ຮັບຮອງຫຼາຍບັນຫາ ໃນການພັດທະນາຕະຫຼາດທຶນ

ກອງ​ປະຊຸມ​ຄະນະ​ກຳມະການຄຸ້ມ​ຄອງ​ຫຼັກ​ຊັບ (​ຄຄຊ) ຄັ້ງ​ທີ III ປະຈຳ​ປີ 2016 ໄດ້​ຈັດ​ຂຶ້ນ​ໃນ​ວັນທີ 27 ທັນວາ 2016 ທີ່​ຫ້ອງ​ປະຊຸມ​ທະນາຄານ​ແຫ່ງ ​ສປປ ລາວ ໂດຍ​ເປັນ​ປະທານ​ຂອງ​ທ່ານ ສົມດີ ດວງ​ດີ ຮອງ​ນາຍົກລັດຖະມົນຕີ ລັດຖະມົນຕີກະຊວງ​ການ​ເງິນ ປະທານ ​ຄຄຊ ມີ​ທ່ານ ສົມ​ພາວ ໄຟ​ສິດ ຜູ້​ວ່າການ​ທະນາຄານ ແຫ່ງ ​ສປປ ລາວ ຮອງ​ປະທານ ​ຄຄຊ ບັນດາ​ສະມາຊິກ ​ຄຄຊ ຫົວໜ້າ​ສຳນັກງານ ​ຄຄຊ ພ້ອມຄະນະ ແລະ ພາກສ່ວນ​ທີ່​ກ່ຽວຂ້ອງ​ເຂົ້າ​ຮ່ວມ​ຢ່າງ​ພ້ອມພຽງ.
ກອງ​ປະຊຸມ​ໃນ​ຄັ້ງ​ນີ້ ໄດ້​ມີ​ການລາຍ​ງານ​ບົດ​ສະຫຼຸບ​ການ​ເຄື່ອນໄຫວ​ວຽກ​ງານ ແລະ ງົບປະມານຂອງ​ສຳນັກງານ ​ຄຄຊ ປະຈຳ​ປີ 2016 ແລະ ທິດ​ທາງ​ແຜນການ​ປີ 2017 ຜ່ານ​ແຜນ​ງົບປະມານ​ຂອງຕະຫຼາດ​ຫຼັກ​ຊັບ​ລາວ ປີ 2017.
ທ່ານ​ນາງ ຈັນ​ສະໝອນ ຈັນທະ​ຈັກ ຫົວໜ້າ​ສຳນັກງານ ​ຄຄຊ ກໍ່​ໄດ້​ນຳ​ສະເໜີ​ວາລະ​ການ​ປຶກສາຫາລື ​ການ​ຂໍ​ອະນຸມັດ​ອອກ​ຈຳໜ່າຍ​ຫຼັກ​ຊັບ​ຢູ່​ຕະຫຼາດ​ຫຼັກ​ຊັບລາວຂອງ 2 ບໍລິສັດຄື: ບໍລິສັດ ພູ​ສີ​ກໍ່ສ້າງ ແລະ ພັດທະນາ​ມະຫາ​ຊົນ ແລະ ບໍລິສັດ ປີ​ໂຕຣລ້ຽມ​ເທຣດ​ດິ້ງ​ລາວ ມະຫາຊົນ ພ້ອມ​ດຽວ​ກັນ​ນັ້ນ ໄດ້​ຜ່ານ​ຮ່າງຂໍ້​ຕົກລົງ​ຂອງ ​ຄຄຊ ຈຳນວນ 4 ສະບັບຄື: ຂໍ້​ຕົກລົງ​ວ່າ​ດ້ວຍ​ການຊື້-ຂາຍ​ຫຼັກ​ຊັບ​ໂດຍ​ບໍ່​ວາງເງິນມັດ​ຈຳ​ລ່ວງ​ໜ້າ ຂໍ້​ຕົກລົງ​ວ່າດ້ວຍ​ການ​ຄຸ້ມ​ຄອງ​ລາຍ​ຮັບ-ລາຍ​ຈ່າຍ​ຂອງ​ສຳນັກງານ ​ຄຄຊ ຂໍ້​ຕົກລົງ​ວ່າ​ດ້ວຍ​ການ​ຈັດ​ຊື້​ຂອງສຳນັກງານ ​ຄຄຊ ແລະ ຂໍ້​ຕົກລົງວ່າ​ດ້ວຍ​ການ​ກວດກາ​ພາຍ​ໃນສຳນັກງານ ​ຄຄຊ ພ້ອມ​ທັງ​ບັນຫາ​ອື່ນໆ ເປັນຕົ້ນ ການ​ແຕ່ງຕັ້ງປ່ຽນ​ແທນ​ຄະນະ ​ຄຄຊ ທີ່​ເຂົ້າ​ຮັບບຳນານ ແລະ ການ​ແຕ່ງຕັ້ງ​ຄະນະ​ກະກຽມ​ບໍລິສັດ ​ລັດ​ວິ​ສາ​ຫະກິດລາວ​ໂທລະ​ຄົມມະນາຄົມ ເປັນ​ບໍລິສັດ​ມະຫາຊົນ.
ທ່ານ ສົມ​ພາວ ໄຟ​ສິດ ຜູ້​ວ່າການ​ທະນາຄານ​ແຫ່ງ ​ສປປ ລາວ ກ່າວ​ວ່າ: ເຖິງ​ວ່າ​ຕະຫຼາດຫຼັກ​ຊັບ​ລາວ ຫາກໍ່​ສ້າງຕັ້ງ​ຂຶ້ນ​ໄດ້ພຽງ​ແຕ່ 6 ປີ ແລະ ໄດ້​ດຳເນີນໃນ​ທ່າມກາງ​ສະພາບ​ການ​ເສດຖະ​ກິດ​ສາກົນ ​ມີ​ການ​ຜັນ​ປ່ຽນຢ່າງ​ສະຫຼັບ​ສັບ​ຊ້ອນ ແຕ່​ຕະຫຼາດທຶນ​ລາວ​ກໍ່​ເຫັນ​ວ່າ​ມີ​ຄວາມ​ສະຖຽນ​ລະ​ພາບ​ພໍ​ສົມຄວນ ສຳເລັດການ​ສ້າງ​ກົດໝາຍ​ວ່າ​ດ້ວຍ​ຫຼັກຊັບ ແລະ ນິຕິ​ກຳ​ລຸ່ມ​ກົດໝາຍວ່າ​ດ້ວຍ​ຫຼັກ​ຊັບ ຈຳນວນ 41 ສະບັບ ເພື່ອ​ເປັນ​ພື້ນຖານ​ໃຫ້​ແກ່ການ​ຄຸ້ມ​ຄອງ​ວຽກ​ງານ​ຫຼັກ​ຊັບ ໄດ້​ຫັນ​ວິ​ສາ​ຫະ​ກິດ​ເປັນ​ມະຫາຊົນ ແລະ ຈົດ​ທະບຽນ​ໃນ​ຕະຫຼາດຫຼັກ​ຊັບ​ຈຳນວນ 5 ບໍລິສັດ ສາມາດ​ລະດົມທຶນ​ໄດ້​ເຖິງ 10.128 ຕື້​ກີບ ເຊັນ MOU ຮ່ວມ​ກັບ​ບັນດາ ​ຄຄຊ ຂອງ ​ສສ ຫວຽດນາມ ໄທ ແລະ ​ສປ ຈີນ ສຳເລັດ​ການສ້າງ​ແຜນ​ຍຸດ​ທະ​ສາດ​ການ​ພັດທະ​ນາ​ຕະຫຼາດ​ທຶນ​ຂອງ ​ສປປ ລາວ ແຕ່ປີ 2016-2025 ແລະ ອື່ນໆ​ອີກ.
ໃນ​ໂອກາດ​ນີ້ ທ່ານ​ຮອງ​ນາຍົກ​ລັດຖະມົນຕີ ປະທານ ​ຄຄຊ ໄດ້​ໃຫ້ການ​ຊີ້​ນຳ​ວ່າ: ເພື່ອ​ສືບຕໍ່ຈັດ​ຕັ້ງ​ປະຕິບັດ​ວຽກ​ງານ​ຄຸ້ມ​ຄອງຫຼັກ​ຊັບ ​ໃຫ້​ໜັກ​ແໜ້ນ​ເຂັ້ມແຂງກວ່າ​ເກົ່າ ພາຍຫຼັງ​ສິ້ນ​ສຸດ​ກອງ​ປະຊຸມ​ຄະນະ​ກຳມະການ​ຄຸ້ມ​ຄອງ​ຫຼັກ​ຊັບ​ຄັ້ງ​ນີ້​ແລ້ວ ມອບ​ໃຫ້​ຮອງ​ປະທານຄະນະ​ກຳມະການ ​ຄຄຊ ແລະ ສຳນັກງານ ​ຄຄຊ ເຊິ່ງ​ເປັນ​ຜູ້ຕາງໜ້າ​ໃຫ້​ພາກສ່ວນ​ກ່ຽວຂ້ອງ​ຕ່າງໆ ​ໃນ​ການ​ພັດທະນາ​ຕະຫຼາດ​ທຶນ ຈົ່ງ​ຮີບ​ຮ້ອນ​ປະສານ​ສົມທົບຜັນ​ຂະຫຍາຍ​ເນື້ອ​ໃນ​ຈິດໃຈ​ກອງ​ປະຊຸມ​ຄັ້ງ​ນີ້ ເປັນ​ໜ້າວຽກ​ລະອຽດ ແລະ ພ້ອມ​ທັງ​ຈັດ​ຕັ້ງ​ປະຕິບັດ​ບັນດາ​ມາດ​ຕະການ​ແກ້​ໄຂ​ຕໍ່​ບັນຫາ​ຄົງ​ຄ້າງ ດ້ວຍ​ຈິດໃຈ​ເປັນ​ເຈົ້າ​ການມີ​ຄວາມ​ຮັບ​ຜິດຊອບ​ສູງໃນ​ການຈັດຕັ້ງ​ປະຕິບັດ ກໍ່​ໃຫ້​ມີ​ການ​ຕິດຕາມ​ກວດກາ ແລະ ສະຫຼຸບ​ຖອດ​ຖອນ​ບົດຮຽນ​ແຕ່​ລະ​ໄລຍະ​ຢ່າງ​ເໝາະ​ສົມ ເພື່ອ​ໃຫ້​ການຈັດຕັ້ງ​ປະຕິບັດ​ມີ​ປະ​ສິດທິ​ຜົນ​ສູງ.(ຂ່າວໜັງສືພິມວຽງຈັນໃຫ່ມ)