ສປ ຈີນ ຊ່ວຍເຫຼືອໂຄງການປ້ອງກັນ-ຄວບຄຸມການລະບາດຂອງຕັກແຕນ

 ພິທີ​ລົງ​ນາມ​ມອບ-ຮັບ​ເຄື່ອງອຸປະກອນ​ຂອງ​ໂຄງການ​ຊ່ວຍເຫຼືອ​ລ້າ ຈາກ​ລັດຖະບານ ​ສປ ຈີນ ໃຫ້​ແກ່​ລັດຖະບານ ​ສປປ ລາວ ເພື່ອ​ປ້ອງ​ກັນ ແລະ ຄວບຄຸມ​ການ​ລະບາດຂອງ​ຕັກແຕນ ຝູງ​ໄມ້ປ່ອງ ຊຸດ​ທີ 2 ຈັດ​ຂຶ້ນ​ວັນ​ທີ 4 ພຶດສະພາ 2017 ທີ່​ສູນ​ປ້ອງກັນ​ພືດ ທີ່​ນະຄອນ​ຫຼອງ​ວຽງ​ຈັນ ລະຫວ່າງ​ທ່ານ ຫວັງ​ສີ ໂຫຍ່ ທູດ​ເສດຖະກິດ ແຫ່ງ ​ສປ ຈີນ ປະຈຳ ​ສປປ ລາວ ແລະ ທ່ານ ວິໄລ​ສຸກ ເຄນ​ນະ​ວົງ ຫົວໜ້າກົມ​ປູກຝັງ ກະຊວງ​ກະສິກຳ ແລະ ປ່າໄມ້ ມີ​ທ່ານ ລຽນ ທິແກ້ວ ລັດຖະມົນຕີ​ກະຊວງ​ກະ​ສິກຳ ແລະ ປ່າໄມ້ ພ້ອມ​ດ້ວຍ​ພາກສ່ວນ​ກ່ຽວຂ້ອງ​ເຂົ້າ​ຮ່ວມ.

ທ່ານ ສີ​ຣິ​ພົນ ພິ​ທັກ​ສູນ ຫົວໜ້າສູນ​ປ້ອງ​ກັນ​ພືດ​ກົມ​ປູກຝັງ​ກະຊວງ​ກະສິກຳ ແລະ ປ່າໄມ້ ກ່າວວ່າ: ສຳລັບ​ວັດຖຸ​ອຸປະກອນ ແລະ ພາຫະນະ​ຕ່າງໆ​ທີ່​ນຳ​ມາ​ຊ່ວຍເຫຼືອ​ງວດ​ທີ 2 ນີ້ ລວມ​ມີ​ພາຫະນະ ຈຳນວນ 21 ຄັນ ອຸປະກອນສີດ​ພົ່ນ​ຢາ​ປາບ​ສັດຕູ​ພືດ 1.100 ເຄື່ອງ ຊຸດ​ປ້ອງ​ກັນ 1.000 ຊຸດ ແລະ ເຄື່ອງມື​ຮັບ​ໃຊ້​ການ​ສຳຫຼວດ​ຈຳນວນ​ໜຶ່ງ.