ລົງທຶນພັດທະນາສູນການຄ້າປາກຊັນໃໝ່

ຕະຫຼາດ​ປາກ​ຊັນ ​ທີ່​ຕັ້ງ​ຢູ່​ບ້ານໂພນ​ໄຊ ເມືອງ​ປາກ​ຊັນ ແຂວງບໍ​ລິ​ຄຳ​ໄຊ ກຳລັງ​ໄດ້​ຮັບ​ການ​ພັດທະ​ນາ​ໃຫ້​ເປັນ​ສູນ​ການ​ຄ້າ​ປາກຊັນ​ໃໝ່ ທີ່​ມີ​ຄວາມ​ສວຍ​ງາມ ທັນສະໄໝ ເປັນ​ສູນ​ລວມ​ແຫ່ງ​ການຄ້າ-ຂາຍ ແລະ ປະກອບ​ມີ​ຫຼາຍກິດຈະການ​ທີ່​ສາມາດ​ຕອບ​ສະໜອງ​ຄວາມ​ຕ້ອງການ ​ສຳລັບການ​ພັດທະນາ​ເສດຖະກິດ-ສັງຄົມ​ຂອງ​ເມືອງ​ປາກ​ຊັນ ກໍ່​ຄືແຂວງບໍ​ລິ​ຄຳ​ໄຊ ໂດຍ​ສະເພາະ ສູນ​ການ​ຄ້າ​ທີ່​ໄດ້​ມາດຕະຖານ ສະຖານທີ່​ຈັດ​ກອງ​ປະຊຸມ ສະ​ຖາບັນ​ການ​ເງິນ ຮ້ານ​ຄ້າ​ວັດຖຸ​ມີຄ່າ ຮ້ານ​ອາຫານ ຮ້ານ​ຂາຍເຄື່ອງທົ່ວ​ໄປ ແລະ ມີ​ສະຖານທີ່​ຈອດລົດ​ກວ້າງຂວາງ ພ້ອມ​ທັງ​ສິ່ງ​ອຳນວຍ​ຄວາມ​ສະດວກ​ຄົບ​ຊຸດ​ລວມຢູ່​ຈຸດ​ດຽວ.
ທ່ານ ຫັດສະດີ ທີລະ​ກຸນ ປະທານ​ບໍລິສັດ ຂະ​ຍຸງ​ຄຳ​ ສູນ​ການຄ້າ​ປາກ​ຊັນ​ໃໝ່​ຂາ​ອອກ-ຂາ​ເຂົ້າ ຈຳກັດ ໄດ້​ກ່າວ​ໃນ​ພິທີ​ວາງ​ສີ​ລາລຶກ​ ໂຄງການ​ກໍ່ສ້າງ​ສູນ​ການ​ຄ້າປາກ​ຊັນ​ໃໝ່ ​ໃນ​ອາທິດ​ຜ່ານ​ມາ ວ່າ: ບໍລິສັດ ຂະ​ຍຸງ​ຄຳ ສູນ​ການຄ້າ​ປາກ​ຊັນ​ໃໝ່​ຂາ​ອອກ-ຂາ​ເຂົ້າ ຈຳກັດ ໄດ້​ຮັບ​ອະນຸຍາດ​ໃຫ້​ເປັນຜູ້​ລົງທຶນ​ພັດທະນາ​ສູນ​ການ​ຄ້າປາກ​ຊັນ​ໃໝ່ ເນື້ອທີ່ 33.124 ຕາ​ແມັດ ໃນ​ນີ້ ຈະ​ສ້າງ​ອາຄານສູນ​ການ​ຄ້າ 1 ຫຼັງ ຂະໜາດ 52x102 ແມັດ 5 ຊັ້ນ ຊັ້ນ​ທີ 1 ເປັນ​ບ່ອນ​ຈອດ​ລົດ​ບັນຈຸ​ໄດ້ 500 ກວ່າ​ຄັນ ຊັ້ນ 2 ຮ້ານ​ຂາຍເຄື່ອງທົ່ວ​ໄປ ຊັ້ນ 3 ຮ້ານ​ຂາຍ​ຄຳ ແລະ ເຄື່ອງ​ປະດັບ ຊັ້ນ 4 ຮ້ານ​ຂາຍຜ້າໄໝ ຊັ້ນ 5 ຫ້ອງ​ປະຊຸມ ແລະ ຈັດ​ງານ​ລ້ຽງ ໂຄງການ​ດັ່ງກ່າວ ໄດ້​ເລີ່ມ​ຈັດ​ຕັ້ງ​ປະຕິບັດ​ແຕ່​ຕົ້ນ​ປີ 2016 ແລະ ຈະ​ສຳເລັດ​ພາຍ​ໃນປີ 2019 ເຊິ່ງ​ແບ່ງ​ເປັນ 3 ໄລຍະ ຜ່ານ​ມາ​ໄດ້​ສຳເລັດ​ໄລຍະ​ທຳ​ອິດຄື: ຮື້​ຖອນ​ສິ່ງ​ກີດຂວາງ ແລະ ກໍ່ສ້າງ​ພື້ນ​ທີ່​ຄ້າຂາຍ​ຊົ່ວຄາວ ປັດຈຸ​ບັນ ເລີ່ມ​ກໍ່ສ້າງ​ໄລຍະ 2 ຄື ການ​ກໍ່ສ້າງ​ສູນ​ການ​ຄ້າ ສ່ວນ​ໄລຍະ 3 ຈະ​ປັບປຸງ​ຕະຫຼາດ​ສົດ ຄິວລົດ​ໂດຍສານ ແລະ ສິ່ງ​ອຳນວຍຄວາມ​ສະດວກ​ຄົບ​ຊຸດ ມູນ​ຄ່າການ​ລົງທຶນ 30 ລ້ານ​ໂດ​ລາ​ສະຫະ​ລັດ ຫຼື ປະມານ 240 ຕື້​ກີບ ອາຍຸ​ສຳ​ປະທານ 60 ປີ.
ທ່ານ ບຸນ​ມາ ບຸ​ຈະເລີນ ຮອງ​ເຈົ້າແຂວງ​ບໍ​ລິ​ຄຳ​ໄຊ ຜູ້​ຊີ້​ນຳວຽກ​ງານ​ເສດຖະກິດ ໄດ້​ກ່າວ​ວ່າ: ໂຄງການ​ດັ່ງກ່າວ ​ຈະ​ເປັນ​ໂຄງການ​ໜຶ່ງ​ທີ່​ຈະ​ຍູ້​ແຮງ​ການ​ພັດ​ທະນາ​ຂອງ​ແຂວງ​ບໍ​ລິ​ຄຳ​ໄຊ ແມ່ນ​ວິທີ​ດຶງ​ດູດ​ເອົາ​ການ​ລົງທຶນ​ພາກເອກະ​ຊົນ ​ເຂົ້າ​ມາ​ມີ​ສ່ວນ​ຮ່ວມ​ໃນການ​ພັດທະນາ ທັງ​ເປັນ​ການຕອບ​ສະໜອງ​ຄວາມ​ຄອງ​ຄອຍຂອງ​ປະຊາຊົນ ​ທີ່​ຢາກ​ມີ​ສະຖານທີ່​ຊື້-ຂາຍ ແລະ ສະຖານທີ່​ບໍລິການທີ່​ທັນ​ສະໄໝ ເມື່ອ​ໂຄງການ​ສຳເລັດ​ ຈະ​ເປັນ​ສະຖານທີ່​ຮອງ​ຮັບການ​ບໍລິການ​ແລກປ່ຽນ​ສິນຄ້າ ​ທີ່​ສາມາດ​ດຶງ​ດູດ​ຜູ້​ປະກອບ​ການ​ທັງ​ພາຍ​ໃນ ແລະ ຕ່າງປະເທດ​ ເຂົ້າມາ​ດຳເນີນ​ທຸລະ​ກິດ​ຄ້າ-ຂາຍ ຢູ່ແຂວງ​ບໍ​ລິ​ຄຳ​ໄຊ​ຫຼາຍ​ຂຶ້ນ ທັງເປັນ​ການ​ສ້າງ​ພື້ນຖານ​ລາຍ​ຮັບເພີ່ມ​ຂຶ້ນ​ໃຫ້​ແຂວງ ໂດຍ​ສະເພາະ ການ​ປະຕິບັດ​ພັນທະ​ອາກອນຕ່າງໆ.
ເຂົ້າ​ຮ່ວມ​ພິທີ​ວາງ​ສີ​ລາ​ລຶກ ມີ​ທ່ານ ກອງ​ແກ້ວ ໄຊ​ສົງຄາມ ເຈົ້າແຂວງ​ບໍ​ລິ​ຄຳ​ໄຊ ທ່ານນາງ ປານີ ທີລະ​ກຸນ ປະທານ​ກຸ່ມ​ບໍ​ລິສັດ ຂະ​ຍຸງ​ຄຳ ທີລະ​ກຸນ ພ້ອມ​ດ້ວຍການ​ນຳ​ແຂວງ ນັກທຸລະກິດ ແລະ ພາກສ່ວນ​ກ່ຽວຂ້ອງ. (ຫນັງສືພິມວຽງຈັນໃຫ່ມ)