ກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 49 ແລະ ກອງປະຊຸມປີ່ນອ້ອມສຳຄັນ

 
  ກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 49 ແລະ ກອງປະຊຸມປີ່ນອ້ອມສຳ ຄັນທີ່ ສປປລາວ ເປັນເຈົ້າພາບຈັດຂື້ນໃນລະຫວ່າງວັນທີ 21 ຫາ 26 ກໍລະກົດ 2016 , ທີ່ນະຄອນຫລວງວຽງຈັນ ອັດລົງດ້ວຍຜົນສໍາເລັດຢ່າງຈົບງາມ. ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ໄດ້ຖະແຫຼງຕໍ່ຜົນສຳເລັດໃນການເປັນເຈົ້າພາບຄັ້ງນີ້ວ່າ: ກອງປະຊຸມຄັ້ງນີ້ ໄດ້ປຶກສາຫາລືຫຼາຍບັນຫາສຳຄັນ ເປັນຕົ້ນບັນຫາດ້ານການເມືອງ, ຄວາມໝັ້ນຄົງ ແລະ ການຮ່ວມມືເພື່ອການພັດ ທະນາພາຍໃນອາຊຽນ ແລະ ລະຫວ່າງອາຊຽນ ແລະ ຄູ່ຮ່ວມເຈລະຈາ ແລະ ຄູ່ຮ່ວມພາຍນອກຢ່າງມີໝາກຜົນ. ກອງປະຊຸມໄດ້ຮັບຮອງຖະແຫລງການຂອງລັດຖະມົນຕີຕ່າງປະເທດອາຊຽນ ເພື່ອ ຢ້ຳຄືນຄວາມໝາຍຄວາມສຳຄັນຂອງສົນທິສັນຍາສະບັບນີ້ ເຊິ່ງເປັນກົດແຫ່ງການປະພຶດ ທີ່ສຳຄັນສຳລັບການດຳເນີນການພົວພັນລະຫວ່າງລັດ ແລະ ພາກພື້ນ ແລະ ການສົ່ງເສີມການຮ່ວມມືລະຫວ່າງອາຊຽນກັບພາຍນອກ ເພື່ອສົ່ງເສີມສັນຕິພາບ ແລະ ການພັດທະນາໃນພາກພື້ນ. ກອງປະຊຸມຍັງໄດ້ມີຄວາມຍິນ ດີທີ່ຫລາຍປະເທດໄດ້ຮັບຮູ້ສົນທິສັນຍາດັ່ກ່າວ ແລະ ເຫັນດີຮັບຮອງເອົາ 4 ປະເທດ ຄື: ຈີເຣ, ເອຢິບ, ອີຣານ ແລະ ມາລົບ ເຂົ້າເປັນພາຄີຂອງສົນທິສັນຍານີ້. ກອງປະຊຸມໄດ້ອອກຖະແຫລງການຮ່ວມຂອງລັດຖະມົນຕີຕ່າງ ປະເທດອາຊຽນ ວ່າດ້ວຍການຮັກສາສັນຕິພາບ ແລະ ສະຖຽນລະພາບໃນພາກພື້ນ. ລັດ ຖະມົນຕີຕ່າງປະເທດອາຊຽນ ຈະສືບຕໍ່ຮັດແໜ້ນການຮ່ວມມືກັບຄູ່ເຈລະຈາ ກໍຄືການຮັດ ແໜ້ນກັບຄູ່ຮ່ວມມືພາຍນອກອື່ນໆ ຜ່ານບັນດາກົນໄກທີ່ອາຊຽນເປັນຜູ້ລິເລີ່ມເຊັ່ນ: ອາຊຽນບວກ 1, ອາຊຽນບວກ 3; ກອງປະຊຸມລັດຖະມົນຕີປ້ອງກັນປະເທດອາຊຽນບວກ, ເວທີພາກພື້ນອາຊຽນ ແລະ ກອງປະຊຸມສຸດຍອດອາຊີຕາເວັນອອກ ເພື່ອຜົນປະໂຫຍດຮ່ວມກັນ ພ້ອມທັງຮັດແໜ້ນຄວາມເປັນແກນກາງຂອງອາຊຽນ ໃນບັນດາກົນໄກເຫລົ່ານັ້ນ ແລະ ໃນໂຄງສ້າງພາກພື້ນທີ່ພວມຜັນແປ ໃນນີ້ ເຫັນດີຮັບຮອງເອົາເຢຍລະມັນ ເປັນຄູ່ຮ່ວມພັດທະ ນາ ແລະ ສະວິດເປັນຄູ່ຮ່ວມຂະແໜງການ. ລັດຖະມົນຕີອາຊຽນໄດ້ຮັບຮອງຖະແຫລງການຮ່ວມຂອງກອງປະຊຸມລັດຖະມົນຕີຕ່າງປະເທດອາຊຽນຄັ້ງທີ 49. ບັນດາລັດຖະມົນຕີຕ່າງປະເທດອາຊຽນໄດ້ພົບປະກັບຄູ່ຮ່ວມຕຳແໜ່ງຈາກ 10 ປະເທດຄູ່ເຈລະຈາ ໃນແຕ່ລະກອງປະຊຸມລັດຖະມົນຕີຕ່າງປະເທດ ກັບຄູ່ຮ່ວມເຈລະຈາບວກ ເຊັ່ນ: ອົດສະຕຣາລີ, ການາດາ, ຈີນ, ສະຫະພາບເອີຣົບ, ອິນເດຍ, ຍີ່ປຸ່ນ, ນູແວເຊລັງ, ສ ເກົາຫລີ, ສະຫະພັນຣັດເຊຍ ແລະ ສະຫະລັດອາເມລິກາ ໄດ້ທົບທວນຄືນຄວາມຄືບໜ້າຂອງການຮ່ວມມືລະຫວ່າງອາຊຽນ ແລະ ຄູ່ເຈລະຈາໃນໄລຍະຜ່ານມາ ພ້ອມທັງໄດ້ກຳນົດ ທິດທາງໃນອະນາຄົດ ເພື່ອການຮັດແໜ້ນການຮ່ວມມືໃນທຸກຂະແໜງການໃຫ້ໃກ້ຊິດກວ່າເກົ່າເຊັ່ນ: ການຄ້າ, ການລົງທຶນ, ການເຊື່ອມຈອດ, ການທ່ອງທ່ຽວ ແລະ ການໄປມາຫາ ສູ່ລະຫວ່າງປະຊາຊົນ. ບັນດາລັດຖະມົນຕີຕ່າງປະເທດອາຊຽນໄດ້ພົບປະກັບຄູ່ຮ່ວມຕຳແໜ່ງພາຍໃຕ້ຂອບການຮ່ວມມືອາຊຽນບວກ 3 ເຊິ່ງໄດ້ຢ້ຳຄືນຄວາມໝາຍໝັ້ນ ເພື່ອສົ່ງເສີມກົນໄກອາຊຽນບວກ 3 ເຊິ່ງເປັນກົນໄກສຳຄັນ ເພື່ອໄປສູ່ການສ້າງປະຊາຄົມເສດຖະກິດອາຊີຕາເວັນອອກ ໃນໄລຍະຍາວ. ພ້ອມທັງປຶກສາຫາລືບັນດາກິດຈະກຳ ເພື່ອສະເຫລີມສະຫລອງ ການຮ່ວມມືອາຊຽນ+3 ຄົບຮອບ 20 ປີ ໃນປີ 2017. ໃນຖານະເປັນປະທານອາຊຽນ ແລະ ປະ ທານອາຊຽນບວກ 3, ລາວ ໄດ້ສະເໜີຮ່າງຖະແຫລງການວ່າດ້ວຍການສົ່ງເສີມການຮ່ວມມື ເພື່ອການພັດທະນາແບບຍືນຍົງ ທີ່ຈະຖືກຮັບຮອງໃນກອງປະຊຸມສຸດຍອດອາຊຽນບວກ 3 ຄັ້ງທີ 19 ໃນເດືອນກັນຍາ 2016 ທີ່ນະຄອນຫລວງວຽງຈັນ, ເຊິ່ງຂໍ້ສະເໜີດັ່ງກ່າວ, ກໍໄດ້ຮັບການສະໜັບໜູນຈາກບັນດາປະເທດສະມາຊິກອາຊຽນບວກ 3 ຢ່າງກວ້າງຂວາງ. ໃນກອງປະຊຸມລັດຖະມົນຕີຕ່າງປະເທດຂອງກອງປະຊຸມສຸດຍອດອາຊີຕາເວັນອອກ ໄດ້ຢໍ້າຄືນຄວາມສຳຄັນຂອງການສ້າງຄວາມເຂັ້ມແຂງໃຫ້ແກ່ກົນດັ່ງກ່າວ ເຊິ່ງເປັນເວທີຜູ້ນຳ ສຳລັບການປຶກສາຫາລືກ່ຽວກັບບັນຫາຍຸດທະສາດການເມືອງ ແລະ ເສດຖະກິດທີ່ມີຄວາມ ເປັນຫ່ວງ ແລະ ສົນໃຈຮ່ວມກັນ ໂດຍມີເປົ້າໝາຍເພື່ອສົ່ງເສີມສັນຕິພາບ, ສະຖຽນລະພາບ ແລະ ຄວາມສົມບູນພູນສຸກໃນອາຊີຕາເວັນອອກ, ໄດ້ປຶກສາຫາລືກ່ຽວກັບທິດທາງເພື່ອຈັດຕັ້ງປະຕິບັດ 6 ຂົງເຂດບຸລິມະສິດ. ກອງປະຊຸມໄດ້ສະແດງການສະໜັບສະໜູນຢ່າງກວ້າງ ຂວາງຕໍ່ຮ່າງຖະແຫລງການວຽງຈັນ ວ່າດ້ວຍການສົ່ງເສີມການຮ່ວມມືເພື່ອພັດທະນາ ພື້ນ ຖານໂຄງຫລ່າງ ໃນອາຊີຕາເວັນອອກ ທີ່ສະເໜີໂດຍ ສປປ ລາວ ແລະ ຈະໄດ້ຮັບຮອງເອົາໂດຍບັນດາ ຜູ້ນຳອາຊີຕາເວັນອອກ ໃນກອງປະຊຸມສຸດຍອດອາຊີຕາເວັນອອກຄັ້ງທີ 11 ໃນເດືອນກັນຍາ 2016 ນີ້ ທີ່ນະຄອນຫລວງວຽງຈັນ. ຖະແຫລງການດັ່ງກ່າວ, ມີຈຸດປະສົງ ເພື່ອລະດົມຄວາມສາມາດຂອງພາກພື້ນໃນການສົ່ງເສີມບັນດາໂຄງການພັດທະ ນາພື້ນຖານໂຄງລ່າງ ເພື່ອກ້າວໄປສູ່ການຮັດແໜ້ນການເຊື່ອມຈອດພາກພື້ນ ອັນເປັນການປະກອບສ່ວນສົ່ງເສີມການພັດທະນາແບບຍືນຍົງ, ການເຕີບໂຕທາງດ້ານເສດຖະກິດ ແລະ ການເຊື່ອມໂຍງພາກພື້ນ. ໃນກອງປະຊຸມເວທີພາກພື້ນອາຊຽນ ກໍໄດ້ຢ້ຳຄືນຄວາມສຳຄັນຂອງເວທີດັ່ງກ່າວ, ເຊິ່ງເປັນເວທີເພື່ອການປຶກສາຫາລືຢ່າງສ້າງສັນ ແລະ ການຮ່ວມມືທາງດ້ານການເມືອງ ແລະ ຄວາມໝັ້ນຄົງທີ່ທຸກຝ່າຍມີຄວາມເປັນຫ່ວງ ແລະ ມີຄວາມສົນໃຈຮ່ວມກັນ, ທັງຢ້ຳຄືນບົດບາດ ຄວາມສຳຄັນ ຂອງເວທີພາກພື້ນອາຊຽນ ໃນການປະກອບສ່ວນຮັບມືກັບບັນ ດາສິ່ງທ້າທາຍຕໍ່ຄວາມໝັ້ນຄົງທີ່ບໍ່ແມ່ນການທະຫານໃຫ້ນັບມື້ເພີ່ມຂຶ້ນ. ລັດຖະມົນຕີເວທີພາກພື້ນອາຊຽນໄດ້ຮັບຮອງເອົາ 23 ກິດຈະກຳສຳລັບສົກປີ 2016-2017 ແລະ ເຫັນດີຮັບຮອງເອົາ 3 ຖະແຫລງ ການ ຄື: ຖະແຫລງການເວທີພາກພື້ນອາຊຽນວ່າດ້ວຍການຮັດ ແໜ້ນການຮ່ວມມື ເພື່ອຄຸ້ມຄອງການ ເຄື່ອນໄຫວຂ້າມຊາຍແດນ ຂອງກຸ່ມອາຊະຍາກອນ, ຖະແຫລງການເວທີພາກພື້ນອາຊຽນ ວ່າດ້ວຍການຮັດແໜ້ນການຮ່ວມມື ລະຫວ່າງບັນດາອົງກອນ ທີ່ຮັບຜິດຊອບການ ບັງຄັບໃຊ້ ກົດໝາຍທາງທະເລ, ຖະແຫລງການລັດຖະມົນຕີເວທີພາກພື້ນອາຊຽນກ່ຽວກັບການກໍ່ການຮ້າຍ. ສປປ ລາວ ໃນນາມປະທານອາຊຽນ ໄດ້ນຳສະເໜີປຶ້ມວິໄສທັດປະຈຳປີຂອງເວທີພາກພື້ນອາຊຽນ 2016 ເຊິ່ງເປັນສະບັບທີ 17 ທີ່ໄດ້ຮວບຮວມເອົາການປະກອບຄຳຄິດຄຳເຫັນ ຈາກບັນດາປະເທດເຂົ້າຮ່ວມເວທີພາກພື້ນອາຊຽນ, ປຶ້ມວິໄສທັດນີ້ ຖືເປັນເອກະສານສຳຄັນເພື່ອ ສົ່ງເສີມຄວາມເຂົ້າໃຈ, ການໄວ້ເນື້ອເຊື່ອໃຈ ແລະ ຄວາມໂປ່ງໃສ ລະຫວ່າງປະເທດຜູ້ເຂົ້າຮ່ວມ ເວທີພາກພື້ນອາຊຽນ. ໃນບັນດາກອງປະຊຸມດັ່ງກ່າວນີ້, ໄດ້ມີການແລກປ່ຽນທັດສະນະຢ່າງເປີດເຜີຍກົງໄປກົງມາ ແລະ ສ້າງສັນກ່ຽວກັບພາກພື້ນ ແລະ ສາກົນ ທີ່ທຸກຝ່າຍມີຄວາມສົນໃຈ ແລະ ເປັນຫ່ວງຮ່ວມກັນ.