ທຄຕລ ແລະ ບໍລິສັດ ກຸງສີ ຮ່ວມມືກັນບໍລິການເຊົ່າສິນເຊື່ອ

ວັນ​ທີ 6 ກຸມພາ 2017 ທີ່ສຳນັກງານ​ໃຫຍ່ ​ທຄຕລ ທະ​ນາຄານ​ການ​ຄ້າ​ຕ່າງປະເທດ​ລາວ ມະຫາຊົນ (​ທຄຕລ) ແລະ ບໍ​ລິສັດ ກຸງ​ສີ ບໍລິການ​ເຊົ່າ​ສິນ​ເຊື່ອ ຈຳກັດ ໄດ້​ຈັດ​ພິທີ​ລົງ​ນາມ​ການຮ່ວມ​ມືບໍລິການ​ເຊົ່າ​ສິນ​ເຊື່ອຈຳກັດ ວ່າ​ດ້ວຍ​ການບໍລິການຊຳລະ​ຄ່າ​ບໍລິການ​ຕ່າງໆ​ຜ່ານ (​ທຄຕລ) ໂດຍ​ທ່ານ ພັນ​ຊະນະ ຄຸນ​ນຸ​ວົງ ຮອງ​ຜູ້ອຳນວຍການ (​ທຄຕລ) ແລະ ທ່ານ ຊັດ​ຊະວານ ເພີ່ມ​ສຸກ​ຈາ​ຣຸຊັບ ກຳ​ມະການ​ຜູ້​ຈັດການ​ໃຫຍ່ ບໍລິສັດ ກຸງສີ ໃຫ້​ກຽດ​ເຂົ້າ​ຮ່ວມ​ຂອງ​ທ່ານ ຄຳ​ສຸກ ສູນ​ດາລາ ຮອງ​ປະທານສະພາ​ບໍລິຫານ ​ທຄຕລ ພ້ອມດ້ວຍ​ພາກສ່ວນ​ກ່ຽວຂ້ອງ​ທັງສອງ​ຝ່າຍ.
ການ​ຮ່ວມ​ມື​ກັນບໍລິການ​ເຊົ່າສິນ​ເຊື່ອຈຳກັດໃນ​ຄັ້ງ​ນີ້ ແມ່ນເພື່ອ​ອຳນວຍ​ຄວາມ​ສະດວກ​ໃຫ້ແກ່​ລູກ​ຄ້າ ບໍລິສັດ​ ກຸງ​ສີ ບໍລິການເຊົ່າ​ສິນ​ເຊື່ອ ເພື່ອ​ສາມາດ​ຊຳລະຄ່າ​ຜ່ອນ​ສິນຄ້າ​ຜ່ານ​ຊ່ອງ​ທາງຕ່າງໆ​ຂອງ ​ທຄຕລ ເຊັ່ນ: ຜ່ານຊ່ອງ​ທາງ​ເຄົາ​ເຕີ້ ຜ່ານ​ຊ່ອງ​ທາງ BCEL One ຜ່ານ​ຊ່ອງ​ທາງ I-BANK ແລະ ຜ່ານ​ຊ່ອງ​ທາງ ATM ນອກ​ນີ້ ລູກ​ຄ້າ​ຍັງ​ສາມາດເລືອກ​ບໍລິການ​ຕັ້ງ​ການ​ຊຳລະເງິນ​ແບບ​ອັດຕະໂນມັດ (Auto-Payment) ເຊິ່ງ Auto-Payment ເປັນ​ບໍລິການຕັດ​ເງິນຈາກ​ບັນຊີ​ຂອງ​ລູກ​ຄ້າ​ຂອງ​ບໍ​ລິສັດ ​ທີ່​ມີ​ບັນຊີ​ຢູ່​ທະນາຄານ​ການຄ້າ​ຕ່າງປະເທດ​ລາວ ເຂົ້າ​ບັນຊີ​ບໍລິ​ສັດ ເພື່ອ​ຊຳລະ​ຄ່າ​ບໍລິການຕ່າງໆ​ຕາມ​ການ​ຕົກລົງ​ເຫັນ​ດີລະຫວ່າງ​ລູກ​ຄ້າ ແລະ ບໍລິສັດ ໂດຍ​ລູກ​ຄ້າ​ບໍ່​ຈຳເປັນ​ຕ້ອງ​ເດີນທາງ​ເຂົ້າ​ມາ​ດຳເນີນ​ທຸລະ​ກຳ​ຢູ່ທະນາຄານ ຫຼື ເດີນທາງ​ໄປ​ຊຳລະ​ເງິນ​ໃຫ້​ບໍລິສັດ.
ທ່ານ ພັນ​ຊະນະ ຄຸນ​ນຸ​ວົງ ຮອງ​ຜູ້ອຳນວຍການ (​ທຄຕລ) ກ່າວ​ວ່າ: “ການ​ຮ່ວມ​ມື​ໃນ​ຄັ້ງ​ນີ້ ຖື​ວ່າ​ເປັນ​ຂີດ​ໝາຍ​ອັນ​ສຳຄັນ​ຕໍ່ ​ທຄຕລ ໃນ​ການ​ເພີ່ມ​ຫຼາຍ​ດ້ານຊ່ອງ​ທາງ​ບໍລິການ​ໃຫ້​ແກ່​ລູກ​ຄ້າ ທັງ​ເບື້ອງ ​ທຄຕລ ແລະ ລູກ​ຄ້າຂອງ​ທາງ​ບໍລິສັດ”.
ບໍລິການ​ຊຳລະ​ຄ່າ​ສາ​ທາ​ລະນຸ​ປະ​ໂພກ ຫຼື Bill Payment ຜ່ານ​ລະບົບ​ທະນາຄານ ແມ່ນເປັນ​ການ​ບໍລິການ​ທີ່​ໄດ້​ຮັບ​ການຕອບ​ຮັບ​ເປັນ​ຢ່າງ​ດີ​ຈາກ​ສັງຄົມ ໃນ​ປັດຈຸບັນ ​ທຄຕລ ໄດ້​ເລີ່ມ​ຕົ້ນໃຫ້​ບໍລິການ Bill Payment ທຳອິດ ໃນ​ປີ 2009 ຈາກ​ນັ້ນ ​ທຄຕລ ກໍ່​ໄດ້​ມີ​ການ​ພັດທະນາຊ່ອງ​ທາງ​ການ​ຊຳລະ​ໃຫ້​ຫຼາຍ​ຂຶ້ນ ແລະ ມີ​ການ​ນຳ​ໃຊ້​ຊ່ອງ​ທາງ​ຊຳລະ​ແບບ Online ໂດຍ​ສະເພາະແມ່ນ​ຊຳລະ​ຜ່ານ Application BCEL One ຜ່ານໂທລະສັບ​ມື​ຖື ຊຶ່ງ​ນັບ​ມື້​ໄດ້​ຮັບ​ຄວາມ​ນິຍົມ​ຈາກລູກ​ຄ້າ.
ທະນາຄານ​ການ​ຄ້າ​ຕ່າງ​ປະເທດ​ລາວ ມະຫາຊົນ ໃນ​ນາມ​ທີ່ເປັນ​ທະນາຄານ​ທຸລະ​ກິດ​ໃນ​ແຖວໜ້າ​ຂອງ ​ສປປ ລາວ ປັດຈຸບັນມີ 19 ສາຂາ 80 ໜ່ວຍ​ບໍລິການ ພ້ອມ​ດ້ວຍ​ມີ​ການ​ນຳ​ໃຊ້​ເຕັກ​ໂນໂລ​ຊີ​ເຂົ້າ​ໃນ​ການ​ບໍລິການ​ໃຫ້​ມີຄວາມ​ທັນ​ສະໄໝ ໃນ​ປີ 2017 ​ທຄຕລ ມີ​ແຜນ​ຂະຫຍາຍ​ສາຂາໃໝ່ 1 ສາຂາ ແລະ ຂະຫຍາຍໜ່ວຍ​ບໍລິການ​ທັງ​ໝົດ 13 ໜ່ວຍບໍລິການ ເພື່ອ​ອຳນວຍ​ຄວາມ​ສະດວກ​ໃຫ້​ແກ່​ລູກ​ຄ້າ​ຢູ່​ໃນ​ເຂດຕ່າງໆ ໃຫ້​ສາມາດ​ເຂົ້າ​ເຖິງ​ການບໍລິການ​ຂອງ​ທະນາຄານ​ໄດ້​ດີ​ຍິ່ງຂຶ້ນ. (ຫນັງສືພິມວຽງຈັນໃຫ່ມ)