ຕ້ອງເອົາໃຈໃສ່ການພັດທະນາສີມືແຮງງານ ແລະ ຖືເປັນບູລິມະສິດ, ຕ້ອງມີການພັດທະ ນາທາງດ້ານສີມື ແລະ ພັດທະນາຄວາມເຂັ້ມຂອງງານ

ໃນວັນທີ 28 ທັນວາ 2016 ທີ່ຫໍປະຊຸມແຫ່ງຊາດ ໃນໂອກາດທີ່ທ່ານ ທອງລຸນ ສີສຸລິດ ນາຍົກລັດຖະມົນຕີ ໄດ້ໃຫ້ກຽດເຂົ້າຮ່ວມໂອ້ລົມ ໃນກອງປະຊຸມວຽກງານແຮງງານ ແລະ ສະຫວັດດີການສັງຄົມ ເຊິ່ງທ່ານ ນາຍົກ ໄດ້ເນັ້ນໃຫ້ກະຊວງດັ່ງກ່າວ ຖືເອົາວຽກງານພັດທະນາສີມືແຮງງານ ເປັນບູລິມະສິດ ແລະ ຕ້ອງໄດ້ມີການພັດທະນາຢ່າງຮອບດ້ານ ເຊັ່ນ: ພັດທະນາສີມື ແລະ ພັດທະນາ ຄວາມເຂັ້ມຂອງງານ; ພ້ອມດຽວກັນ ຕ້ອງໄດ້ເອົາໃຈໃສ່ປະຕິບັດນະໂຍບາຍຕໍ່ຜູ້ທີ່ມີຜົນງານ, ພະນັກງານບຳນານ, ພະນັກງານນັກຮົບເກົ່າ, ຜູ້ເສຍອົງຄະເສຍສະຫລະ ເພື່ອປະເທດຊາດ ຕ້ອງໄດ້ຮັບນະໂຍບາຍຢ່າງທົ່ວເຖິງ ແລະ ຖືກເປົ້າໝາຍ ໂດຍໃຫ້ເອົາໃຈໃສ່ຕາໜ່າງການເກັບກຳຂໍ້ມູນຢູ່ທ້ອງຖິ່ນ ໃຫ້ຊັດເຈນຂຶ້ນຕື່ມ.

ທ່ານ ທອງລຸນ ສີສຸລິດ ກ່າວວ່າ: ກະຊວງແຮງງານ ແລະ ສະຫວັດດີການສັງຄົມ ເປັນກະຊວງໜຶ່ງທີ່ເຮັດຫລາຍໜ້າວຽກຮັບໃຊ້ສັງຄົມໂດຍກົງ ເຊັ່ນ: ວຽກງານແຮງງານ, ວຽກງານສະຫວັດດີການ ຫລື ວຽກງານນະໂຍບາຍຕ່າງໆ, ວຽກງານເກັບກູ້ລະເບີດ, ວຽກງານກາແດງ ແລະ ວຽກງານໄພພິພັດ ເຊິ່ງລັດ ຖະບານຊຸດນີ້ ກໍ່ໄດ້ມອບວຽກໃຫ້ກະຊວງ, ລັດຖະມົນຕີ ແລະ ຮອງລັດຖະມົນຕີ ທີ່ຮັບຜິດຊອບໂດຍກົງ ທີ່ຂຶ້ນກັບກະຊວງ ເພື່ອບໍ່ຢາກໃຫ້ມີຂອດລະຫວ່າງກາງໃນການເຮັດວຽກ. ສະນັ້ນ, ກະຊວງດັ່ງກ່າວຈຶ່ງໄດ້ເຮັດວຽກສະຫວັດດີການສັງຄົມ ກໍຄືວຽກງານນະໂຍບາຍ, ສະໜອງນະໂຍບາຍຕ່າງໆ ທີ່ພັກ-ລັດວາງອອກ ໃຫ້ແກ່ພະນັກງານ, ນັກຮົບເກົ່າ, ພະນັກງານບຳນານ, ຜູ້ເສຍອົງຄະ ແລະ ໃນນັ້ນຍັງມີວຽກງານສະຫວັດ ດີການສັງຄົມທົ່ວໄປ, ໄພພິບັດທຳມະຊາດ, ແກ້ໄຂບັນຫາທີ່ຫລໍ່ແຫລມ ກ່ຽວກັບແຮງງານ, ແກ້ໄຂບັນຫາສັງຄົມກ່ຽວກັບການຄ້າມະນຸດ. ນອກຈາກນີ້, ທ່ານ ທອງລຸນ ສີສຸລິດ ຍັງກ່າວຕື່ມວ່າ: ວຽກງານດ້ານແຮງງານ ຍັງເປັນວຽກງານໜຶ່ງ ທີ່ໃຫຍ່ນັບມື້ນັບມີຄວາມຕ້ອງການຫລາຍຂຶ້ນ ແລະ ຖ້າຢາກປ້ອງກັນແຮງງານລາວໃຫ້ໄດ້ເຮັດວຽກຫລາຍເຮັດວຽກດີ ພວກເຮົາຕ້ອງສ້າງແຮງງານຂອງພວກເຮົາຂຶ້ນມາ ໃຫ້ພຽງພໍກັບຄວາມຕ້ອງການທາງດ້ານປະລິມານ ແລະ ຄຸນນະພາບ. ເຊິ່ງທ່ານ ນາຍົກ ໃຫ້ເອົາໃຈໃສ່ ຄື: ວຽກງານດ້ານແຮງງານ ຕ້ອງເອົາໃຈໃສ່ການພັດທະນາສີມືແຮງງານ ແລະ ຖືເປັນບູລິມະສິດ, ຕ້ອງມີການພັດທະ ນາທາງດ້ານສີມື ແລະ ພັດທະນາຄວາມເຂັ້ມຂອງງານ; ເອົາໃຈໃສ່ຄຸ້ມຄອງແຮງງານ ທາງດ້ານປະລິມານ, ຄຸນນະພາບ ແລະ ກິດຈະກຳຕ່າງໆຂອງຜູ້ຈ້າງງານ, ຄຸ້ມຄອງບໍ່ໃຫ້ມີແຮງງານເຖື່ອນ ທີ່ເຂົ້າມາໃນປະເທດໃນຮູບແບບຂອງນັກທ່ອງທ່ຽວ; ເອົາໃຈໃສ່ການຈັດຫາງານ ຕ້ອງມີຕະຫລາດແຮງງານ ແລະ ກົນໄກ; ພ້ອມທັງມີການປົກປ້ອງຜົນປະໂຫຍດຂອງຜູ້ອອກແຮງງານ ບໍ່ໃຫ້ຖືກເອົາລັດເອົາປຽບ; ຕ້ອງມີການປະ ສານງານຢ່າງມີປະສິດທິຜົນ ຖ້າຫາກມີໂຄງການໃດເກີດຂຶ້ນ ກໍຕ້ອງມີການວາງແຜນໃນຄວາມຕ້ອງການທາງດ້ານແຮງງານ ກໍຕ້ອງໃຫ້ໂຄງການດັ່ງກ່າວ ແຈ້ງໃຫ້ກະຊວງແຮງງານ, ພະແນກແຮງງານຂັ້ນແຂວງ ຫລື ຂັ້ນທ້ອງຖິ່ນຮັບຊາບກັບຄວາມຕ້ອງການທາງດ້ານໃນແຮງງານໃນຂະແໜງການຕ່າງໆ ແຕ່ຜູ້ໃຊ້ແຮງງານຕ້ອງໄດ້ສ້າງແຮງງານ ຫລື ຝຶກເອງ ໂດຍກະຊວງແຮງງານ ແລະ ສະຫວັດດີການສັງຄົມ ຈະເປັນຜູ້ສ້າງເງື່ອນໄຂຄວາມສະດວກທາງດ້ານນະໂຍບາຍຕ່າງໆ ແລະ ວາງທິດທາງໃຫ້ກ່ຽວກັບການໃຊ້ແຮງງານ.

ຂ່າວອື່ນໆ

ຂ່າວເດັ່ນ

ຂ່າວໃໝ່

Contact Form