ຫັດຖະກຳປັກດິ້ງ ພົບບັນຫາຍ້ອນມີສິນຄ້າລອກຮຽນແບບ

ຜະລິດ​ຕະ​ພັນ​ຫັດຖະກຳ​ປັກດິ້ງ ​ທີ່​ຜະລິດ​ຈາກ​ສີໄມ້ລາຍມື​ອັນປານີດ​ຂອງ​ປະຊາຊົນ​ບັນດາເຜົ່າ ຈາກ​ເມື່ອ​ກ່ອນ​ຕະຫຼາດ​ຈຳໜ່າຍໄປ​ໄດ້​ດີ ​ແຕ່​ຕົກ​ມາ​ສອງ​ປີ​ມາ​ນີ້ ຍອດ​ຈຳໜ່າຍ​ຫຼຸດ​ລົງ​ຍ້ອນ​ມີ​ສິນຄ້າ​ລອກ​ຮຽນ​ແບບ ​ທີ່​ນຳ​ເຂົ້າ​ຈາກ​ຕ່າງປະເທດ​ມາ​ຈຳໜ່າຍ​ຂາຍ​ຢູ່ຕະຫຼາດ​ນະຄອນຫຼວງ​ວຽງ​ຈັນ​ທີ່ລາຄາ​ຖືກ ກວ່າ​ຫຼາຍ 10 ທົບ ເຈົ້າຂອງ​ຜະລິດ​ຕະ​ພັນ​ຮຽກຮ້ອງ​ມາຍັງ​ພາກ​ລັດ ກໍ່​ຄືພາກສ່ວນ​ກ່ຽວຂ້ອງ​ຊ່ວຍ​ແກ້​ໄຂ ເພື່ອ​ເປັນ​ການຊຸກຍູ້​ສົ່ງເສີມ​ຜະລິດ​ຕະ​ພັນ​ພາຍໃນ​ເຮົາ ​ໃຫ້​ຢູ່​ຄຽງ​ຄູ່​ກັບ​ສັງຄົມລາວ​ຕະຫຼອດ​ໄປ.
ທ່ານນາງ ສົມ​ຈັນ ມິດ​ທິ​ຍະພອນ ເຈົ້າ​ຂອງ​ຫັດຖະກຳ​ປັກ​ດິ້ງ ແລະ ຊ້ານ້ຳກ້ຽງ ຢູ່​ບ້ານ​ມະໂນ ເມືອງ ແລະ ແຂວງ​ຫຼວງ​ພະ​ບາງ ໄດ້​ກ່າວ​ເມື່ອ​ບໍ່​ດົນ​ນີ້​ວ່າ: ກ່ອນ​ຈະກ້າວ​ສູ່​ອາຊີບ​ຫັດຖະກຳ​ທີ່​ມີ​ຊື່ສຽງ​ທຸກ​ວັນ​ນີ້ ເບື້ອງ​ຕົ້ນ​ເປັນພຽງ​ແຕ່​ຜູ້​ຂາຍ​ຜະລິດ​ຕະ​ພັນ​ໃຫ້ຄົນ​ອື່ນ​ເທົ່າ​ນັ້ນ ​ຈາກ​ປະສົບ​ການບວກ​ໃສ່​ຄວາມ​ມັກ​ຮັກ​ອາຊີບ​ນີ້ ຈຶ່ງ​ໄດ້​ຕັດສິນ​ໃຈ​ມາ​ເຮັດ​ຫັດຖະກຳ​ຊ້ານ້ຳກ້ຽງ ໃນ​ປີ 1991-1993 ແຕ່​ພາຍຫຼັງ​ເຮັດ​ຂຶ້ນ​ມາ​ພົບ​ບັນຫາ​ຕະຫຼາດ​ໄປ​ບໍ່​ໄດ້​ດີ​ຈຶ່ງ​ໄດ້​ຢຸດເຊົາ​ຊົ່ວຄາວ ແລະ ປີ 2014 ໄດ້ກັບ​ມາ​ເຮັດ​ຄືນ​ອີກ ສ່ວນ​ຫັດຖະກຳ​ປັກ​ດິ້ງ​ເຄື່ອງ​ຊາວ​ວັງ​ໄດ້​ເລີ່ມເຮັດ​ມາ​ແຕ່​ປີ 2005 ເປັນຕົ້ນ​ມາ ເພື່ອ​ຮັກສາ​ອະນຸລັກ​ຫັດຖະກຳ​ປັກ​ດິ້ງ​ນີ້​ ໄວ້​ໃຫ້​ຢູ່​ຍາວ​ນານ​ຮອດ​ເຊັ່ນລູກ​ເຊັ່ນ​ຫຼານ ​ດ້ວຍ​ນຳ​ໃຊ້​ວັດຖຸ​ດິບພາຍ​ໃນ ແລະ ຕ່າງປະເທດ​ມາປະສົມ​ປະສານ​ດ້ວຍ​ສີໄມ້ລາຍມືອັນ​ປານີດ ​ເຮັດ​ໃຫ້​ຜະລິດ​ຕະ​ພັນ​ທີ່ຜະລິດ​ອອກ​ມາ​ເປັນ​ທີ່​ຍອມຮັບຂອງ​ສັງຄົມ ກໍ່​ຄືຜູ້​ຊົມໃຊ້​ ເນື່ອງຈາກ​ປັກ​ດິ້ງ​ແມ່ນ​ເປັນ​ຜະລິດ​ຕະພັນ​ທີ່​ປະກອບ​ໃສ່​ເຄື່ອງນຸ່ງ​ຫົ່ມຂອງ​ເອື້ອຍ​ນ້ອງ​ແມ່ຍິງ​ລາວ ໂດຍ​ສະເພາະແມ່ນ​ຊຸດ​ແພໄໝມ້ອນ ແລະ ຊຸດ​ແຕ່ງງານ​ທີ່​ພວກເຮົາ​ເຫັນ​ຢູ່​ຄໍ​ເສື້ອ​ທີ່​ມີ​ຂອບ​ສວຍງາມ ຜ່ານ​ການ​ດຳເນີນ​ເຫັນ​ວ່າ ກິດຈະການ​ແບບ​ຄອບຄົວ​ໄປ​ໄດ້​ດີພໍ​ສົມຄວນ ມີ​ຕະຫຼາດ​ກວ້າງຂວາງ​ນອກຈາກ​ຈຳໜ່າຍ​ຢູ່​ພາຍໃນ​ແຂວງ​ຫຼວງ​ພະ​ບາງ​ແລ້ວ​ ຍັງ​ມີ​ຕະຫຼາດ​ຢູ່​ຫຼາຍ​ແຂວງ ເປັນຕົ້ນ​ຢູ່ນະຄອນຫຼວງ​ວຽງ​ຈັນ ແຂວງສະຫວັນ​ນະ​ເຂດ ຈຳປາ​ສັກ ອຸດົມໄຊ ໄຊ​ຍະ​ບູ​ລີ ແລະ ແຂວງ​ຊຽງຂວາງ ເຊິ່ງ​ການ​ດຳເນີນ​ກິດ​ຈະການ​ໄດ້​ຊຸກຍູ້​ສົ່ງເສີມ​ປະຊາຊົນຫຼາຍ​ບ້ານ ​ຢູ່​ແຂວງ​ຫຼວງ​ພະ​ບາງ ປະມານ 100 ຄົນ ເປັນ​ຜູ້​ຜະລິດ ແລະ ເຮັດ​ໃຫ້​ເຂົາເຈົ້າ​ມີ​ລາຍ​ຮັບເດືອນ​ໜຶ່ງ ປະມານ 3-4 ລ້ານກີບ​ຕໍ່​ຄົນ ແຕ່​ປະຈຸ​ບັນ ຍອດ​ຂາຍ​ຫຼຸດ​ລົງ 30% ນັບ​ແຕ່​ປີ 2014 ເປັນຕົ້ນ​ມາ​ເນື່ອງ ຈາ​ກວ່າມີ​ພໍ່ຄ້າ​ຕ່າງປະເທດ​ ໄດ້ນຳ​ເອົາ​ສິນຄ້າ​ລອກ​ຮຽນ​ແບບທີ່​ລາຄາ​ຖືກ ແລະ ບໍ່​ມີ​ຄຸນະພາບມາ​ຈຳໜ່າຍ​ຂາຍ​ຢູ່​ຕະຫຼາດ​ນະຄອນ​ຫຼວງ​ວຽງ​ຈັນ ເຮັດ​ໃຫ້​ຜູ້​ຊົມໃຊ້​ຫັນ​ໄປ​ໃຊ້​ສິນຄ້າ​ລອກ​ຮຽນແບບ​ທີ່​ລາຄາ​ຖືກ ແຕ່​ບໍ່​ຄຳນຶງເຖິງ​ຄຸນະພາບ ອັນ​ໄດ້​ເຮັດ​ໃຫ້​ມີຜົນ​ກະທົບ​ຕໍ່​ຜະລິດ​ຕະ​ພັນ​ພາຍໃນ​ເຮົາ. (ຫນັງສືພິມລາວພັດທະນາ)