ຮ່ວມມືສຳຫຼວດວັດແທກ ການສ້າງແຜນທີ່ໃນນະຄອນຫຼວງ

ພິທີ​ເຊັນ​ຂໍ້​ຕົກລົງ​ຮ່ວມ​ມື​ທາງດ້ານ​ວິຊາ​ການ ​ໂຄງການ​ສຳ​ຫຼວດ​ວັດແທກ​ການ​ສ້າງ​ແຜນທີ່ ແລະ ລະບົບ​ຂ່າວສານ​ພູມ​ສາດ ຢູ່​ນະຄອນ​ຫຼວງ​ວຽງ​ຈັນ ລະຫວ່າງ​ພະແນກ​ພາຍ​ໃນ ນະຄອນຫຼວງ​ວຽງຈັນ ແລະ ບໍລິສັດ ສະ​ເປັກ​ໄອລາວ ຈັດ​ຂຶ້ນ​ວັນ​ທີ 2 ພຶດສະພາ 2017 ຢູ່​ຫ້ອງ​ວ່າການ​ປົກຄອງນະຄອນຫຼວງ​ວຽງ​ຈັນ.
ທ່ານ ບຸນ​ໜາ ຜາ​ທຸມ​ມະ​ວົງ ຫົວໜ້າ​ພະ​ແນກ​ພາຍ​ໃນ ນວ ກ່າວ​ວ່າ: ພະ​ແນກ​ພາຍ​ໃນ ນວ ສົມທົບ​ກັບ​ກົມ​ແຜນທີ່​ແຫ່ງ​ຊາດ ແລະ ບໍລິສັດ ສະ​ເປັກ​ໄອ​ລາວ ຮ່ວມ​ກັນ​ຄົ້ນຄວ້າ ແລະ ສຳ​ຫຼວດຈຸດ​ພື້ນ​ທີ່ ເພື່ອ​ກໍ່ສ້າງ​ສະຖານີ ອ້າງ​ອີງ​ການວັດແທກ​ແບບ​ຕໍ່ເນື່ອງ ​ດ້ວຍ​ສັນຍານ​ດາວ​ທຽມ (CORS) ຢູ່​ໃນ​ເຂດ​ເທສະ​ບານເມືອງ​ສັງ​ທອງ ນະຄອນຫຼວງ​ວຽງຈັນ ແລະ ເຫັນ​ດີ​ກ່ຽວ​ກັບ​ການຮ່ວມ​ມື​ທາງ​ດ້ານ​ວິຊາ​ການ ໃນເດືອນມີນາ 2017 ທີ່​ຜ່ານ​ມາ.
ຜົນ​ປະໂຫຍດ​ທີ່​ຈະ​ໄດ້​ຮັບຈາກ​ການ​ຮ່ວມ​ມືແມ່ນ​ມີ​ຫຼາຍດ້ານ​ຄື: ການ​ກໍ່ສ້າງ​ຄວາມ​ເຂັ້ມແຂງ ແລະ ຂີດ​ຄວາມ​ສາມາດໃຫ້​ແກ່​ພະນັກງານ​ພະ​ແນກ​ພາຍໃນ​ຫ້ອງການ​ພາຍ​ໃນ​ເມືອງ 9 ເມືອງ ແລະ ພະແນກການ​ຕ່າງໆທີ່​ກ່ຽວຂ້ອງ ລວມ​ທັງ​ອົງການປົກຄອງ​ບ້ານ ເມືອງ ແລະ ນະຄອນ​ຫຼວງ ຈະ​ໄດ້​ຮັບ​ການ​ຊ່ວຍເຫຼືອ​ທາງ​ດ້ານ​ເຄື່ອງມື​ວັດຖຸ​ອຸປະກອນ ແລະ ພາຫະນະ​ທີ່​ຈຳເປັນ ເພື່ອ​ນຳ​ໃຊ້​ເຂົ້າ​ໃນ​ວຽກ​ງານ​ການສຳ​ຫຼວດ​ວັດແທກ​ການ​ສ້າງ​ແຜນທີ່ ແລະ ລະບົບ​ຂ່າວສານ​ພູມສາດ​ຢູ່ ນວ ນອກ​ນີ້ ຍັງ​ເປັນ​ການສ້າງ​ເງື່ອນໄຂ​ໃຫ້​ນະຄອນຫຼວງວຽງ​ຈັນ ແລະ ພາກສ່ວນ​ທີ່​ກ່ຽວຂ້ອງ ​ສາມາດ​ດຶງ​ດູດ​ເອົາ​ທຶນ​ຊ່ວຍເຫຼືອ​ລ້າຈາກ​ລັດຖະບານ ​ສປ ຈີນ ໂດຍ​ການ​ສ້າງ​ເປັນ​ໂຄງການຕ່າງໆ ເຊັ່ນ: ໂຄງການ​ສ້າງຄວາມ​ເຂັ້ມແຂງ ແລະ ຂີດ​ຄວາມສາມາດ​ໃຫ້​ແກ່​ພະແນກການຫ້ອງການ ແລະ ພະນັກງານ​ທີ່ກ່ຽວຂ້ອງ​ຂັ້ນ​ບ້ານ ເມືອງ ແລະ ນະຄອນຫຼວງ​ວຽງ​ຈັນ ໂຄງການແກ້​ໄຂ​ບັນຫາ​ເຂດ​ແດນ​ເຊື່ອມ​ຕໍ່ລະຫວ່າງບ້ານກັບບ້ານ ເມືອງກັບເມືອງ ແລະ ແຂວງກັບນະຄອນ​ຫຼວງ ໂຄງການ​ສ້າງ​ແຜນທີ່​ລະບົບ​ຕົວ​ເລກ ແລະ ແຜນ​ນຳພາທາງ​ໂຄງການ​ສ້າງ​ລະບົບຂ່າວສານ​ພູມ​ສາດ ຢູ່​ນະຄອນຫຼວງ​ວຽງ​ຈັນ ແລະ ໂຄງການອື່ນໆ.
ດັ່ງນັ້ນ ທັງ​ສອງ​ຝ່າຍ​ຈຶ່ງ​ເຊັນຂໍ້​ຕົກລົງ​ຮ່ວມ​ມື​ກັນ ລະຫວ່າງທ່ານ ບຸນ​ໜາ ຜາ​ທຸມ​ມະ​ວົງ ຫົວໜ້າ​ພະ​ແນກ​ພາຍ​ໃນ ນວ ແລະ ທ່ານ ຈານ​ຮົງ​ຍວນ ຜູ້​ຈັດການ ບໍລິສັດ ສະ​ເປັກ​ໄອ​ລາວ ເຊິ່ງ​ມີທ່ານ ບົວ​ສົດ ສຸວັນນະ​ກຸມມານ ຫົວໜ້າ​ກົມ​ແຜນທີ່​ແຫ່ງ​ຊາດ ແລະ ພາກສ່ວນ​ທີ່​ກ່ຽວຂ້ອງ​ທັງສອງ​ຝ່າຍ​ເຂົ້າ​ຮ່ວມ. (ຂ່າວໜັງສືພິມວຽງຈັນໃຫ່ມ)