ອາຟະການິດສະ­ຖານ ກາຍ­ເປັນສະ­ມາ­ຊິກ WTO

ວັນທີ 29 ກໍ­ລະ­ກົດທີ່ຜ່ານມາ ອາຟະການິດສະ­ຖານ ໄດ້ກາຍເປັນສະ­ມາ­ຊິກອັນດັບທີ 164 ຂອງອົງ­ການການຄ້າໂລກ (WTO) ຢ່າງເຕັມສ່ວນ ຫຼັງຈາກທີ່ໄດ້ສຳ­ເລັດເອ­ກະ­ສານການເຈລະຈາແກ່­ຍາວມາເປັນເວ­ລາ 12 ປີ. ອາຟະການິດສະ­ຖານ ໄດ້ຍື່ນຄຳຮ້ອງຂໍເປັນສະ­ມາ­ຊິກ WTO ເມື່ອປີ 2004 ແລະ ຂະບວນການເຈລະ­ຈາເຂົ້າເປັນສະມາຊິກຂອງອົງ­ການນີ້ໄດ້ສິ້ນສຸດລົງເມື່ອເດືອນພະ­ຈິກ ປີ 2015 ບັນ­ດາສະ­ມາ­ຊິກຂອງ WTO ໄດ້ຮັບ­ຮອງການຮັບເອົາອາຟະການິດສະ­ຖານ ຢູ່ໃນກອງປະ­ຊຸມລັດຖະມົນ­ຕີ WTO ຊຶ່ງຈັດຂຶ້ນທີ່ນະຄອນຫຼວງໄນໂຣບີ (ປະ­ເທດເຄນຢາ) ເມື່ອວັນທີ 17 ທັນ­ວາ 2015. ອາຟະການິດສະ­ຖານ ເປັນປະເທດທີ 9 ໃນກຸ່ມບັນ­ດາປະ­ເທດພັດ­ທະ­ນາຊັກຊ້າ ທີ່ເຂົ້າເປັນສະມາຊິກ WTO ນັບແຕ່ອົງ­ການນີ້ ໄດ້ຮັບການສ້າງ­ຕັ້ງເມື່ອປີ 1995 ເປັນ­ຕົ້ນມາ. WTO ໄດ້ຮັບການສ້າງ­ຕັ້ງເມື່ອວັນທີ 1 ມັງ­ກອນ 1995 ໂດຍມີຕົ້ນກຳ­ເນີດ ກໍ່ຄືສັນ­ຍາຮ່ວມກ່ຽວກັບພາ­ສີອາ­ກອນ ແລະ ການຄ້າ (GATT) ເມື່ອປີ 1947 ຊຶ່ງເປັນອົງການ­ຈັດ­ຕັ້ງສາ­ກົນພຽງອົງ­ການດຽວ ທີ່ປະ­ຕິ­ບັດພາລະບົດ­ບາດຕິດ­ຕາມກວດ­ກາການ­ເຄື່ອນ­ໄຫວໃນຂົງ­ເຂດການຄ້າໂລກ ດ້ວຍຈຸດ­ປະ­ສົງຕົ້ນ­ຕໍກໍ່ຄື ຮັບ­ປະ­ກັນການຄ້າເສລີ ແລະ ຍຸ­ຕິທຳຢູ່ໃນເງື່ອນ­ໄຂແກ້ງແຍ່ງ. WTO ຮັບ­ປະ­ກັນການຄຸ້ມຄອງການປະ­ຕິ­ບັດສັນ­ຍາຕ່າງໆຂອງ WTO ເວ­ທີປາໄສການເຈລະ­ຈາກ່ຽວກັບການຄ້າ ແກ້ໄຂກໍ­ລະ­ນີພິພາດກ່ຽວກັບການຄ້າ ຕິດ­ຕາມກວດ­ການະ­ໂຍ­ບາຍການຄ້າຂອງປະ­ເທດຕ່າງໆ ຊ່ວຍ­ເຫຼືອດ້ານເຕັກ­ນິກ ແລະ ເຝິກ­ຊ້ອມໃຫ້ແກ່ບັນ­ດາປະ­ເທດພວມພັດ­ທະ­ນາ ຮ່ວມມືກັບອົງການ­ຈັດ­ຕັ້ງອື່ນໆຂອງສາ­ກົນ.

[post_ad]