ນາຍົກ ເນັ້ນໃຫ້ປັບປຸງຄ່ານິຍົມ ໃນການເລືອກຂະແໜງສຶກສາ

ນາຍົກລັດຖະມົນຕີ ​ແຫ່ງ ສປປ ລາວ ​ໄດ້ເນັ້ນໜັກ​ໃຫ້​ສັງຄົມ ກໍ່ຄື ນັກຮຽນ-ນັກ​ສຶກສາ ຄວນປັບປຸງຄ່ານິຍົມໃນການເລືອກຂະແໜງການສຶກສາ ເພື່ອ​ໃຫ້​ແທ​ດ​ເໝາະກັບ​ການສະໜອງແຮງງານຕາມຕະຫຼາດແຮງງານຕົວ​ຈິງ ຈຶ່ງ​ຈະ​ເຮັດ​ໃຫ້ບໍ່ມີການຫວ່າງງານ ຫຼື ຄົນເຫຼືອບໍ່ພໍຫຼາຍຂຶ້ນ.

ເມື່ອທ້າຍປີຜ່ານມາ, ທ່ານ ທອງລຸນ ສີສຸລິດ ນາຍົກລັດຖະມົນຕີ​ແຫ່ງ ສປປ ລາວ ໄດ້ໃຫ້ກຽດເຂົ້າຮ່ວມ ແລະ ໂອ້ລົມໃນກອງປະຊຸມວຽກງານແຮງງານ ແລະ ສະຫວັດດີການທົ່ວປະເທດ ປະຈຳປີ 2017 ເຊິ່ງທ່ານໄດ້ກ່າວໃນບາງຕອນສຳຄັນ ວ່າ: ປັດຈຸບັນນີ້, ບັນດານັກຮຽນ-ນັກສຶກສາທີ່ຮຽນຈົບມາ, ບາງພາກສ່ວນກໍ່ຍັງບໍ່ມີວຽກເຮັດງານທຳ, ແຕ່ກົງກັນຂ້າມຕໍາແໜ່ງງານໃນບາງຂະແໜງການ ຍັງມີຄວາມຕ້ອງການທາງດ້ານແຮງງານສູງຢູ່ ຍ້ອນວ່າບັນດາຂະແໜ່ງການທີ່ຮຽນຈົບມາ ຍັງບໍ່ແມ່ນຂະແໜງການທີ່​ເປັນຄວາມຕ້ອງການຕະຫຼາດແຮງງານໃນປະເທດເຮົາ ຈຶ່ງເຮັດກໍ່ໃຫ້ເກີດມີການຫວ່າງງານ ຫຼື ຄົນເຫຼືອບໍ່ພໍຫຼາຍ.  ສະນັ້ນ, ບັນດາພາກສ່ວນທີ່ກ່ຽວຂ້ອງ, ສະຖາບັນການສຶກສາ ຫຼື ໂຮງຮຽນ ຄວນເລັ່ງໃສ່ສ້າງບຸຄະລາກອນໃຫ້ກົງກັບຂະແໜງການເຮັດວຽກ ຫຼື ຕຳແໜ່ງງານທີ່ຕ້ອງການໃນສັງຄົມ. ຖ້າປະເທດເຮົາບໍ່ປັບປຸງຄ່ານິຍົມໃນຂະແໜງການສຶກສາ ເວລາຮຽນຈົບມາ ກໍ່ຈະຊອກວຽກເຮັດງານທຳຍາກເປັນແບບນີ້ອີກຕໍ່ໄປ.

ນອກຈາກນີ້, ທ່ານ ນາຍົກ ຍັງກ່າວຕື່ມອີກວ່າ: ຖ້າເຮົາສະໜອງແຮງງານບໍ່ໄດ້ຕາມທີ່ຕະຫຼາດແຮງງານຕ້ອງການ ກໍ່ຈຳເປັນຕ້ອງໄດ້ເອົາແຮງງານຈາກປະເທດອື່ນເຂົ້າມາ, ເຊິ່ງປັດຈຸບັນນີ້ ປະເທດຂອງເຮົາໄດ້ເຂົ້າເປັນປະຊາຄົມເສດຖະກິດອາຊຽນແລ້ວ ຈຶ່ງເຮັດໃຫ້ບໍ່ມີກຳແພງມາກີດຂວາງໃນດ້ານຕ່າງໆ ລວມທັງກຳແພງທາງດ້ານແຮງງານ.

ຂ່າວ: ຂປລ