ຫາລືແກ້ໄຂພາຫະນະທີ່ນຳເຂົ້າບໍ່ຖືກຕ້ອງ

ໃນ​ວັນ​ທີ 6 ກຸມພາ 2017 ທີ່​ຫ້ອງ​ປະຊຸມ​ລັດ​ວິ​ສາ​ຫະ​ກິດລາວ​ບໍລິການ​ສິນຄ້າ​ຜ່ານ​ແດນ ໄດ້​ມີ​ກອງ​ປະຊຸມ​ປຶກສາ​ຫາລື​ເຖິງວິທີ​ການ​ແກ້​ໄຂ ​ພາຫະນະ​ທີ່​ນຳເຂົ້າ​ບໍ່​ຖືກຕ້ອງ ເປັນ​ປະທານ​ຂອງທ່ານ ບຸນ​ໂຈມ ອຸບົນ​ປະເສີດ ຮອງ​ລັດຖະມົນຕີ​ກະຊວງ​ການເງິນ ມີ​ຫົວໜ້າ​ກົມ ຫົວໜ້າ​ດ່ານ ຮອງ​ຜູ້ອຳນວຍການ​ລັດ​ວິ​ສາ​ຫະກິດ​ລາວ​ບໍລິການ​ສິນຄ້າ​ຜ່ານແດນ ພ້ອມ​ດ້ວຍ​ພາກສ່ວນ​ກ່ຽວຂ້ອງ​ເຂົ້າ​ຮ່ວມ.
ກອງ​ປະຊຸມ​ໄດ້​ປຶກສາ​ຫາລື ​ວິທີ​ການ​ດຳເນີນ​ແກ້​ໄຂ​ພາຫະນະຈຳນວນ​ໜຶ່ງ ​ທີ່​ຜູ້​ປະກອບ​ການ​ບໍ​ລິສັດ ຫຼື ບຸກຄົນ​ທີ່​ນຳ​ເຂົ້າ​ມີ​ຈຸດ​ປະສົງ​ເພື່ອ​ສົ່ງ​ອອກ​ຕໍ່ ຫຼື ຈຳໜ່າຍພາຍ​ໃນ​ ໃຫ້​ຮີບ​ຮ້ອນເຂົ້າ​ມາ​ພົວພັນ​ກັບ​ຄະນະ​ກຳມະການ​ຜູ້​ທີ່​ຮັບຜິດ​ຊອບ​ວຽກ​ງານ​ດັ່ງກ່າວ ເພື່ອປຶກສາ​ຫາລື​ແກ້​ໄຂ​ໃນ​ແຕ່​ລະ​ກໍລະ​ນີ ​ທີ່​ນຳ​ເຂົ້າ​ເກີນ​ກຳນົດ​ເວລາທີ່​ກົດໝາຍ​ພາສີ​ກຳນົດ​ໄວ້ ເຊິ່ງມີ​ລາຍ​ລະອຽດ​ດັ່ງນີ້: ສຳລັບ​ບັນຊີ​ພາຫະນະ​ຄ້າງ​ສາງແຕ່​ປີ 2012-2015 ມີ 40 ກວ່າ​ຄັນ ແລະ ບັນຊີ​ຄ້າງ​ສາງ​ກາຍ 4 ເດືອນ ມີ 100 ກວ່າ​ຄັນ ສ່ວນລາຍ​ລະອຽດ​ຂອງ​ປະເພດ​ລົດແມ່ນ​ໃຫ້​ບຸກຄົນ ຫຼື ບັນດາ​ບໍ​ລິສັດ​ຕ່າງໆ ​ປະສານ​ກັບ​ຄະນະ​ຮັບຜິດ​ຊອບ​ວຽກ​ງານ​ລົງ​ກວດກາເບິ່ງ​ຕົວ​ຈິງ​ ຢູ່​ສາງ​ສິນຄ້າ​ຜ່ານແດນ (C-Y). (ຫນັງສືພິມວຽງຈັນໃຫ່ມ)