ທຳລາຍສິນຄ້າປະເພດຕ້ອງຫ້າມ ແລະ ໝົດອາຍຸ
ໃນໄລຍະບຸນອອກພັນສາ
ແລະ ບຸນປະເພນີຊ່ວງເຮືອວັດຈັນ ປະຈຳປີ 2017 ພະແນກອຸດສາຫະກຳ ແລະ
ການຄ້າ ນະຄອນຫຼວງວຽງຈັນ
ໄດ້ລົງຕິດຕາມກວດກາການຈຳໜ່າຍສິນຄ້າທີ່ບໍ່ປອດໄພ ບໍ່ໄດ້ມາດຕະຖານ
ເຈືອປົນ ຫຼື ໝົດອາຍຸ ການບໍລິໂພກ ເຊິ່ງສາມາດຢຶດສິນຄ້າປະເພດໝາກກະໂພກ
ດອກໄມ້ໄຟ ຢາສູບຕ່າງປະເທດ ທີ່ບໍ່ຕິດສະແຕັມເສຍພາສີ ສິນຄ້າໝົດອາຍຸ
ແລະ ອື່ນໆ ທີ່ມີລັກສະນະເປັນວັດຖຸລະເບີດ.ໃນວັນທີ 13 ຕຸລາ 2017 ພະແນກອຸດສາຫະກຳ ແລະ ການຄ້າ ນວ ຈຶ່ງໄດ້ຈັດພິທີຈູດທຳລາຍສິນຄ້າປະເພດດັ່ງກ່າວ ທີ່ສາມາດຢຶດມາໄດ້ຈາກຊາວຄ້າຂາຍທີ່ກອງພັນໃຫຍ່ 497 ເປັນກຽດເຂົ້າຮ່ວມຂອງທ່ານນາງ ສົມເພັດ ອາລຸນທອງ ຫົວໜ້າຂະແໜງການຄ້າພາຍໃນ ພະແນກອຸດສາຫະກຳ ແລະ ການຄ້າ ນວ ມີຕາງໜ້າຈາກກະຊວງ ແລະ ຂະແໜງການທີ່ກ່ຽວຂ້ອງເຂົ້າຮ່ວມ.
ສຳລັບສິນຄ້າທີ່ນຳມາທຳລາຍຖິ້ມຄັ້ງນີ້ປະກອບມີ: ໝາກກະໂພກ ດອກໄມ້ໄຟ ຈຳນວນ 1.302 ກິໂລກຣາມ ມູນຄ່າ 65 ລ້ານກວ່າກີບ ສິນຄ້າໝົດອາຍຸ ຈຳນວນ 652 ກິໂລກຣາມ ມູນຄ່າ 19 ລ້ານກວ່າກີບ ແລະ ຢາສູບທີ່ບໍ່ຕິດສະແຕັມເສຍພາສີ-ອາກອນ ຈຳນວນ 100 ຊອງມູນຄ່າ 7 ລ້ານກີບ ລວມມູນຄ່າທັງໝົດ 91.575.000 ກີບ.
ໃນໂອກາດນີ້ ທ່ານນາງ ສົມເພັດ ອາລຸນທອງ ໄດ້ຮຽກຮ້ອງໃຫ້ພາກສ່ວນທີ່ກ່ຽວຂ້ອງທີ່ປະຈຳຢູ່ດ່ານ ເປັນຕົ້ນແມ່ນພາສີ ແລະ ຕຳຫຼວດໃຫ້ເອົາໃຈໃສ່ ແລະ ສະກັດກັ້ນສິນຄ້າຕ້ອງຫ້າມ ປະເພດດັ່ງກ່າວບໍ່ໃຫ້ມີການຈຳໜ່າຍຢູ່ບ້ານເຮົາ ພ້ອມທັງຮຽກຮ້ອງໃຫ້ອົງການປົກຄອງເມືອງບ້ານ ປກສ ກຸ່ມບ້ານ ແລະ ທະຫານ ເອົາໃຈໃສ່ສຶກສາອົບຮົມ ແລະ ກ່າວເຕືອນກຸ່ມເປົ້າໝາຍທີ່ຈຳໜ່າຍສິນຄ້າຕ້ອງຫ້າມ ແລະ ປະຕິບັດມາດຕະການຢ່າງເຂັ້ມງວດຕໍ່ຜູ້ທີ່ລະເມີດ.
ທຳລາຍສິນຄ້າປະເພດຕ້ອງຫ້າມ ແລະ ໝົດອາຍຸ
![]()
Reviewed by makarow
on
6:21:00 PM
Rating:
