ປີ 2016 ​ກາຍ­ເປັນ​ປີ​ທີ່​ຮ້ອນ​ທີ່​ສຸດໃນປະຫວັດສາດນັບຕັ້ງແຕ່ມີການຈົດບັນທຶກ

ປີ 2016 ໄດ້​ເຂົ້າ​ສູ່​ປະ­ຫວັດສາດ​ອຸ­ຕຸ­ນິ­ຍົມ​ໂລກ ໃນ​ເມື່ອ​ວ່າ ກາຍ­ເປັນ​ປີ​ທີ່​ຮ້ອນ​ທີ່​ສຸດ​ນັບ​ແຕ່ບັນ­ດາ​ຊ່ຽວ­ຊານ​ໄດ້​ເກັບ​ກຳ ແລະ ຈົດ​ແຕ້ມ​ຂໍ້​ມູນ​ກ່ຽວ​ກັບ​ອຸນ­ຫະ­ພູມສະ­ເລ່ຍ​ຂອງ​ໜ່ວຍ​ໂລກ ເມື່ອ​ປີ 1880 ເປັນ­ຕົ້ນ​ມາ 2016 ຍັງ​ເປັນປີ​ທີ 3 ຕິດ­ຕໍ່​ກັນ​ທີ່​ີ​ອຸນ­ຫະ­ພູມ​ຂອງໜ່ວຍ​ໂລກ​ບັນ­ລຸ​ລະ­ດັບ​ສູງ​ເປັນສະ­ຖິ­ຕິ ດັ່ງ­ນັ້ນ ເພື່ອ​ໃຫ້​ສະ­ພາບອາ­ກາດ​ຂອງ​ໜ່ວຍ​ໂລກ​ຫຼຸດ­ຜ່ອນຄວາມ​ຮ້ອນ​ລົງ​ ກໍ່​ແມ່ນ​ຄວາມ​ພະຍາ​ຍາມ​ໃນ​ການ​ຕັດ​ຫຼຸດ​ການປ່ອຍ​ແກ​ັສ ກໍ່­ໃຫ້­ເກີດ​ປາ­ກົດ­ການເຮືອນ​ແກ້ວ ນັບ​ວ່າ​ເປັນການ​ກະທຳ​ທີ່​ຈຳ­ເປັນ​ຢ່າງ​ຍິ່ງ.

ບົດ​ລາຍ​ງານ​ຂອງ​ອົງ­ການ​ອຸ­ຕຸນິ­ຍົມ​ໂລກ (WMO) ທີ່​ໄດ້​ນຳອອກ​ມາ​ເປີດ­ເຜີຍ​ເມື່ອ​ວັນ​ທີ 18 ມັງ­ກອນ​ນີ້ ໃຫ້​ຮູ້​ວ່າ ໃນ​ປີ 2016 ອຸນ­ຫະ­ພູມ​ສະ­ເລ່ຍ​ຢູ່​ເທິງ​ແຜ່ນ­ດິນທົ່ວ​ໂລກ  ແລະ ເທິງ​ໜ້າ­ນ້ຳ​ມະຫາ​ສະ­ໝຸດ​ຕ່າງໆ ສູງ​ກ່ວ​າ​ປະມານ 1,1 ອົງ­ສາ C ເມື່ອ​ທຽບ­ໃສ່ໄລ­ຍະ​ກ່ອນ​ອຸດ­ສາ­ຫະ­ກຳ.
ທ່ານ ເພັດ​ເຕີ​ຣີ ທາ​ອາ​ລາ​ສ ເລ­ຂາ­ທິ­ການ WMO ເວົ້າ​ວ່າ: “ບັນ­ດາ​ດັດ​ສະ​ນີກ່ຽວ​ກັບ​ສະພາບ​ດິນ​ຟ້າ​ອາ­ກາດ​ປ່ຽນ­ແປງ​ທີ່ເກີດ​ຈາກ​ນ້ຳ­ມື​ຂອງ​ມະ­ນຸດ​ໄດ້​ຂຶ້ນ ສູ່​ລະ­ດັບ​ສະ­ຖິ­ຕິ​ສູງ​ເປັນ​ປະ­ຫວັດການ​ໃໝ່ ພາຍ​ໃນ​ປີ 2016 ທ່າມກາງ​ທີ່​ຄວາມ​ຂຸ້ນຂອງ​ແກ​ັສ CO2 ແລະ ແກ​ັສ​ເມ​ເທນ ສ້າງສະ­ຖິ­ຕິ​ສຸດ​ຍອດ​ໃໝ່” ແລະ ເລື່ອງນີ້​ເອງ​ທີ່​ເປັນ​ໂຕ​ການ​ເຮັດ​ໃຫ້​ເກີດສະ­ພາບດິນ​ຟ້າ​ອາ­ກາດ​ປ່ຽນແປງ.
ນອກ­ຈາກ​ນັ້ນ­ແລ້ວ ບົດ​ລາຍງານ​ຂອງ WMO ກໍ່​ໄດ້​ຢືນ­ຢັນ​ວ່າ ຄວາມ​ໜາ​ຂອງ​ຖານ​ນ້ຳ​ແຂງ​ຢູ່ໃນ​ເຂດ​ທະ­ເລ​ຂົ້ວ​ໂລກ​ເໜືອ ສືບຕໍ່​ຫຼຸດ​ລົງ​ສູ່​ລະ­ດັບ​ຕ່ຳ​ຫຼາຍ ໃນ​ນັ້ນ ຖານ​ນ້ຳ​ແຂງ​ຢູ່​ໃນກຣິນ​ແລນ ເລີ່ມ​ເປື່ອຍ​ກ່ອນ ແລະ ໄວ​ກວ່າ ເມື່ອ​ທຽບ­ໃສ່​ໃນເມື່ອ​ກ່ອນ ແລະ ນີ້​ນັບ​ວ່າ​ເປັນ​ໜຶ່ງ​ໃນ​ສາ­ເຫດ​ຕົ້ນຕໍ​ນຳ­ໄປ​ສູ່​ລະ­ດັບ​ນ້ຳ​ທະ­ເລ​ສູງ​ຂຶ້ນ ໃນ​ຂະ­ນະ​ດຽວ​ກັນ ຖານ​ນ້ຳ​ແຂງຢູ່ໃນ​ເຂດ​ຂົ້ວ​ໂລກ​ເໜືອ​ຫຼຸດ​ຕ່ຳ​ລົງ ສູ່​ລະ­ດັບ​ຕ່ຳ​ເປັນ​ປະ­ຫວັດ​ການ ແມ້​ກະ​ທັ້ງ​ໃນ​ຕົ້ນ​ລະ­ດູ​ນ້ຳ​ແຂງເປື່ອຍ ຄື: ໃນ​ເດືອນ​ມີ­ນາ ລວມເຖິງ​ເວ­ລາ​ຈຸດ​ສູງ​ຂອງ​ເວ­ລາ​ນ້ຳແຂງ​ກັບ​ມາ​ຕາມ​ປົກ­ກະ­ຕິ ຄື: ໃນເດືອນ​ຕຸ­ລາ ແລະ ພະ­ຈິກ.
ອີງ­ໃສ່​ການ​ວິ­ເຄາະ​ຂອງ WMO ນັ້ນ ທ່ານ ທາ​ອາ​ລາ​ສ ເວົ້າ​ວ່າ ເມື່ອ​ທຽບ­ໃສ່​ເມື່ອ​ກ່ອນ​ແລ້ວ ຂົ້ວໂລກ​ເໜືອ​ພວມ​ອຸ່ນ​ຂຶ້ນທົບ​ສອງເທົ່າ​ຕົວ ແລະ ສະ­ພາບ​ນ້ຳ​ແຂງໃນ​ທະ­ເລ​ເປື່ອຍ​ຢ່າງ​ຕໍ່​ເນື່ອງ ໄດ້ເຮັດ​ໃຫ້​ເກີດ​ການ​ປ່ຽນ­ແປງ​ສະພາບ​ອາ­ກາດ ແລະ ການ​ເໜັງ​ຕີງຂອງ​ມະ­ຫາ​ສະ­ໝຸດ​ຕ່າງໆ​ຢູ່​ໃນຫຼາຍ​ແຫ່ງ​ທົ່ວ​ໂລກ.
ບົດ​ລາຍ​ງານ​ຂອງ WMO ກໍ່ໄດ້​ລະ­ບຸ​ວ່າ ໃນ​ປີ 2016 ໄດ້​ເກີດໄພ​ທຳ​ມະ​ຊາດ​ຫຼາຍ​ກໍ­ລະ­ນີ ທີ່ສ້າງ​ຄວາມ​ສູນ​ເສຍ​ຢ່າງໃຫຍ່ຫຼວງຕໍ່​ເສດ­ຖະ­ກິດ ແລະ ສັງ­ຄົມ WMO ຍັງ​ໄດ້​ເອົາ​ເຫດ­ການ​ໄພທຳ​ມະ​ຊາດ​ຕ່າງໆ​ທີ່​ພົວ­ພັນ​ເຖິງອາ­ກາດ ຕິດ​ພັນກັບ​ການ​ສະ­ຫຼຸບເມື່ອ​ບໍ່​ດົນ​ມາ​ນີ້ ຂອງ​ອົງ­ການຍ້າຍ​ທີ່­ຢູ່​ອາ­ໄສ​ສາ­ກົນ (IOM) ແລະ ອົງ­ການ​ຂ້າ​ຫຼວງ​ໃຫຍ່ ກ່ຽວກັບ​ຜູ້​ລີ້​ໄພ ສະ­ຫະ​ປະ­ຊາ​ຊາດ  (UNHCR) ຊຶ່ງ​ໃນ​ນັ້ນ​ໃຫ້​ຮູ້​ວ່າ ໃນ​ປີ 2015 ມີ​ຜູ້​ທີ່​ສູນ​ເສຍ​ເຮືອນຊານ​ຕື່ມ​ອີກ 19,2 ລ້ານ​ຄົນ ຍ້ອນສະ­ພາບ​ດິນ​ຟ້າ​ອາ­ກາດ ແລະ ຄວາມ​ສ່ຽງ​ໂດຍ​ບັງ­ເອີນ ທີ່​ເກີດ​ຈາກ​ສະ­ພາບ​ຂອງ​ພູມສາດ​ຢູ່​ໃນ 113 ປະ­ເທດ ຕົວ​ເລກດັ່ງ­ກ່າວ​ສູງ​ທົບ​ສອງ​ເທົ່າ​ຕົວ ເມື່ອທຽບ­ໃສ່​ຈຳ­ນວນ​ຜູ້​ທີ່​ສູນ​ເສຍເຮືອນ​ຊານຍ້ອນ​ການ​ພິ­ພາດ ແລະ ຄວາມ​ຮຸນ​ແຮງ ຊຶ່ງພົວ­ພັນເຖິງ​ມະ­ນຸດ.
ໃນ​ຂະ­ນະ​ດຽວ​ກັນ ນ້ຳ​ທະ­ເລຮ້ອນ​ເປັນ​ປະ­ຫວັດ​ການ ຍັງ​ເຮັດໃຫ້​ສະ­ພາບ​ຂອງ​ປາ​ກາ​ຮັງ​ຖືກຟອກ​ຂາວ ແລະ ຕາຍ ກາຍ­ເປັນເລື່ອງ​ເກີດ​ຂຶ້ນ​ທົ່ວ​ໄປ