ປະຊາຊົນທົ່ວປະເທດ ໄດ້ນຳໃຊ້ໄຟຟ້າ ກວມ 91%

ຕາມ​ການ​ໃຫ້​ຮູ້​ຂອງ​ທ່ານ ໄຊ​ປະເສີດ ພົມ​ສຸພາ ຫົວໜ້າ​ກົມ​ທຸລະ​ກິດພະລັງງານ ກະຊວງ​ພະລັງງານ ແລະ ບໍ່​ແຮ່ ທີ່​ນະຄອນຫຼວງ​ວຽງ​ຈັນ ເມື່ອ​ທ້າຍ​ອາທິດ​ນີ້​ວ່າ: ການ​ພັດທະນາ​ໂຄງການ​ໄຟຟ້ານັບ​ຕັ້ງແຕ່​ເລີ່ມ​ປະກາດ​ໃຊ້​ຈິນຕະນາການ​ໃໝ່ ໃນ​ປີ 1986 ເຊິ່ງ​ທ່າແຮງ​ໃນ​ການ​ພັດທະນາ​ໄຟຟ້າ ແມ່ນ​ເນັ້ນ​ໃສ່​ໂຄງການ​ໄຟຟ້າ​ນ້ຳຕົກ ເພື່ອ​ຫັນ​ເປັນ​ອຸດສາຫະກຳ ຕາມ​ນະໂຍບາຍ​ຂອງ​ພັກ​ວາງ​ອອກ​ໃຫ້​ມີ​ໄຟຟ້າ​ນຳ​ໃຊ້​ໃນ​ຕົວ​ເມືອງ ແລະ ຊົນນະບົດ ນອກຈາກ​ນັ້ນ ກໍ່​ຫັນ​ໄຟຟ້າ​ເປັນ​ສິນຄ້າ​ຂາ​ອອກ​ໄປ​ຕ່າງ​ປະເທດ ເພື່ອ​ສ້າງ​ລາຍ​ຮັບ​ໃຫ້​ແກ່​ປະເທດ​ຊາດ ກ່ອນ​ປີ 1990 ປະເທດ​ລາວ​ເຮົາ​ມີ​ແຫຼ່ງ​ໄຟຟ້າ​ໃຊ້​ບໍ່​ພໍ​ເທົ່າໃດ​ເຂື່ອນ ເຂື່ອນ​ສຳຄັນ​ກໍ່​ມີ​ແຕ່​ເຂື່ອນ​ນ້ຳ​ງື່ມ 1 ໃນ​ເວລາ​ນັ້ນ ຖ້າ​ສະເລ່ຍ​ການ​ນຳ​ໃຊ້​ໄຟຟ້າ​ບໍ່​ຮອດ 10% ໝາຍ​ຄວາມ​ວ່າ 100 ຄອບຄົວ ຈຳນວນ​ນຳ​ໃຊ້​ໄຟຟ້າ​ບໍ່​ຮອດ 10 ຄອບຄົວ ແຕ່​ມາ​ຮອດ​ປີ 2016 ຜ່ານ​ມາ​ນີ້ ສາມາດ​ສະເລ່ຍ​ທົ່ວ​ປະເທດ​ ຈຳນວນ​ຄອບຄົວ​ທີ່​ໄດ້​ນຳ​ໃຊ້​ໄຟຟ້າ​ລະບົບ​ກວມ 91% ໃນ​ນັ້ນ ຫຼາຍໆ​ແຂວງ​ທີ່​ມີ​ໄຟຟ້າ​ໃຊ້​ເກືອບ 100% ມີ​ນະຄອນຫຼວງ​ວຽງ​ຈັນ ແຂວງ​ວຽງ​ຈັນ ໄຊ​ຍະ​ບູ​ລີ ບໍ​ລິ​ຄຳ​ໄຊ ຄຳ​ມ່ວນ ແລະ ແຂວງ​ຈຳປາ​ສັກ ສຳລັບ​ແຂວງ​ທີ່​ຍັງ​ໄດ້​ນຳ​ໃຊ້​ໄຟຟ້າ​ໜ້ອຍ​ແມ່ນ​ບັນດາແຂວງ​ພາກ​ເໜືອ ໂດຍ​ສະເພາະ​ເຂດ​ຫ່າງ​ໄກ​ສອກຫຼີກ ທຸລະກັນດານ.

ທ່ານ​ຍັງ​ໃຫ້​ຮູ້​ຕື່ມ​ອີ​ກວ່າ: ປັດຈຸບັນ​ ໃນ​ທົ່ວ​ປະເທດ​ມີ​ໂຄງການ​ໄຟຟ້າ​ທີ່​ເປີດ​ນຳ​ໃຊ້​ແລ້ວ ທັງ​ໂຄງການ​ນ້ອຍ ໂຄງການ​ໃຫຍ່ ​ຈຳນວນ 40 ໂຄງການ ມີ​ກຳລັງ​ຕິດ​ຕັ້ງ​ທັງ​ໝົດ 6.300 ເມ​ກາ​ວັດ ນອກຈາກ​ນີ້ຍັງ​ມີ​ໂຄງການ​ກຳລັງ​ກໍ່ສ້າງ 25 ໂຄງການ ມີ​ກຳລັງ​ຕິດ​ຕັ້ງ 5.000 ເມ​ກາ​ວັດ ແລະ ໂຄງການ​ກຳລັງ​ສຶກ​ສາ ແລະ ກ້າວ​ສູ່​ການ​ກໍ່ສ້າງ 20 ກວ່າ​ໂຄງການ. (ຫນັງສືພິມລາວພັດທະນາ)