ຂາດງົບສ້ອມແປງ ເຮັດໃຫ້ 18 ສະຖານີ ບໍ່ສາມາດສະໜອງນ້ຳແກ່ເນື້ອທີ່ການຜະລິດ
ທ່ານ ສາຍຄຳ ແພງຄຳມີ ຫົວໜ້າຂະແໜງຊົນລະປະທານ ພະແນກກະສິກຳ ແລະ ປ່າໄມ້ນະຄອນຫຼວງວຽງຈັນ ໄດ້ໃຫ້ສຳພາດວັນທີ 10 ມັງກອນ 2017 ວ່າ: ວຽກງານຊົນລະປະທານກະກຽມໃສ່ລະດູແລ້ງສົກປີ 2016-2017 ທົ່ວນະຄອນຫຼວງວຽງຈັນ ມີຊົນລະປະທານ 74 ສະຖານີ ໃນນັ້ນ ເປີດນ້ຳສະໜອງໃຫ້ແກ່ເນື້ອທີ່ການຜະລິດໄປແລ້ວ 57 ສະຖານີ ແລະ ຍັງມີ 18 ສະຖານີ ບໍ່ທັນໄດ້ຈັດຕັ້ງປະຕິບັດເປີດນ້ຳ ເນື່ອງຈາກຈັກສູບນ້ຳເປ່ເພ ແລະ ງົບປະມານກໍ່ບໍ່ໄດ້ຮັບການຕອບສະໜອງໃນ 18 ສະຖານີ ນີ້ແມ່ນນອນຢູ່ໃນເມືອງສັງທອງ ແລະ ເມືອງໄຊທານີ ເຊິ່ງເປັນເຂດທີ່ປະຊາຊົນບໍ່ມີຄວາມສາມາດສ້ອມແປງເອງໄດ້ ເປັນເຂດທີ່ປະຊາຊົນເຮັດການຜະລິດບໍ່ໄດ້ຮັບຜົນດີເທົ່າທີ່ຄວນ ຜົນຜະລິດບໍ່ງາມ ແລະ ເປັນເຂດທີ່ບໍ່ຜະລິດເປັນສິນຄ້າ ຈຶ່ງເຮັດໃຫ້ບໍ່ມີກອງທຶນສະສົມທີ່ຈະມາເປັນທຶນສ້ອມແປງຈັກສູບນ້ຳໃນເວລາເປ່ເພ ອາໄສແຕ່ເບື້ອງລັດເປັນຜູ້ປະກອບສ່ວນ ສ່ວນເມືອງປາກງື່ມ ແລະ ເມືອງຫາດຊາຍຟອງແມ່ນບໍ່ມີບັນຫາ ເນື່ອງຈາກເປັນເຂດທຳການຜະລິດເປັນສິນຄ້າ ຈຶ່ງເຮັດໃຫ້ຊາວກະສິກອນມີງົບປະມານສ້ອມແປງກຸ້ມກັນເອງໄດ້ ເມື່ອເປັນຄືແນວນັ້ນ ຂະແໜງຊົນລະປະທານໄດ້ສະເໜີໄປຍັງພະແນກແຜນການ ແລະ ການລົງທຶນ ຂໍງົບປະມານຈາກລັດມາສ້ອມແປງ ແຕ່ຍັງບໍ່ໄດ້ຮັບການຕອບສະໜອງເທື່ອ ເຊິ່ງຕາມຄວາມຕ້ອງການງົບປະມານທີ່ຈະມາສ້ອມແປງຈັກສູບນ້ຳໃນແຕ່ລະປີ ປະມານ 200-300 ລ້ານກີບ ເພື່ອມາສົມທົບທຶນກັບຊາວກະສິກອນ ໃນມູນຄ່າສ້ອມແປງ 10 ລ້ານກີບລົງມາ ແມ່ນປະຊາຊົນເປັນຜູ້ຮັບຜິດຊອບເອງ ແຕ່ມູນຄ່າ 10 ລ້ານກີບຂຶ້ນໄປ ລັດຈະໄດ້ປະກອບສ່ວນກັບປະຊາຊົນ ນອກຈາກນີ້ແລ້ວ ການລວງຄອງເໝືອງຜ່ານມາ ລັດກັບປະຊາຊົນຍັງໄດ້ພ້ອມກັນຈັດຕັ້ງປະຕິບັດ ທັງນີ້ກໍ່ເພື່ອເຮັດໃຫ້ຂະບວນການຜະລິດໄດ້ຮັບຜົນສຳເລັດເປັນກ້າວໆ.
ທ່ານ ສາຍຄຳ ແພງຄຳມີ ຍັງກ່າວຕື່ມວ່າ: ໃນເມື່ອບໍ່ໄດ້ຮັບງົບປະມານມາສ້ອມແປງຈັກສູບນ້ຳ 18 ສະຖານີ ແນ່ນອນຕ້ອງມີຜົນກະທົບຕໍ່ເນື້ອທີ່ການຜະລິດລະດູແລ້ງໃນ 19 ພັນກວ່າເຮັກຕາ ຈະບໍ່ໄດ້ຕາມແຜນການທີ່ວາງໄວ້ ແລະ ຂະບວນການຜະລິດຂອງຊາວກະສິກອນກໍ່ບໍ່ເປັນຂະບວນຟົດຟື້ນ ແຕ່ເຖິງຢ່າງໃດກໍ່ຕາມ ຂະແໜງຊົນລະປະທານ ກໍ່ຄືພະແນກກະສິກຳ ແລະ ປ່າໄມ້ ນະຄອນຫຼວງວຽງຈັນ ຈະພະຍາຍາມສູ້ຊົນໃນການຈັດຕັ້ງປະຕິບັດ ແລະ ຈະພະຍາຍາມປຸກລະດົມປະຊາຊົນ ປະກອບສ່ວນໃນການສ້ອມແປງຈັກສູບນ້ຳທີ່ເປ່ເພ ໃຫ້ສາມາດໃຊ້ງານໄດ້.
ຂາດງົບສ້ອມແປງ ເຮັດໃຫ້ 18 ສະຖານີ ບໍ່ສາມາດສະໜອງນ້ຳແກ່ເນື້ອທີ່ການຜະລິດ
![]()
Reviewed by makarow
on
11:37:00 PM
Rating:
