ການຜະລິດສະບຽງອາຫານເປັນສິນຄ້າ ຕ້ອງສະອາດ ປອດສານພິດ

ກອງ​ປະຊຸມ​ກະສິກຳ-ປ່າໄມ້ ແລະ ພັດທະນາ​ຊົນນະບົດ ປະຈຳປີ 2016 ໄດ້​ຈັດ​ຂຶ້ນ​ລະຫວ່າງວັນ​ທີ 27-28 ທັນວາ 2016 ທີ່ສູນ (ICTC) ພາຍ​ໃຕ້​ການ​ເປັນປະທານ​ຂອງ​ທ່ານ ລຽນ ທິ​ແກ້ວ ລັດຖະມົນຕີກະຊວງ​ກະສິກຳ ແລະ ປ່າໄມ້ ເປັນ​ກຽດ​ເຂົ້າ​ຮ່ວມໂດຍ​ທ່ານ ທອງ​ລຸນ ສີ​ສຸ​ລິດ ນາຍົກ​ລັດຖະມົນຕີ ມີ​ບັນດາ​ລັດ​ຖະມົນຕີ ຮອງ​ລັດຖະມົນຕີ ບັນດາຮອງ​ເຈົ້າແຂວງ ກົມ ສູນ ພ້ອມພະແນກການ​ທີ່​ກ່ຽວຂ້ອງ​ທົ່ວ​ປະເທດ.
ທ່ານ ລຽນ ທິ​ແກ້ວ ກ່າວ​ວ່າ: ໃນ​ປີ 2016 ນີ້ ມີ​ແຜນການ​ສູ້​ຊົນຜະລິດ​ເຂົ້າເປືອກ​ໃນ​ທົ່ວ​ປະເທດ ໃຫ້​ໄດ້ຜົນ​ຜະລິດ 4,2 ລ້ານ​ໂຕນ ເທົ່າ​ກັບ 100% ຂອງ​ແຜນການທີ່​ວາງ​ໄວ້ ຜ່ານ​ການ​ຈັດ​​ຕັ້ງ​ປະຕິ​ບັດ ​ເຖິງ​ວ່າ​ຈະ​ປະສົບ​ກັບ​ຄວາມຫຍຸ້ງຍາກ​ຫຼາຍ​ດ້ານ ການ​ປ່ຽນແປງ​ດິນ​ຟ້າ​ອາກາດ ສະພາບ​ອາກາດ​ໜາວ ການ​ລະບາດ​ຂອງ​ຕັກແຕນ​ຝູງ​ໄມ້ປ່ອງ ຢູ່​ບັນດາ​ແຂວງພາກ​ເໜືອ ແລະ ສະພາບ​ການນ້ຳ​ຖ້ວມ ນ້ຳ​ປ່າ​ໄຫຼຊຸ​ໃນ​ຫຼາຍໆແຂວງ​ກໍ່​ຕາມ ແຕ່​ຍ້ອນ​ການເຄື່ອນ​ໄຫວ​ຊຸກຍູ້​ຕິດຕາມ ແລະ ສົ່ງເສີມ​ໃນ​ແຕ່​ລະ​ພາກສ່ວນ​ຂອງ​ກະຊວງ​ກະສິກຳ ແລະ ປ່າໄມ້ ຕໍ່ການ​ຜະລິດ​ລະດູແລ້ງ ແລະ ລະດູຝົນ ໂດຍ​ຕິດ​ພັນ​ກັບ​ວຽກ​ງານ 3 ສ້າງ ເຫັນ​ວ່າ​ໄດ້​ມີ​ຂະ​ບວນ​ການຟົດຟື້ນ ແຕ່​ສູນ​ກາງ​ຮອດ​ທ້ອງຖິ່ນ ເຊິ່ງ​ເຫັນ​ໄດ້​ຈາກ​ການ​ຜະລິດ​ເຂົ້າຕົວ​ຈິງ​ທົ່ວ​ປະເທດ ມີ​ເນື້ອທີ່​ປັກ​ດຳໄດ້​ທັງ​ໝົດ 975.215 ເຮັກຕາ ສະເພາະ​ການ​ຜະລິດ​ເປັນ​ສະບຽງອາຫານ​ຫຼັກ​ທີ່​ພົ້ນ​ເດັ່ນ​ແມ່ນພືດຜັກ​ປະເພດ​ຕ່າງໆ ປະຕິບັດ​ໄດ້ 1.700.400 ໂຕນ ບັນລຸ​ໄດ້ 100% ສາລີ​ຫວານໄດ້ 27.950 ໂຕນ ເຜືອກ​ມັນ​ໄດ້ 330.900 ໂຕນ ແລະ ໝາກ​ໄມ້​ປະຕິບັດ​ໄດ້ 1.333.830 ໂຕນ ທຽບໃສ່​ແຜນການ​ແມ່ນ​ປະຕິບັດ​ໄດ້​ລື່ນ​ແຜນ ແລະ ມີ​ສ່ວນ​ແຮ​ໄວ້ ສຳລັບ​ຊີ້ນ ໄຂ່ ແລະ ປາ ແມ່ນ​ໄດ້​ໃນ​ລະດັບ 65 ກິ​ໂລ​ຕໍ່​ຄົນ​ຕໍ່​ປີ ສ່ວນ​ດ້ານການ​ຜະລິດ​ເປັນ​ສິນຄ້າ ເນັ້ນ​ໃສ່ສົ່ງເສີມ​ຜະລິດ​ຕະ​ພັນ ແລະ ສິນຄ້າ​ທີ່​ໄດ້​ປຽບ ແລະ ທີ່​ເປັນຄວາມຕ້ອງການ​ຂອງ​ປະເທດ​ອ້ອມ​ຂ້າງ ເປັນຕົ້ນແມ່ນ​ສາລີ​ແຂງ ປະຕິບັດໄດ້ 1,2 ລ້ານ​ໂຕນ ອ້ອຍ 2,1 ລ້ານ​ໂຕນ ຢາສູບ 66.800 ໂຕນ ມັນຕົ້ນ 2,4 ລ້ານ​ໂຕນ ຖົ່ວດິນ 66.970 ໂຕນ ຖົ່ວເຫຼືອງ 18.340 ໂຕນ ໝາກເດືອຍ 271.000 ໂຕນ ສ່ວນ​ການ​ສົ່ງອອກ​ເຂົ້າສານ​ໄປ​ຕ່າງປະເທດ ທັງ​ໝົດ 20.051 ໂຕນ ໃນ​ນັ້ນ ການ​ສົ່ງ​ອອກ​ເຂົ້າ​ຫອມ​ສະຫວັນໄປ ​ສປ ຈີນ ໄດ້ 4 ພັນ​ໂຕນ.
ກອງ​ປະຊຸມ​ຄັ້ງ​ນີ້ ຈະ​ໄດ້​ສຸມໃສ່​ຄົ້ນຄວ້າ​ບາງ​ບັນຫາ ຕົ້ນຕໍແມ່ນ​ສຸມ​ໃສ່​ຄົ້ນຄວ້າ 4 ໜ້າ​ວຽກ ຕົ້ນຕໍ​ຂອງ​ແຜນ​ງານ​ຄ້ຳປະກັນຄວາມ​ໝັ້ນຄົງ​ດ້ານ​ສະບຽງ​ອາຫານ 8 ໜ້າ​ວຽກ​ຕົ້ນຕໍຂອງ​ການລ້ຽງສັດ ພ້ອມ​ດຽວ​ກັນ​ນັ້ນ ບັນດາ​ຂະແໜງການ​ຂອງ​ສູນ​ກາງ ຍັງ​ຈະ​ຄົ້ນຄວ້າ​ຜັນ​ຂະຫຍາຍ 13 ນະໂຍບາຍ​ກ່ຽວ​ກັບເຂົ້າ-ພືດ ແລະ 8 ນະໂຍບາຍກ່ຽວ​ກັບການ​ລ້ຽງສັດໃຫ້​ເປັນ​ຮູບ​ປະ​ທຳ ຄົ້ນຄວ້າ​ຜັນ​ຂະຫຍາຍ 9 ແຜນງານ ແລະ 42 ແຜນ​ດຳເນີນ​ງານກ່ຽວ​ກັບ​ຍຸດ​ທະ​ສາດ​ການ​ພັດ​ທະນາ​ປ່າໄມ້​ແບບ​ຍືນ​ຍົງ ເປັນຕົ້ນ ການ​ຍົກ​ລະດັບ​ຄວາມ​ປົກ​ຫຸ້ມຂອງ​ປ່າໄມ້ໃຫ້​ໄດ້ 70% ຟື້ນ​ຟູປ່າ​ເສື່ອມ​ໂຊມໃຫ້​ໄດ້ 6 ລ້ານເຮັກຕາ ແລະ ປູກ​ໄມ້​ໃຫ້​ໄດ້ 5 ແສນ​ເຮັກຕາ ໃນ​ປີ 2020 ນອກນັ້ນ ຍັງ​ຄົ້ນຄວ້າ​ຜັນ​ຂະຫຍາຍ​ຂໍ້ຕົກລົງ​ກ່ຽວ​ກັບ​ຈຸດ​ສຸມ​ພັດທະນາ ທີ່​ເປັນ​ບຸລິມະສິດ 2016-2020 ເຂົ້າ​ໃນ​ແຜນ 2017 ຂອງ​ທົ່ວ​ປະເທດ ແລະ ຈັດ​ຕັ້ງ​ປະຕິບັດ​ໃຫ້​ມີຜົນສຳເລັດ ຄົ້ນຄວ້າ​ຜັນ​ຂະຫຍາຍ ຈັດ​ຕັ້ງ​ປະຕິບັດ 9 ວຽກງານ​ກະສິກຳປ່າໄມ້ ທີ່​ຕິດ​ພັນໂດຍ​ກົງ​ກັບ​ວຽກ​ງານ​ພັດທະນາຊົນນະບົດ ແລະ ລຶບລ້າງ​ຄວາມທຸກ​ຍາກ​ ໃນ​ການຈັດຕັ້ງ​ປະຕິບັດແຜນ​ພັດທະນາ​ເສດຖະກິດ-ສັງຄົມ​ແຫ່ງ​ຊາດ.
ໃນ​ໂອກາດ​ດຽວ​ກັນ​ນີ້ ທ່ານນາຍົກລັດຖະມົນຕີ ໃຫ້​ກຽດ​ໂອ້ລົມ​ຕໍ່​ກອງ​ປະຊຸມ ເຊິ່ງ​ໄດ້​ເນັ້ນໜັກ​ເຖິງ​ບັນຫາ​ທີ່​ສຳຄັນ ໂດຍ​ສະເພາະ ທິດ​ພັດທະນາ​ສຳລັບ​ປີ 2017 ແລະ ຊຸມ​ປີ​ຕໍ່ໜ້າ ຕົ້ນຕໍແມ່ນ​ວຽກ​ກະສິກຳ-ປ່າໄມ້ ແລະ ພັດທະນາ​ຊົນນະບົດ​ເປັນ​ວຽກແຖວ​ໜ້າ ເປັນ​ທ່າແຮງ​ອັນ​ໄດ້ປຽບ​ຂອງ​ປະເທດ​ໃນ​ການ​ຜະລິດສະບຽງ​ອາຫານ ເປັນ​ສິນຄ້າ​ກະສິ​ກຳ​ສະອາດ ປອດ​ສານພິດ ຖ້າເຮັດ​ໄດ້​ຄື​ແນວ​ນັ້ນ​ແມ່ນ​ຈະ​ເຮັດໃຫ້​ປະເທດ​ເຮົາ​ມີ​ການ​ປ່ຽນແປງໃໝ່ ແລະ ເຮັດ​ໃຫ້​ທົ່ວ​ໂລກ​ສົນໃຈ ແລະ ຫັນ​ການ​ຜະລິດ​ມີຈຸດ​ສຸມ ມີ​ການ​ກຳນົດ​ເຂດ​ການຜະລິດ​ສະເພາະ ຫັນ​ໄປ​ສູ່​ອຸດ​ສາຫະ​ກຳ​ປຸງ​ແຕ່ງ​ກະສິກຳ ເຮັດ​ໃຫ້ກະສິກຳ​ຕ້ອງ​ເປັນ​ກະສິກຳ​ສະອາດ​ແທ້ ເປັນ​ສີຂຽວ ຕ້ອງ​ກຳນົດສິນຄ້າ​ປາຍ​ແຫຼມ ຈັດ​ຕັ້ງ​ກຸ່ມ​ຜະລິດ ເຮັດ​ໃຫ້ການ​ຜະລິດ​ໃຫຍ່ ເອົາໃຈໃສ່​ເປັນ​ພິເສດ​ໃນ​ການ​ສົ່ງເສີມ​ຫົວໜ່ວຍ​ທຸລະ​ກິດ​ ການ​ຂຸດຄົ້ນ​ແຫຼ່ງ​ທຶນ​ມາ​ນຳ​ໃຊ້​ເຂົ້າ​ໃນການ​ຜະລິດ​ກະສິກຳ ປັບປຸງ​ຕ່ອງໂສ້​ການ​ຜະລິດ​ກະສິກຳ​ຕິດ​ພັນກັບ​ການ​ປຸງ​ແຕ່ງ​ແຕ່​ຫົວທີ ຕ້ອງມີ​ການ​ປະສານ​ງານ​ໃຫ້​ໄວ ​ເມື່ອພົບ​ບັນຫາ​ການ​ຜະລິດ​ສິນຄ້າເຂົ້າ​ເພື່ອ​ສົ່ງ​ອອກ​ໄປ​ຕ່າງປະເທດນັ້ນ ​ຕ້ອງ​ຮັບປະກັນ​ດ້ານ​ຄຸນະພາບ ໄດ້​ມາດຖານ ຈັດ​ຕັ້ງ​ກຸ່ມ​ຜະລິດນຳ​ໃຊ້​ແນວ​ພັນ​ເຂົ້າ​ດຽວ​ກັນ ພ້ອມ​ນີ້​ກໍ່​ໃຫ້​ຊ່ວຍ​ຊາວ​ສວນ​ຢາງພາລາ.