ທລຍ ເອົາໃຈໃສ່ແກ້ໄຂຄວາມທຸກຍາກຂອງປະຊາຊົນ

ຄະນະ​ພັດທະນາ​ຊົນນະບົດ ແລະ ລຶບລ້າງ​ຄວາມທຸກ​ຍາກຂັ້ນ​ສູນ​ກາງ ກອງ​ທຶນ​ຫຼຸດຜ່ອນຄວາມທຸກ​ຍາກ ຮ່ວມ​ກັບ​ກະຊວງກະສິກຳ ແລະ ປ່າໄມ້ ຈັດ​ກອງປະຊຸມ​ສະພາ​ບໍລິຫານ​ກອງ​ທຶນຫຼຸດຜ່ອນ​ຄວາມທຸກ​ຍາກ ສະໄໝສາມັນ ຄັ້ງ​ທີ 22 ຂຶ້ນວັນ​ທີ 31 ມັງກອນ 2017 ທີ່​ໂຮງແຮມ​ດອນຈັນ​ພາ​ເລດ ໂດຍ​ເປັນ​ປະທານຂອງ​ທ່ານ ລຽນ ທິ​ແກ້ວ ລັດ​ຖະມົນຕີ​ກະຊວງ​ກະສິກຳ ແລະ ປ່າໄມ້ ທັງ​ເປັນ​ປະທານ​ສະພາ​ບໍ​ລິຫານ​ກອງ​ທຶນ​ຫຼຸດຜ່ອນ​ຄວາມທຸກຍາກ ມີ​ບັນດາ​ຮອງ​ລັດຖະມົນຕີກະຊວງ​ກ່ຽວຂ້ອງ ຮອງ​ເຈົ້າແຂວງ ຄະນະ​ສະພາ​ບໍລິຫານກອງ​ທຶນ ແລະ ພາກສ່ວນ​ກ່ຽວຂ້ອງ​ເຂົ້າ​ຮ່ວມ.
ກອງ​ປະຊຸມ​ໄດ້​ສະຫຼຸບ​ຕີ​ລາຄາ ຜົນ​ໄດ້​ຮັບ​ຂອງ​ວຽກ​ງານ​ກອງ​ທຶນຫຼຸດຜ່ອນ​ຄວາມທຸກ​ຍາກ​ໄລຍະ 2 ແຕ່​ປີ 2012-2016 ແລະ ແຜນການ​ໄລຍະ 3 ແຕ່​ປີ 2017-2019 ພິຈາລະນາ​ຮັບຮອງ​ເອົາການ​ແຕ່ງຕັ້ງ​ສະພາ​ບໍລິຫານກອງ​ທຶນ​ໄລຍະ 3 ແລະ ບັນຫາອື່ນໆ ເຊິ່ງ​ກອງ​ທຶນ​ຫຼຸດຜ່ອນຄວາມທຸກ​ຍາກ 2 ໄດ້​ຈັດ​ຕັ້ງ​ປະຕິ​ບັດ​ຢູ່ 10 ແຂວງ ກວມ​ເອົາ 42 ເມືອງ​ທຸກ​ຍາກ 278 ກຸ່ມ​ບ້ານ ແລະ 1.951 ບ້ານ ມູນ​ຄ່າ 80,75 ລ້ານ​ໂດ​ລາ​ສະຫະລັດ ຫຼື ປະມານ 650 ຕື້​ກີບ ແລະ ມີ​ມູນຄ່າ​ການ​ລົງທຶນ​ທັງ​ໝົດ 65,7 ລ້ານ​ໂດ​ລາ ຫຼື ປະມານ 520 ຕື້ກີບ ໃນ​ນັ້ນ ເປັນ​ທຶນ​ລັດຖະບານ ສົມທົບ 10 ລ້ານ​ໂດ​ລາ ຫຼື ປະມານ 80 ຕື້​ກີບ ທຶນ​ຊ່ວຍເຫຼືອ​ລ້າຈາກ​ທະນາຄານ​ໂລກ 25 ລ້ານໂດ​ລາ ຫຼື ປະມານ 200 ຕື້​ກີບ ຈາກ​ອົງການ​ເພື່ອ​ການ​ພັດທະນາ ແລະ ການ​ຮ່ວມ​ມື​ແຫ່ງ​ປະເທດສະ​ວິດ (SDC) 13,66 ລ້ານ​ໂດລາ ຫຼື ປະມານ 106 ຕື້​ກີບ ແລະ ຈາກ​ກອງ​ທຶນ​ສາກົນ ເພື່ອ​ຫຼຸດຜ່ອນ​ຄວາມທຸກ​ຍາກຂອງ​ອົດສະ​ຕຣາ​ລີ 17,5 ລ້ານ​ໂດ​ລາ ຫຼື ປະມານ 130 ຕື້​ກີບ ເພື່ອ​ນຳ​ໃຊ້ເຂົ້າ​ໃນ​ການຈັດຕັ້ງ​ປະຕິບັດ​ວຽກງານ​ ກອງ​ທຶນ​ຫຼຸດຜ່ອນ​ຄວາມທຸກ​ຍາກ​ເປັນ​ໄລຍະ 4 ປີ ທັງ​ນີ້ ເພື່ອ​ປັບປຸງ​ການ​ເຂົ້າ​ເຖິງ ແລະ ການ​ຊົມໃຊ້​ພື້ນຖານ​ໂຄງ​ລ່າງຂັ້ນ​ພື້ນຖານ ແລະ ການ​ບໍລິການຕ່າງໆ​ຂອງ​ຊຸມ​ຊົນ​ທຸກ​ຍາກໃນເຂດ​ຊົນນະບົດ ໂດຍ​ຜ່ານ​ຂະ​ບວນການ​ມີ​ສ່ວນ​ຮ່ວມ​ຂອງ​ຊຸມ​ຊົນ ແລະ ຮັບປະກັນ​ຄວາມ​ຍືນ​ຍົງ.
ສຳລັບ​ການຈັດຕັ້ງ​ປະຕິບັດກອງ​ທຶນ​ຫຼຸດຜ່ອນ​ຄວາມທຸກ​ຍາກ 3 ມີ 10 ແຂວງ 43 ເມືອງ 263 ກຸ່ມ​ບ້ານ ແລະ 1.800 ບ້ານ ມູນຄ່າ 54 ລ້ານ​ໂດ​ລາ ຫຼື ປະມານ 420 ຕື້​ກີບ ເຊິ່ງ​ກອງ​ທຶນ​ປະກອບດ້ວຍ 4 ອົງ​ປະກອບ ທີ່​ໄດ້​ຈັດ​ສັນງົບປະມານ​ໃຫ້ຄື: ສ້າງ​ພື້ນຖານໂຄງ​ລ່າງ​ຂອງ​ຊຸມ​ຊົນ ແລະ ການວາງ​ແຜນ ກວມ​ເອົາ​ງົບປະມານ 73,30% ການ​ສ້າງ​ຄວາມ​ເຂັ້ມແຂງ​ໃຫ້​ກັບ​ອຳນາດ​ການ​ປົກຄອງທ້ອງຖິ່ນ ແລະ ຊຸມ​ຊົນ 9,20% ວຽກ​ງານ​ການ​ຄຸ້ມ​ຄອງ ແລະ ບໍລິຫານ​ໂຄງການ 15% ແລະ ວຽກ​ງານ​ປັບປຸງ​ຊີວິດ​ການ​ເປັນ​ຢູ່ 2,50% ສະເພາະ​ເງິນ​ຂອງ​ທະນາ​ຄານ​ໂລກ​ເທົ່າ​ນັ້ນ 30 ລ້ານໂດ​ລາ ຫຼື ປະມານ 240 ຕື້​ກີບ ທັງ​ນີ້ເພື່ອ​ເຮັດ​ໃຫ້​ຊີວິດ​ການ​ເປັນຢູ່​ຂອງ​ຊຸມ​ຊົນ​ໃນ​ເຂດ​ຊົນນະບົດ​ທີ່ທຸກ​ຍາກ​ດີ​ຂຶ້ນ ແລະ ສ້າງ​ຄວາມເຂັ້ມແຂງ ສະໜັບສະໜູນ​ການປັບປຸງ​ການ​ເຂົ້າ​ເຖິງ​ການ​ບໍລິການ​ຂັ້ນ​ພື້ນຖານ. (ຫນັງສືພິມວຽງຈັນໃຫ່ມ)