ສັ່ງໂຈະ! ໂຮງງານ 1 ແຫ່ງໃນວິຕ້າພາກ ຫຼັງກະທົບຕໍ່ສິ່ງແວດລ້ອມໜັກໜ່ວງ

ບັນຫາສິ່ງແວດລ້ອມກາຍເລື່ອງສຳຄັນທີ່ລັດຖະບານໃຫ້ຄວາມເອົາໃຈໃສ່ບໍ່ແພ້ຂະແໜງອື່ນ, ເຊິ່ງຫຼ້າສຸດ ໂຮງງານຫຼອມໝໍ້ໄຟເກົ່າໃນເຂດນິຄົມອຸດສາຫະກຳ ​ແລະ ການ​ຄ້າ ວຽງຈັນ-ໂນນທອງ (ວິຕ້າ ພາກ), ທີ່ນຳເອົາຊິ້ນສ່ວນຂອງໝໍ້ໄຟເກົ່າມາຫຼອມໃໝ່ ເພື່ອສົ່ງອອກແຕ່ປີ 2014 ໃນທີ່ສຸດກໍ່ໄດ້ສັ່ງໂຈະຊົ່ວຄາວ ເພື່ອໃຫ້ທາງໂຮງງານປັບປຸງບັນຫາສົ່ງກິ່ນເໝັນລົບກວນປະຊາຊົນອ້ອມຂ້າງ.

ທ່ານ ທອງຂັນ ວົງພະຈັນ, ຮອງ​ປະທານ​ເຂດ​ນິຄົມ​ອຸດສາຫະກຳ ​ແລະ ການ​ຄ້າ ວຽງ​ຈັນ​-​ໂນນ​ທອງ ກ່າວ​ວ່າ: ລັດຖະບານ​ໄດ້​ສັ່ງ​ໂຈະ​ໂຮງງານ​ຫຼອມ​ໝໍ້​ໄຟ​ທີ່​ເປັນ​ນັກ​ລົງທຶນ​ຕ່າງປະ​ເທດໃນ​ເຂດວຽງ​ຈັນ-​ໂນນ​ທອງ ຊົ່ວຄາ​ວນັບ​ແຕ່​ປີ 2016 ​ເປັນ​ຕົ້ນ​ມາ ​ພາຍຫຼັງ​ທີ່​​ໂຮ​ງງານ​ດັ່ງກ່າວ​ໄດ້​ຜະລິດ​ພຽງ​ແຕ່ 2 ປີ​ເທົ່າ​ນັ້ນ ສາເຫດ​​ຍ້ອນບໍ່ສາມາດກຳຈັດ​ບັນຫາ​ກິ່ນ​ທີ່​ເໝັນ​ໄດ້ ​​ເຖິງ​ວ່າ​ຈະ​ມີ​ຄວາມ​ພະຍາຍາມ​ຕໍ່​ທໍ່ຄວັນ​ໃຫ້​ສູງ​ຂຶ້ນ​ກວ່າ​ເກົ່າ​, ແຕ່​ກໍ່​ຍັງ​ສົ່ງ​ກິ່ນ​ເໝັນລົບ​ກວນ​ປະຊາຊົນ​ອ້ອມ​ຂ້າງ 3 ບ້ານ​ຄື: ບ້ານ​​ໂຄກ​ສະອາດ, ​ໄຊ​ສົມບູນ ​ແລະ ບ້ານ​ຫົວ​ຊຽງ.

​ໄລຍະ​ຜ່ານ​ມາ, ພາຍຫຼັງ​ທີ່​ໄດ້​ຮັບ​ສຽງ​ຈົ່ມ​ວ່າຈາກ​ປະຊາ​ຊົນ 3 ບ້ານ ລັດຖະບານ​ກໍ່​ໄດ້​ແຕ່ງ​ຕັ້ງຫຼາຍພາກ​ສ່ວນ​ລົງ​ມາ​ຕິດຕາມ​ເຮັ​ດວຽກ​ກັບ​ເຂດ​ນິຄົມ​ອຸດສາຫະກຳ ວຽງ​ຈັນ-​ໂນນ​ທອງ ​ເພື່ອຊອກ​ຫາ​ວິທີ​ແກ້​ໄຂຫຼາຍຝ່າຍ​ ຈົນ​ໃນ​ທີ່​ສຸດ​ກໍ່​ໄດ້​ສັ່ງ​ໂຈະ​ໂຮງງານ​ດັ່ງກ່າວ​ຊົ່ວຄາວ​ຈົນ​ກວ່າ​ຈະ​ແກ້​ໄຂ​ໄດ້ ຫຼື ອາດ​ຈະ​ມີ​ການ​ໂຈະ​ແບບ​ຖາວອນ.

​ການ​ສັ່ງ​​ໂຈະໂຮງງານ​ຫຼອມ​ໝໍ້​​ໄຟ ບໍ່​ແມ່ນ​ໂຮງງານ​ທຳ​ອິດ​ທີ່​ລັດຖະບານ​ສັ່ງ​​ໂຈະ​, ແຕ່​ກ່ອນ​ໜ້າ​ນັ້ນ​ປະມານ​ທ້າຍ​ປີ 2016 ຫາຕົ້ນ​ປີ 2017 ກໍ່​ມີ​ໂຮ​ງງານ​ອົບ​ຂີ້​ເບຍ​ເຂດ​ບ້ານ​ນາ​ຄວາຍ, ​ເມືອງ​ໄຊ​ເຊ​ດຖາ, ນະຄອນຫຼວງ​ວຽງ​ຈັນ​​ ​ຖະໜົນ 450 ປີ ​ໃກ້​ກັບ​ເຂດ​ ວຽງ​ຈັນ-​ໂນນ​ທອງ ທີ່​ສົ່ງ​ກິນ​ເໝັນ​ລົບ​ກວນ​ປະຊາຊົນ​ໃນ​ທີ່​ສຸດ​ລັດຖະບານ​ກໍ່​ໄດ້​ສັ່ງ​ປິດ​ໂຮງງານ​ແບບ​ຖາວອນ.

ນິຄົມອຸດສາຫະກຳ ​ແລະ ການ​ຄ້າ ວຽງ​ຈັນ-​ໂນນ​ທອງ ຕັ້ງ​ຢູ່​ຫຼັກ 22 ບ້ານ​ໂນນ​ທອງ, ​ເມືອງ​ໄຊ​ທານີ ​ເຊິ່ງນັກ​ລົງທຶນ​ໃຕ້​ຫວັນ​ເຂົ້າ​ມາ​ພັດທະນາແມ່ນ​ເຂດ​ໜຶ່ງ​​ໃນ 12 ​ເຂດ​​ເສດຖະກິດ​ພິ​ເສດ ​ແລະ ​ເຂດ​ເສດຖະກິດ​ສະ​ເພາະ ທີ່​ລັດຖະບານ​ຕັ້ງ​ຄວາມ​ຫວັງ​ສູງ​ທັງ​ເລື່ອງ​ການ​ຜະລິດ​ສິນຄ້າ​ເພື່ອສົ່ງ​ອອກ, ການ​ບໍລິການ, ກາ​ນຄ້າ ​ແລະ ​ເປັນ​ບ່ອນ​ສ້າງ​ວຽກ​ເຮັ​ດງານ​ທຳ​ໃຫ້​ກັບ​ປະຊາຊົນ​ເຂດ​ໃກ້​ຄຽງ ​ແລະ ​ແຮງ​ງານທີ່​ເຂົ້າ​ມາ​ໃນ​ນະຄອນຫຼວງ​ວຽງ​ຈັນ.

ທ່ານ ທອງຂັນ ວົງພະຈັນ

ປັດຈຸບັນ ມີ​ບໍລິສັດ​ເຂົ້າມາ​ລົງທຶນ​ໃນເຂດ​ດັ່ງກ່າວ​ແລ້ວ​ 53 ບໍລິສັດ ລວມທຶນ​ຈົດ​ທະບຽນ 65,963 ລ້ານ​ໂດ​ລາ​ສະຫະລັດ ​ໄດ້​ທຳ​ການ​ຜະລິດ​​ເພື່ອ​ສົ່ງ​ອອກ​ແລ້ວ 23 ບໍລິສັດ ກຽມ​ດຳ​ເນີນ​ອີກ 3 ບໍລິ​ສັດ, ກຳລັງ​ມີ​ກໍ່ສ້າງ​ໂຮງງານ​ຕື່ມ​ອີກ​ປະມານ 2-3 ບໍລິສັດ, ມູນ​ຄ່າ​ຂອງ​ການ​ນຳ​ເຂົ້າ 85,573 ກວ່າລ້ານ​ໂດ​ລາ​ສະຫະລັດ ​ແລະ ມູນ​ຄ່າ​ການ​ສົ່ງ​ອອກ 80,355 ລ້ານ​ໂດ​ລາ​ສະຫະລັດ ສາມາດ​ສ້າງ​ວຽກ​ເຮັ​ດງານ​ທຳ​ໃຫ້​ກັບ​ປະຊາຊົນ​ອ້ອມ​ຂ້າງ​ໄດ້ 2,000 ກວ່າ​ຄົນ​ ຄາດ​ວ່າ​ປີ 2017-2018 ຈະ​ສ້າງ​ວຽກ​ເຮັ​ດງານ​ທຳ​ໃຫ້​ກັບ​ປະຊາຊົນ​​ເຖິງ 3,000 ກວ່າ​ຄົນ.