ຫາລືວິຊາການ ແລະ ທົບທວນການປະຕິບັດວຽກປະສານງານ ສະໜອງຂໍ້ມູນຂ່າວສານທາງດ້ານການຄ້າ

     ສູນຂໍ້ມູນຂ່າວສານທາງດ້ານການຄ້າ ກະຊວງອຸສາຫະກໍາ ແລະການຄ້າ ໄດ້ຈັດປະຊຸມຫາລືວິຊາການ ແລະ ທົບທວນການປະຕິບັດວຽກປະສານງານສະໜອງຂໍ້ມູນຂ່າວສານທາງດ້ານການຄ້າ ໃນໄລຍະ 10 ເດືອນ ຂອງປີ 2016 ທີ່ຜ່ານມາ ແລະ ວາງທິດທາງແຜນການປີ 2017 ຂຶ້ນໃນຕອນເຊົ້າວັນທີ 18 ມັງກອນ 2017 ທີ່ໂຮງແຮມລາວພລາຊາ ນະຄອນຫຼວງວຽງຈັນ ໂດຍການເປັນປະທານຂອງທ່ານນາງ ບານສະຕີ ເທບພະວົງ ຫົວໜ້າກົມການນໍາເຂົ້າ-ສົ່ງອອກ ກະຊວງອຸດສາຫະກໍາ ແລະການຄ້າ ມີຄະນະກໍາມະການຈຸດປະສານງານ ສູນຂໍ້ມູນຂ່າວສານທາງດ້ານການຄ້າ ຂອງ ສປປ.ລາວ ແລະ ພະນັກງານວິຊາການທີ່ກ່ຽວຂ້ອງເຂົ້າຮ່ວມ.

     ທ່ານຫົວໜ້າກົມການນໍາເຂົ້າ-ສົ່ງອອກ ໄດ້ກ່າວວ່າ ກອງປະຊຸມຈຸດປະສານງານຂອງສູນຂໍ້ມູນຂ່າວສານທາງດ້ານການຄ້າ ຫຼື LTP ( LAO PDR Trad Portal) ໃນຄັ້ງນີ້ເປັນຄັ້ງທີ 3 ພາຍຫຼັງຈັດການປະຊຸມ 2 ຄັ້ງຜ່ານມາໃນປີ 2016 ເຊິ່ງໃນດ້ານຫຼັກການແລ້ວ ທີມງານ LTP ຕ້ອງມີການປະຊຸມຢ່າງໜ້ອຍສອງຄັ້ງຕໍ່ປີ ແລະ ຄັ້ງທີ 2 ຜ່ານມາໄດ້ຈັດຂຶ້ນໃນລະຫວ່າງວັນທີ 02-03 ມີນາ 2016 ໂດຍມີຂະແໜງການກ່ຽວຂ້ອງຈາກຈຸດປະສານງານ LTP ຫຼື Pocal Point ເຂົ້າຮ່ວມຢ່າງພ້ອມພຽງ ເຊິ່ງກອງປະຊຸມໃນຄັ້ງກ່ອນແມ່ນໄດ້ທົບທວນຜົນສໍາເລັດ ແລະ ໝາກຜົນທີ່ສູນຂໍ້ມູນຂ່າວສານທາງດ້ານການຄ້າ ຂອງ ສປປ.ລາວ ຍາດມາໄດ້ ທັງລາຍງານໂດຍຫຽໍ້ກ່ຽວກັບບັນຫາຂໍ້ຫຽຸ້ງຍາກຂອງການປະສານງານລະຫວ່າງ ຈຸດປະສານງານ LTP ກັບທີມງານບໍລິຫານ LTP.

     ຜ່ານການປະສານສົມທົບດັ່ງກ່າວ ເຮັດໃຫ້ສູນຂ້ໍມູນຂ່າວສານທາງດ້ານການຄ້າ ມີຂໍ້ມູນທີ່ຫຼາກຫຼາຍ ແລະ ຄົບຖ້ວນພໍສົມຄວນ ອັນເປັນທີ່ຮູ້ຈັກຢ່າງກວ້າງຂວາງທັງພາຍໃນ ແລະ ສາກົນ ສິ່ງທີ່ພົ້ນເດັ່ນແມ່ນ ສູນຂໍ້ມູນຂ່າວສານທາງດ້ານການຄ້າ ຂອງ ສປປ.ລາວ ໄດ້ຮັບລາງວັນ 2016 ASCIO Award ໃນປະເພດລາງວັນເຕັກໂນໂລຊີຂໍ້ມູນຂ່າວສານດີເດັ່ນຈາກລັດຖະບານ (Digital Government Award) ເຊິ່ງເປັນການຍ້ອງຍໍຂອງລັດຖະບານລາວ ທີ່ປະຍຸກໃຊ້ເຕັກໂນໂລຊີຂໍ້ມູນຂ່າວສານເຂົ້າໃນວຽກງານເພື່ອເພີ່ມຄວາມໂປ່ງໃສ ແລະ ອໍານວຍຄວາມສະດວກໃຫ້ທັງພາກລັດ ແລະ ບັນດາຫົວໜ່ວຍທຸລະກິດ.

     ເຖິງຢ່າງໃດກໍຕາມ ເພື່ອສືບຕໍ່ຮັກສາມາດຕະຖານ ແລະ ຄວາມຍືນຍົງຂອງສູນຂ່າວສານທາງດ້ານການຄ້າ ຂອງ ສປປ.ລາວ ຈິ່ງມີຄວາມຈໍາເປັນໃນການປັບປຸງແກ້ໄຂຂໍ້ຫຽຸ້ງຍາກຕ່າງໆ ໃນການຈັດຕັ້ງປະຕິບັດຢ່າງມີປະສິດທິຜົນ ສໍາລັບກອງປະຊຸມໃນຄັ້ງນີ້ແມ່ນລົງເລິກນໍາສະເໜີບັນດາໝາກຜົນ ຫຼື ຜົນສໍາເລັດທີ່ຍາດໄດ້ໃນ 10 ເດືອນທີ່ຜ່ານມາ ພ້ອມທັງປຶກສາຫາລືວິທີການແກ້ໄຂຂໍ້ຄົງຄ້າງຂອງການປະສານງານ ແລະ ປຶກສາຫາລືສາເຫດທີ່ເຮັດໃຫ້ການນໍາໃຊ້ອີເມວ (LTP Email) ແລະ ກະດານສົນທະນາ (LTP Forum) ທີ່ຍັງບໍ່ເປັນປົກກະຕິ ຫຼື ບໍ່ມີການນໍາໃຊ້ ເພື່ອເຮັດແນວໃດໃຫ້ຈຸດປະສານງານ LTP ຫັນມານໍາໃຊ້ເຄື່ອງມືເຂົ້າໃນວຽກງານສະໜອງຂໍ້ມູນຂ່າວສານທາງດ້ານການຄ້າໃຫ້ມີປະສິດທິຜົນ ແລະ ເປັນປົກກະຕິຂຶ້ນເທື່ອລະກ້າວ.

ຂ່າວ/ພາບ: ເທບພະວົງ