ກວດເຫັນເງິນ 4 ພັນກວ່າຕື້ກີບ ບໍ່ຖືກຕາມຫຼັກການຈັດສັນ ແຜນການລົງທຶນຂອງລັດ

ເພື່ອ​ເປັນ​ການ​ສະຫຼຸບ​ການຈັດ​ຕັ້ງ​ປະຕິບັດ​ວຽກ​ງານ​ຜ່ານ​ມາ ກໍ່​ຄືການ​ວາງ​ແຜນ​ທິດ​ທາງ​ຕໍ່ໜ້າ ​ໃຫ້​ບັນລຸ​ໄດ້​ຕາມ​ຄວາມ​ຮຽກຮ້ອງ​ຕ້ອງການ​ໄລຍະ​ໃໝ່​ຂອງ​ພັກ-ລັດຖະບານ​ວາງ​ໄວ້ ອົງການກວດ​ສອບ​ແຫ່ງ​ລັດ ໄດ້​ຈັດ​ກອງປະຊຸມ​ເປີດ​ກວ້າງວຽກ​ງານ​ກວດສອບ ປະຈຳ​ປີ 2016 ຂຶ້ນ ລະຫວ່າງວັນ​ທີ 11-12 ມັງກອນ 2017 ຢູ່​ສູນ​ການ​ຮ່ວມ​ມື​ສາກົນ ລາວ-ຍີ່ປຸ່ນ (ICTC) ໂດຍ​ການເປັນ​ປະທານ​ຂອງ​ທ່ານ​ນາງ ວຽງທອງ ສີ​ພັນ​ດອນ ປະທານ​ອົງການ​ກວດ​ສອບ​ແຫ່ງ​ລັດ ມີ​ບັນດາຮອງ​ປະທານ ຮອງ​ລັດ​ຖະ​ມົນຕີ ຮອງ​ເຈົ້າແຂວງ-ນະຄອນຫຼວງ ພ້ອມ​ດ້ວຍ​ຂະແໜງການ​ກ່ຽວຂ້ອງ ອົງການ​ກວດ​ສອບ​ປະຈຳພາກ​ເຂົ້າ​ຮ່ວມ.
ກອງ​ປະຊຸມໄດ້​ຮັບ​ຟັງ ແລະ ປະກອບ​ຄຳ​ເຫັນຕໍ່​ກັບ​ຜົນ​ການ​ກວດ​ສອບ ​ບົດ​ສະຫຼຸບ​ຂາດ​ຕົວ​ການຈັດຕັ້ງ​ປະຕິບັດແຜນ​ງົບປະມານ​ແຫ່ງ​ລັດ ປະຈຳສົກ​ປີ 2014-2015 ບົດ​ລາຍ​ງານການເຄື່ອນໄຫວ​ວຽກ​ງານ​ອົງການ​ກວດ​ສອບ ປະຈຳສົກ​ປີ 2015-2016 ແລະ ແຜນການເຄື່ອນ​ໄຫວ​ປີ 2017 ພ້ອມ​ກັບການ​ປະກອບ​ຄຳ​ເຫັນ​ຈາກ​ບັນດາພາກສ່ວນ​ກ່ຽວຂ້ອງ ​ທັງ​ສູນ​ກາງ-ທ້ອງຖິ່ນ ເຊິ່ງ​ໃນ​ຜົນ​ການ​ກວດສອບ​ບົດ​ສະຫຼຸບ​ຂາດ​ຕົວ​ການ​ຈັດຕັ້ງ​ປະຕິບັດ​ ແຜນ​ງົບປະມານ​ແຫ່ງລັດ ທີ່​ລາຍ​ງານ​ໂດຍ​ທ່ານ ປະດັບເພັດ ໄຊ​ຍະ​ໂຄດ ຮອງ​ປະທານອົງການ​ກວດ​ສອບ​ແຫ່ງ​ລັດ ມີຫຼາຍ​ອັນ​ສຳຄັນ ແລະ ພົ້ນ​ເດັ່ນ ເຊັ່ນ: ດ້ານ​ລາຍ​ຮັບ ກວດ​ສອບເຫັນ​ລາຍ​ຮັບ​ສ່ວຍ​ສາ​ອາກອນ ລາຍ​ຮັບ​ຊັບ​ສິນ​ຂອງ​ລັດ ເງິນກອງ​ທຶນ​ລັດ ແລະ ອື່ນໆ ຈຳນວນ 814,44 ຕື້​ກີບ ເຊິ່ງ​ເງິນ​ຈຳນວນ​ດັ່ງກ່າວ ​ເກັບ​ໄດ້​ແລ້ວແຕ່​ຍັງບໍ່​ໄດ້​ນຳ​ເຂົ້າ​ມອບ​ເປັນ​ລາຍ​ຮັບງົບປະມານ​ແຫ່ງ​ລັດ ກວດ​ເຫັນລາຍ​ຮັບ​ທີ່​ຂະແໜງ​ສ່ວຍ​ສາ​ອາກອນ​ຄຸ້ມ​ຄອງ ຈຳນວນ 173,77 ຕື້​ກີບ ບໍ່​ໄດ້​ມອບ​ເຂົ້າ​ງົບປະມານແຫ່ງ​ລັດ ກວດ​ສອບ​ເຫັນ​ການ​ສົ່ງຄືນ​ອາກອນ​ມູນ​ຄ່າ​ເພີ່ມ ໃນ​ອັດຕາ 10% ການ​ຫັກ​ລົບ​ຍົກເວັ້ນອາກອນ​ມູນ​ຄ່າ​ເພີ່ມ ຈຳນວນ 145,74 ຕື້​ກີບ ຂະແໜງ​ພາສີ ໄດ້ກວດ​ສອບ​ເຫັນມີ​ການ​ຍົກເວັ້ນຫຼຸດຜ່ອນ​ພາສີ-ອາກອນ ປະເພດນ້ຳມັນ​ເຊື້ອ​ໄຟ ພາຫະນະ ແລະ ຄ່າ​ຊັກ​ພິເສດ​ໄມ້​ຂາ​ອອກ ຈຳນວນ 2.407,28 ຕື້​ກີບ ກວມເອົາ 46,11% ຂອງ​ລາຍ​ຮັບ ຂະແໜງ​ພາສີ ຄັງ​ເງິນ​ແຫ່ງ​ຊາດ​ປະຈຳ​ສູນ​ກາງ ກວດ​ສອບ​ເຫັນຍອດ​ເຫຼືອ​ໃນ​ບັນຊີ​ເງິນ​ຝາກ ອົງການ​ບໍລິຫານ​ວິຊາ​ການ (ບັນຊີ 471) ຢູ່​ຄັງ​ເງິນ​ແຫ່ງ​ຊາດ ປະຈຳສູນ​ກາງ ຈຳນວນ 456,30 ຕື້​ກີບ ທີ່​ບໍ່​ໄດ້​ຮັບ​ການ​ຊຳລະ​ສະ​ສາງ ໃນ​ສົກ​ປີ​ຕາມ​ກຳນົດ​ເວລາ ຄັງເງິນ​ແຫ່ງ​ຊາດປະຈຳ​ແຂວງ ກວດ​ເຫັນ​ລາຍ​ຈ່າຍ​ເງິນ​ລ່ວງໜ້າ​ໃນ​ລະບົບ​ຄັງ​ເງິນ​ແຫ່ງ​ຊາດປະຈຳ​ແຂວງ ຈຳນວນ 711,29 ຕື້​ກີບ ທີ່​ບໍ່​ໄດ້​ດຳເນີນ​ການ​ຊຳລະ ແລະ ເລັ່ງ​ທວງຢູ່​ບັນດາ​ກະຊວງ ກວດ​ສອບ​ເຫັນ​ບັນຊີ​ເງິນ​ຝາກຢູ່ນອກ​ລະບົບ​ຄັງ​ເງິນ ທີ່​ບໍ່​ໄດ້​ຮັບ​ອະນຸ​ຍາດ 159 ບັນຊີ ຈຳນວນ 367,74 ຕື້​ກີບ ແລະ ດ້ານ​ລາຍຈ່າຍ​ລົງທຶນ​ຂອງ​ລັດ ກວດ​ສອບເຫັນ​ການ​ຈັດ​ສັນ​ເງິນ​ຂອງ 766 ໂຄງການ ມູນ​ຄ່າ 4.364,70 ຕື້ກີບ ເຂົ້າ​ໃນ​ແຜນ​ງົບປະມານແຫ່ງ​ລັດ ບໍ່​ຖືກຕ້ອງ​ຕາມ​ຫຼັກ ການ​ຈັດ​ສັນ​ແຜນການ​ລົງທຶນຂອງ​ລັດ​ເປັນຕົ້ນ.