ລາວ-ຫວຽດນາມ ຮັດແໜ້ນການຮ່ວມມືດ້ານແຮງງານ

ທ່ານ ຄຳ​ແພງ ໄຊ​ສົມ​ແພງ ລັດຖະມົນຕີ​ກະຊວງ​ແຮງ​ງານ ແລະ ສະຫວັດດີ​ການ-ສັງຄົມ ໄດ້ໃຫ້​ສຳພາດ ເນື່ອງ​ໃນ​ໂອກາດ​ສະເຫຼີມ​ສະຫຼອງ ວັນ​ເຊັນ​ສົນທິ​ສັນຍາ​ມິດຕະພາບ ແລະ ການ​ຮ່ວມມື ຄົບຮອບ 40 ປີ (18/7/1977-18/7/2017) ແລະ ວັນ​ສ້າງຕັ້ງສາຍ​ພົວພັນ​ການ​ທູດ ລາວ-ຫວຽດນາມ ຄົບຮອບ 55 ປີ (5/9/1962-5/9/2017) ມີ​ເນື້ອໃນ​ບາງ​ຕອນ​ກ່າວ​ວ່າ: ການ​ຮ່ວມມື​ລະຫວ່າງສອງ​ກະຊວງຄື: ກະຊວງ​ແຮງ​ງານ ແລະ ສະ​ຫວັດດີ​ການ-ສັງຄົມ​ຂອງ​ລາວ ແລະ ກະຊວງ​ແຮງ​ງານ-ເສຍ​ອົງຄະ ແລະ ສັງຄົມ​ຫວຽດນາມ ຜ່ານການ​ປະຕິບັດ​ວຽກ​ງານ​ວິຊາ​ສະເພາະ ແລະ ປະຕິບັດ​ສັນຍາການ​ຮ່ວມ​ມື​ລະຫວ່າງ​ສອງ​ປະເທດ ພ້ອມ​ທັງ​ບັນດາ​ສັນຍາ​ທີ່ກ່ຽວ​ກັບ​ການ​ຮ່ວມ​ມື​ດ້ານ​ແຮງງານ ໃນ​ປີ 1995 ເພື່ອ​ເສີມ​ຂະຫຍາຍ​ສາຍ​ພົວພັນ​ມິດຕະພາບ ຄວາມ​ສາມັກຄີ​ແບບ​ພິເສດລະຫວ່າງສອງ​ປະເທດ ແລະ ການຮ່ວມ​ມືທີ່​ຕ່າງ​ຝ່າຍ​ຕ່າງ​ມີ​ຜົນ​ປະໂຫຍດ ຕາມ​ຫຼັກການ​ສະເໝີພາບ ເຄົາລົບ​ອະທິປະ​ໄຕເຊິ່ງ​ກັນ ແລະ ກັນ ບົນ​ພື້ນຖານ​ຄວາມຮຽກຮ້ອງ​ຕ້ອງການດ້ານ​ການພັດທະນາ​ຂອງ​ແຕ່​ລະ​ປະເທດ ວັນ​ທີ 29 ມິຖຸນາ 1995 ລັດ​ຖະບານ​ສອງ​ປະເທດ ​ໄດ້​ເຊັນ​ສັນຍາວ່າ​ດ້ວຍ​ການ​ຮ່ວມ​ມື​ດ້ານ​ແຮງງານ ລາວ-ຫວຽດນາມ ໃນ​ຂະນະ​ດຽວ​ກັນ ​ເພື່ອ​ຕອບ​ສະໜອງກັບ​ການ​ພັດທະນາ​ເສດຖະກິດ-ສັງຄົມຂອງ​ສອງ​ປະເທດໃນ​ແຕ່ລະ​ໄລຍະ ລັດຖະບານ​ສອງ​ປະເທດ​ ໄດ້​ເຊັນ​ອະນຸ​ສັນຍາກ່ຽວ​ກັບການ​ດັດແປງ ແລະ ເພີ່ມ​ເຕີມສັນຍາ​ຮ່ວມ​ມື​ດ້ານ​ແຮງ​ງານ ວັນທີ 8 ເມສາ 1999 ແລະ ໄດ້​ປັບປຸງ​ຄືນ​ສັນຍາວ່າ​ດ້ວຍການຮ່ວມ​ມື​ດ້ານ​ແຮງ​ງານລາວ-ຫວຽດນາມ ໃນ​ປີ  2013.

ບົນ​ພື້ນຖານ​ການຈັດຕັ້ງ​ປະຕິ​ບັດສັນຍາ​ສະບັບ​ດັ່ງກ່າວ​ນັ້ນ ແຕ່​ລະ​ປີ​ລາວ​ໄດ້​ຮັບ​ເອົາ​ແຮງງານ​ຊາວ​ຫວຽດນາມ ​ເຂົ້າ​ມາເຮັດ​ວຽກ​ໃນ​ບັນດາ​ໂຄງການ​ລົງທຶນ​ຮ່ວມ​ມື​ຂອງ​ສອງ​ປະເທດ ແລະ ກໍ່​ມີແຮງ​ງານ​ລາວ​ຈຳນວນໜຶ່ງ​ໄດ້​ໄປ​ເຮັດ​ວຽກ ແລະ ປະກອບ​ອາຊີບຢູ່ ​ສສ ຫວຽດນາມ ໂດຍ​ສະເພາະແມ່ນ​ຢູ່​ຕາມ​ບັນດາ​ແຂວງ​ທີ່​ມີ​ຊາຍ​ແດນ​ນຳ​ກັນ ແລະ ສຳລັບ​ວຽກ​ງານ​ຮ່ວມ​ມືການ​ພັດທະນາ​ສີມື​ແຮງ​ງານ ແລະ ເຝິກ​ວິຊາ​ຊີບ​ກໍ່​ໄດ້​ຮັບ​ການຊຸກຍູ້​ຈັດ​ຕັ້ງ​ປະຕິບັດ ໂດຍ​ຜ່ານບັນດາ​ກິດຈະກຳ​ຕ່າງໆ ເຊັ່ນ: ການ​ທັດສະນະ​ລົງ​ເກັບ​ກຳ​ຂໍ້​ມູນຕົວ​ຈິງ ເພື່ອ​ແນໃສ່​ແລກປ່ຽນ​ບົດຮຽນ ແລະ ປະສົບ​ການຂອງການ​ເຝິກ​ວິຊາ​ຊີບ ການ​ເຝິກ​ຄູ​ສີມື​ແຮງ​ງານ ການ​ກະກຽມ​ໃຫ້​ແກ່ຜູ້​ເຂົ້າ​ແຂ່ງຂັນຊ່າງ​ສີມື​ແຮງງານ​ອາ​ຊຽນ ພ້ອມ​ກັນ​ນັ້ນ ແຕ່ລະ​ປີ​ພະນັກງານ​ວິຊາ​ການ​ຂອງຂະແໜງ ​ຮສສ ຍັງ​ໄດ້​ເຂົ້າ​ຮ່ວມກິດຈະກຳ​ການເຄື່ອນໄຫວ​ຂອບການ​ຮ່ວມ​ມື ລະຫວ່າງ​ບັນດາ​ປະເທດ​ລຸ່ມ​ແມ່ນ້ຳ​ຂອງ ​ທັດສະນະສຶກ​ສາ​ຢ້ຽມຢາມ ແລະ ລົງ​ເກັບກຳ​ຂໍ້​ມູນ​ຕົວ​ຈິງກ່ຽວ​ກັບ​ພື້ນຖານການ​ເຝິກ​ວິຊາ​ຊີບຢູ່ ​ສສ ຫວຽດນາມ ເບິ່ງ​ລວມ​ແລ້ວ ວຽກ​ງານຮ່ວມ​ມື​ດ້ານ​ແຮງ​ງານລະຫວ່າງສອງ​ປະເທດ ​ນັບ​ມື້​ນັບ​ໄດ້​ຮັບ​ການເອົາໃຈໃສ່ ແລະ ສ້າງ​ເງື່ອນໄຂໃນ​ຫຼາຍ​ດ້ານ.

ສຳລັບ​ປີ 2017 ມີແຮງ​ງານຫວຽດນາມ​ເຂົ້າ​ມາ​ເຮັດ​ວຽກຢູ່ ​ສປປ ລາວ ທັງ​ໝົດ 2.752 ຄົນ ຖ້າ​ທຽບໃສ່ປີ 2016 ແມ່ນ​ຫຼຸດລົງ ປີ 2016 ມີ 3.743 ຄົນ. (ຫນັງສືພິມວຽງຈັນໃຫ່ມ)