫຼວດ​ກ່ຽວ​ກັບ​ເນື້ອທີ່​ດິນ ແລະ ຄ່າ​ເຊົ່າ​ທີ່​ຂຶ້ນ​ກັບ​ບັນດາ​ເມືອງ ສຳ​ຫຼວດ ແລະ ເກັບ​ກຳຂໍ້​ມູນ​ບັນດາ​ພະແນກການ​ທີ່​ມີລາຍ​ຮັບ​ຄ່າ​ທຳນຽມ ແລະ ຄ່າ​ບໍລິ​ການ​ວິຊາ​ການ ສ່ວນ​ເປົ້າ​ໝາຍໃນ​ການ​ເດີນ​ສຳ​ຫຼວດ​ແບ່ງ​ອອກເປັນ 3 ລະດັບຄື: ເກຣດ A ແມ່ນ​ພື້ນຖານ​ທີ່​ມາ​ແຈ້ງ​ເສຍ​ອາກອນ​ປົກກະຕິ ເກຣດ B ແມ່ນ​ພື້ນຖານ​ທີ່​ມາ​ແຈ້ງ​ເສຍ​ອາກອນ​ບໍ່​ປົກກະຕິ (ແຈ້ງ 0 ຫຼື ແຈ້ງ​ບໍ່​ມີ​ລາຍຮັບ) ແລະ ເກຣດ C ພື້ນຖານ​ທີ່​ບໍ່ມາ​ແຈ້ງ​ເສຍ​ອາກອນ​ປະເພດ​ໃດເລີຍ.
ໂອກາດ​ນີ້ ທ່ານ​ຮອງ​ນາຍົກລັດຖະມົນຕີ ໄດ້​ມີ​ຄຳ​ເຫັນ​ວ່າ: ການ​ເດີນ​ສຳ​ຫຼວດ​ຖານ​ລາຍ​ຮັບງົບປະມານ​ຄືນໃໝ່ ​ແມ່ນ​ອີງ​ຕາມຄຳ​ສັ່ງ​ຂອງ​ນາຍົກລັດຖະມົນຕີ ສະບັບ​ເລກ​ທີ 40/​ນຍ ລົງ​ວັນ​ທີ 29/9/2016 ວ່າ​ດວຍ​ການ​ເກັບກຳ ແລະ ສຳ​ຫຼວດ​ຖານ​ລາຍ​ຮັບງົບປະມານ​ຄືນໃໝ່​ໃນ​ຂອບ​ເຂດທົ່ວ​ປະເທດ ການ​ລົງ​ເກັບ​ກຳ ແລະ ສຳ​ຫຼວດ​ຖານ​ລາຍ​ຮັບ​ງົບປະມານ​ຄັ້ງ​ນີ້ ເປັນ​ບ່ອນ​ອີງ​ອັນໜັກ​ແໜ້ນ​ໃຫ້​ແກ່​ການ​ສ້າງ​ແຜນພັດທະນາ​ເສດຖະກິດ-ສັງຄົມ ເວົ້າ​ລວມ ເວົ້າ​ສະເພາະແມ່ນແຜນ​ໃນ​ການ​ສ້າງ​ລາຍ​ຮັບ​ງົບ​ປະມານ​ແຫ່ງ​ລັດ ​ໃຫ້​ສອດຄ່ອງ​ກັບຄວາມ​ເປັນ​ຈິງ​ໃນ​ແຕ່​ລະ​ໄລຍະ ແລະ ເພື່ອ​ເປັນ​ບ່ອນ​ອີງ​ໃຫ້​ແກ່ບັນດາ​ຂະແໜງການ​ຂັ້ນ​ສູນ​ກາງ ອຳນາດ​ການ​ປົກຄອງ​ທ້ອງຖິ່ນ ແນໃສ່​ເຮັດ​ໃຫ້ການ​ຄຸ້ມ​ຄອງ​ຈັດເກັບ​ລາຍ​ຮັບ​ງົບປະມານ​ແຫ່ງ​ລັດຄົບ​ຖ້ວນ ຖືກຕ້ອງ​ຕາມ​ລະບຽບກົດໝາຍ​ກຳນົດ ມີ​ປະ​ສິດທິ​ຜົນສູງ ແລະ ບັນລຸ​ຕາມ​ແຜນການ​ທີ່ສະພາ​ແຫ່ງ​ຊາດ​ຮັບຮອງ​ເອົາ. (ຫນັງສືພິມວຽງຈັນໃຫ່ມ)