ຄວາມຄືບໜ້າການສ້າງເສັ້ນທາງລົດໄຟລາວ-ຈີນຢູ່ແຂວງຫຼວງພະບາງ

ເສັ້ນທາງ​ລົດ​ໄຟ​ມີ​ຄວາມ​ຍາວ​ທັງ​ໝົດ 417 km,ຈາກ​ຊາຍ​ແດນ​ລາວ​-ຈີນ ຫາ ນະຄອນຫຼວງ​ວຽງຈັນ,ຜ່ານ 5 ​ແຂວງ​ຂອງ​ລາວ​ຄື: ​ແຂວງ​ຫຼວງ​ນໍ້າ​ທາ,ອຸດົມ​ໄຊ,ຫຼວງ​ພະ​ບາງ,ວຽງ​ຈັນ ​ແລະ ນະຄອນຫຼວງ​ວຽງ​ຈັນ,ປະກອບ​ມີ 32 ສະຖານີ,ຂົວ 167​ ​ແຫ່ງ,ອຸມົງ 75 ​ແຫ່ງ.ສະ​ເພາະ​ແຂວງ​ຫຼວງ​ພະ​ບາງ​ມີ 6 ສະຖານີ,​ໃນ​ນີ້​ສະຖານີ​ໃຫຍ່ 1 ​ແຫ່ງ​ຕັ້ງ​ຢູ່​ບ້ານ​ພິກ​ນ້ອຍ ​ເມືອງ​ຫຼວງ​ພະ​ບາງ ​ແລະ ສະຖານີ​ນ້ອຍ 5 ​ແຫ່ງ​ຄື: ຢູ່​ເມືອງ​ຈອມ​ເພັດ 2 ​ແຫ່ງ ​ແລະ ​ເມືອງ​ຊຽງ​ເງິນ 3​ ​ແຫ່ງ.​ເສັ້ນທາງ​ຜ່ານ​ແຂວງ​ຫຼວງ​ພະ​ບາງ​ມີ 80 km,ຜ່ານ 3 ​ເມືອງ 29 ບ້ານ​ຄື: ​ເມືອງ​ຫຼວງ​ພະ​ບາງ 11 km,ມີ 8 ບ້ານ,ຜ່ານ​ເມືອງ​ຈອມ​ເພັດ 19 km,ມີ 7 ບ້ານ ​ແລະ ​ເມືອງ​ຊຽງ​ເງິນ 50 km,ມີ 14 km.​​ມີ​ຂົວ 30 ​ແຫ່ງ​ໃນ​ນັ້ນລົງມື​ກໍ່​ສ້າງ​ແລ້ວ 2 ​ແຫ່ງຄື: ຂົວ​ຂ້າມ​ນໍ້າຂອງ ​ແລະ ອຸມົງ 22 ​ແຫ່ງ​ລົງມື​ກໍ່ສ້າງ​ແລ້ວ 9 ​ແຫ່ງ.ນອກ​ນີ້​ແຂວງ​ຫຼວງ​ພະ​ບາງ​ຍັງ​ໄດ້​ຮັບຜິດຊອບ 2 ຊ່ວງ​ສັນຍາ​ຄື: ຊ່ວງ​ສັນຍາ​ທີ 3 ຮັບ​ເໝົາ​ກໍ່ສ້າງ​ໂດຍ​ກຸ່ມບໍລິສັດ​ທາງ​ລົດ​ໄຟ​ເລກ 8 ສປ ຈີນ ​ແລະ ຊ່ວງ​ສັນຍາ​ທີ 4 ຮັບ​ເໝົາ​ກໍ່ສ້າງ​ໂດຍ​ກຸ່ມ​ບໍລິສັດ ຊີ​ໂນ​ຮີ​ໂດຣ.

ທ່ານ ຈັນທະ​ວົງ ຜົນ​ນະ​ຈິດ ຫົວໜ້າ​ພະ​ແນ​ກຊັບພະຍາກອນ​ທໍາ​ມະ​ຊາດ ​ແລະ ສິ່ງ​ແວດ​ລ້ອມ​ແຂວງ​ຫຼວງ​ພະ​ບາງ​ໃນ​ນາມ​ເປັນ​ຄະນະ​ຮັບຜິດຊອບ​ໂຄງການ​ກໍ່ສ້າງ​ລົດ​ໄຟ​ລາວ​-ຈີນຢູ່ທີ່​​ແຂວງຫຼວງ​ພະ​ບາງ ​ໄດ້​ໃຫ້​ຮູ້​ວ່າ: ການຈັດ​ຕັ້ງ​ປະຕິບັດ​ໂຄງການ​ດັ່ງກ່າວ ທາງ​ແຂວງ​ຫຼວງ​ພະ​ບາງ​ໄດ້​ແຕ່ງ​ຕັ້ງ​ຄະນະ​ກໍາມະການ​ຕາມ​ຂໍ້​ຕົກລົງ​ຂອງ​ເຈົ້າ​ແຂວງ​ຫຼວງ​ພະ​ບາງ,ສະບັບ​ເລກ​ທີ່ 601/ຈຂ.ຫຼບ,ລົງ​ວັນ​ທີ່ 2 ພະຈິກ 2016 ຈົນ​ຮອດ​ປະຈຸ​ບັນ​ແມ່ນ​ສາມາດ​ປະ​ເມີນ​ຄວາມ​ຄື​ບໜ້າ​ໄດ້​ຫຼາຍ​ດ້ານ​ຄື: ມີ​ປະຊາຊົນ​ໄດ້​ຮັບ​ຜົນ​ກະທົບ 29 ບ້ານ, 241 ຄອບຄົວ,​ໃນ​ນັ້ນ​ດິນ​ທໍາ​ການ​ຜະລິດ 253 ຕອນ,ມີ​ເນື້ອ​ທີ່​ທັງ​ໝົດ 92.691 ​ເຮັກຕາ,ຕົ້ນ​ໄມ້​ປະ​ເພດ​ຕ່າງໆ 60.291 ຕົ້ນ,​ເຄື່ອງ​ປູກ​ປະ​ເພດ​ສຸມ,ສິ່ງ​ປຸກ​ສ້າງ 145 ຫຼັງ,​ເຮືອນ​ຢູ່​ອາ​ໄສ 104 ຫຼັງ​ທີ່​ຈໍາ​ເປັນຕ້ອງຍົກຍ້າຍ​ໄປ​ບ່ອນ​ໃໝ່,​ໂຮງຮຽນປະຖົມ 5 ​ຫຼັງ,​ເລົ້າ​ເຂົ້າ​ສາມັກຄີ 1 ບ້ານ,ສະ​ໂມ​ສອນ 1 ຫຼັງ.​ໃນ​ນັ້ນ​ໄດ​ສໍາ​ເລັດ​ການຈັດ​ສັນ​ຊົ່ວຄາວ​ໃຫ້ 3 ຄອບຄົວ​ທີ່​ຖຶກຜົນ​ກະທົບ​ຕໍ່​ການ​ສ້າງ​ອຸມົງ ​ໂດຍ​ການ​ເຊົ່າ​ເຮືອນ​ໃຫ້ ​ແລະ ຍັງ​ຢູ່​ໃນ​ຂັ້ນ​ຕອນ​ຄົ້ນ​ຄ້ວາ​ຈັດ​ສັນ​ທີ່​ດິນ​ຊົດ​ເຊີຍ.ສໍາ​ເລັດ​ການ​ເກັບ​ຂໍ້​ມູນ​ທີ່​ດິນ​ເພື່ອ​ກໍ່ສ້າງຕາ​ຂ່າຍ​ໄຟຟ້າ ​ເຂົ້າ​ຫາ​ຈຸດ​ກໍ່ສ້າງ​ອຸມົງ ​ແລະ ກໍ່ສ້າງ​ຕາ​ຂ່າຍ​ໄຟຟ້າ​ຂ້າມ​ນໍ້າຂອງ​ໄປ​ຫາ​ເມືອງ​ຈອມ​ເພັດ,ສໍາ​ເລັດ​ການ​ກໍານົດ​ຈຸດ​ທີ່​ຕັ້ງ​ສາງ​ມ້ຽນ​ວັດ​ສະດຸ​ຂອງ​ບໍລິສັດ​ຮັບ​ເໝົາ​ກໍ່ສ້າງ,ສໍາ​ເລັດ​ການ​ກໍານົດ​ຈຸດ​ຖິ້ມ​ດິນ​ການ​ເຈາະ​ອຸມົງ,ຈັດ​ກອງ​ປະຊຸມ​ຄົ້ນ​ຄ້ວາ​ພິຈາລະນາ​ກໍານົດ​ລາຄາ​ຫົວໜ່ວຍ​ຄ່າ​ຊົດ​ເຊີຍ​ສິ່ງ​ກີດຂວາງ​ຂອງ​ໂຄງການ​ກໍ່ສ້າງ​ທາງ​ລົດ​ໄຟ​ລາວ-ຈີນ ​ແລະ ​ໄດ້​ລົງ​ເຜີຍ​ແຜ່​ສຶກສາ​ອົບຮົມ​ແນວ​ຄິດ​ໃຫ້​ປະຊາຊົນ​ໄດ້ 23 ບ້ານ ​ແລະ ພວມ​ຈັດ​ຕັ້ງ​ປະຕິບັດ​ອີກ 6 ບ້ານ​ຢູ່​ເມືອງ​ຊຽງ​ເງິນ.ຄຽງ​ຄູ່​ກັນ​ນັ້ນ​ການ​ຈັດ​ຕັ້ງ​ປະຕິບັດ​ໂຄງການ​ດັ່ງກ່າວ​ຍັງ​ພົບ​ບັນຫາ​ຫຍຸ້ງ​ຫຍາ​ກຫຼາຍ​ດ້ານ​ເປັນ​ຕົ້ນ​ແມ່ນ​ການ​ກໍ່ສ້າງ​ຢູ່​ບາງ​ບ່ອນ​ຂອງ​ບໍ​ລິ​ສັດ​ຮັບ​ເໝົາ​ກໍ່ສ້າງ​ມີ​ລັກ​ສະນະຟ້າວ​ຟັ່ງ ​ແຕ່​ການ​ເກັບ​ກໍາ​ຂໍ້​ມູນ​ບໍ່​ທັນ​ສໍາ​ເລັດ,ການປະຕິບັດ​ວຽກ​ງານ​ໄກ​ເກ່ຍຍັງ​ພົບ​ຄວາມ​ຫຍຸ້ງ​ຫຍາ​ກ ​ເນື່ອງ​ຈາກ​ຍັງ​ບໍ່​ທັນ​ໄດ້​ກໍານົດ​ຄ່າ​ຫົວໜ່ວຍ​ຊົດ​ເຊີຍ ​ເຮັດ​ໃຫ້​ຜູ້​ຖຶກຜົນ​ກະທົບ​ຂາດ​ຄວາມ​ເຊື່ອ​ໝັ້ນ ​ແລ​ະ ການ​ປະສານ​ສົມທົບ​ລະຫວ່າງ​ວິຊາ​ການ​ຂອງ​ບໍລິສັດ​ຮັບ​ເໝົາ​ກໍ່ສ້າງ ​ແລະ ວິຊາ​ການ​ຂອງ​ແຂວງ​ຍັງ​ເຮັດ​ບໍ່​ທັນ​ໄດ້​ດີ ​ແລະ ມີ​ບາງ​ຄັ້ງ​ກໍ່​ຊັກ​ຊ້າ.