ປີຜ່ານມາ ຂະແໜງທ່ອງທ່ຽວ ສ້າງລາຍຮັບເຂົ້າປະເທດ 5 ພັນກວ່າຕື້ກີບ

ປັດຈຸບັນ ຫຼາຍ​ປະເທດ​ທົ່ວໂລກ ໄດ້​ສຸມ​ໃສ່​ພັດທະນາ​ອຸດ​ສາຫະ​ກຳ​ການທ່ອງທ່ຽວ ໃຫ້​ມີຄວາມ​ໂດດ​ເດັ່ນ ເພື່ອ​ດຶງ​ເມັດ​ເງິນມະຫາສານ​ຈາກ​ທຸລະ​ກິດ​ທ່ອງທ່ຽວ ໂດຍ​ສະເພາະແມ່ນ​ການທ່ອງ​ທ່ຽວ​ທຳ​ມະ​ຊາດ ແລະ ມີສ່ວນ​ຮ່ວມ​ຂອງ​ປະຊາຊົນ ເຊິ່ງໃນ​ປີ 2016 ມີ​ນັກ​ທ່ອງ​ທ່ຽວປະມານ 4,2 ລ້ານ ເຂົ້າ​ມາ​ທ່ຽວຊົມ​ຢູ່ ​ສປປ ລາວ ສາມາດ​ສ້າງລາຍ​ຮັບ​ຫຼາຍ​ກວ່າ 724 ລ້ານໂດ​ລາ​ສະຫະລັດ ຫຼື ປະມານ 5.792 ຕື້​ກີບ.

ກະຊວງ​ຖະແຫຼງ​ຂ່າວ ວັດ​ທະນະ​ທຳ ແລະ ທ່ອງ​ທ່ຽວ ໄດ້​ຮັບກຽດ​ເປັນ​ເຈົ້າພາບ ຈັດ​ສຳ​ມະ​ນາລະດັບ​ພາກ​ພື້ນ ສຳລັບ​ປະເທດກຳປູເຈຍ ລາວ ມຽນ​ມາ ຫວຽດນາມ + ໄທ ເພື່ອ​ກຳນົດ​ທິດ​ທາງ ແລະ ຍຸດ​ທະ​ສາດ​ການ​ຮ່ວມ​ມືລະຫວ່າງພາກ​ລັດ ແລະ ພາກເອກະ​ຊົນ​ໃນ​ຂະແໜງການ​ທ່ອງທ່ຽວ (CLMV+T) ຢູ່​ນະຄອນຫຼວງ​ວຽງ​ຈັນ ລະຫວ່າງ​ວັນ​ທີ 3-4 ພຶດສະພາ 2017 ໂດຍ​ການເປັນ​ປະທານ​ຂອງທ່ານ ສະຫວັນຄອນ ຣາຊ​ມຸນ​ຕີຣ ຮອງ​ລັດ​ຖະມົນຕີ​ກະຊວງ ຖວທ ມີ​ບັນດາ​ຜູ້ຕາງໜ້າ​ຈາກ 4 ປະເທດ ອົງການຈັດຕັ້ງ​ສາກົນ ກ່ຽວຂ້ອງ​ເຂົ້າຮ່ວມ.

ສຳ​ມະ​ນາ​ຄັ້ງ​ນີ້ ມີ​ເປົ້າ​ໝາຍສຳຄັນ​ເພື່ອ​ແລກປ່ຽນ​ບົດຮຽນ ແລະ ປະສົບ​ການ​ດ້ານ​ການ​ພັດທະ​ນາ​ຂະແໜງ​ການທ່ອງທ່ຽວຂອງ​ບັນດາ​ປະເທດ​ກຳລັງ​ພັດ​ທະນາ ໂດຍ​ສະເພາະແມ່ນ​ການທ່ອງ​ທ່ຽວ​ທີ່​ມີ​ການ​ຮ່ວມ​ມື​ຢ່າງເຂັ້ມແຂງລະຫວ່າງພາກ​ລັດ ແລະ ເອກະ​ຊົນ ເພື່ອ​ຊຸກຍູ້​ການທ່ອງ​ທ່ຽວ​ທາງ​ດ້ານ​ປະຫວັດສາດ ວັດທະນະທຳ ແລະ ທຳ​ມະ​ຊາດທີ່​ເປັນ​ເອກະລັກ ໃນ​ຮູບ​ແບບ​ການພັດທະນາ​ທີ່​ໝັ້ນຄົງ ປະຊາຊົນ​ມີສ່ວນ​ຮ່ວມ ແນໃສ່​ສ້າງ​ລາຍ​ຮັບເຂົ້າ​ທ້ອງຖິ່ນ ກໍ່​ຄືຍົກ​ລະດັບ​ຊີວິດ​ການ​ເປັນ​ຢູ່​ຂອງ​ເຂົາເຈົ້າ​ໃຫ້ນັບ​ມື້​ດີ​ຂຶ້ນ​ເປັນ​ກ້າວໆ.