ທຳລາຍສິນຄ້າທີ່ນຳເຂົ້າມາຢ່າງບໍ່ຖືກຕ້ອງ

ວັນ​ທີ 10 ມັງກອນ 2017 ຢູ່ທີ່​ສູນ​ຄວບ​ຄຸມ​ຂີ້​ເຫຍື້ອ​ຫຼັກ 32 ເມືອງ​ໄຊ​ທານີ ນະຄອນຫຼວງ​ວຽງຈັນ ພະ​ແນກ​ອຸດສາຫະກຳ ແລະ ການ​ຄ້າ ນະຄອນຫຼວງ​ວຽງ​ຈັນ ຈັດ​ພິທີ​ທຳລາຍ​ສິນຄ້າ​ປະເພດເຄື່ອງ​ໄນ​ສັດ ​ທີ່​ນຳ​ເຂົ້າ​ມາ​ບໍ່​ຖືກຕ້ອງ​ຈາກ​ຕ່າງປະເທດ ມູນ​ຄ່າເກືອບ 40 ລ້ານ​ກີບ.
ເຈົ້າ​ໜ້າທີ່​ກວດກາ​ການ​ຄ້າ ໄດ້​ສົມທົບ​ກັບ​ພາກສ່ວນ​ທີ່​ກ່ຽວຂ້ອງ​ລົງ​ຕິດຕາມ ແລະ ກວດກາ ຢູ່​ຕະຫຼາດ​ເປົ້າ​ໝາຍ​ໃນ​ນະຄອນຫຼວງ​ວຽງ​ຈັນ ທີ່​ມີ​ການ​ລັກລອບນຳ​ເຂົ້າ​ເຄື່ອງ​ໄນ​ສັດ​ຢ່າງ​ບໍ່​ຖືກຕ້ອງ​ຈາກ​ປະເທດ​ໃກ້​ຄຽງ ຜ່ານການ​ລົງ​ກວດກາ​ຂອງ​ເຈົ້າ​ໜ້າທີ່ ໃນ​ວັນ​ທີ 6 ແລະ ວັນ​ທີ 9 ມັງກອນ 2017 ທີ່​ຜ່ານ​ມາ ສາມາດຢຶດ​ສິນຄ້າ​ປະເພດ​ເຄື່ອງ​ໄນ​ງົວ ຄວາຍ (ຕັບ ປອດ) ນ້ຳໜັກ ຈຳນວນ 1.230 ກິ​ໂລ ມູນ​ຄ່າ​ປະມານ 36.900.000 ກີບ ທີ່​ນຳເຂົ້າ​ມາ​ຢ່າງ​ບໍ່​ຖືກຕ້ອງ​ຈາກ​ປະເທດ​ຫວຽດນາມ ເຊິ່ງ​ເຈົ້າ​ໜ້າທີ່ກວດ​ພົບ​ເຫັນ​ສິນຄ້າ​ປະເພດ​ດັ່ງກ່າວ ຢູ່​ຕະຫຼາດ​ໂນນ​ຄໍ້ ຈຳນວນ 800 ກິ​ໂລ ແລະ ຕະຫຼາດ​ລາວ-ອົດ​ຊີ ຈຳນວນ 350 ກິ​ໂລ.
ສຳລັບ​ຜູ້​ທີ່​ກະທຳ​ຜິດ​ນັ້ນ​ ທາງເຈົ້າ​ໜ້າທີ່​ແມ່ນ​ໄດ້​ສຶກ​ສາ​ອົບຮົມກ່າວ​ເຕືອນ ພ້ອມ​ທັງ​ເຮັດ​ບົດ​ບັນທຶກ ແລະ ປັບ​ໃໝ​ຕາມ​ລະບຽບການ​ເພື່ອ​ບໍ່​ໃຫ້​ມາ​ກະທຳ​ຜິດ​ຊ້ຳອີກ ພ້ອມ​ຮຽກຮ້ອງ​ມາ​ຍັງ​ເຈົ້າຂອງ​ຕະຫຼາດ ຄະນະ​ຈັດ​ສັນ​ຕະຫຼາດ ຈົ່ງ​ເອົາໃຈໃສ່​ຕື່ມ​ໃນ​ການກວດກາ​ສິນຄ້າ​ທຸກ​ປະເທດ ​ທີ່​ນຳເຂົ້າ​ມາ​ຂາຍ​ຢູ່​ໃນ​ຕະຫຼາດ​ຂອງຕົນ​ ວ່າຖືກຕ້ອງ​ຕາມ​ລະບຽບການ ຫຼື ບໍ່ ເພື່ອ​ເປັນ​ການ​ບໍ່​ເອົາລັດ​ເອົາ​ປຽບ​ແກ່​ຜູ້​ບໍລິໂພກ. (ຫນັງສືພິມວຽງຈັນໃຫ່ມ)