ກອງປະຊຸມໃຫຍ່ ຄັ້ງທີ III ຂອງອົງຄະນະພັກສູນກາງສະຫະພັນແມ່ຍິງລາວ

ກອງ​ປະຊຸມ​ໃຫຍ່ ​ຄັ້ງ​ທີ III ຂອງອົງຄະ​ນະ​ພັກ​ສູນ​ກາງ​ສະຫະພັນແມ່ຍິງ​ລາວ ໄດ້​ຈັດ​ຂຶ້ນ​ວັນ​ທີ 29 ກໍລະກົດ 2016 ທີ່​ສູນ​ກາງ​ສະຫະພັນ​ແມ່ຍິງ​ລາວ ເປັນ​ປະທານຂອງ​ສະຫາຍ ​ດຣ. ນາງ ອິນ​ລາວັນ ແກ້ວ​ບຸນ​ພັນ ກຳມະການ​ສູນກາງ​ພັກ ວ່າການ​ເລຂາ​ຄະນະພັກ ປະທານ​ສູນ​ກາງ​ສະຫະພັນແມ່ຍິງ​ລາວ ໂດຍ​ໃຫ້​ກຽດ​ເຂົ້າຮ່ວມ​ຂອງ​ສະຫາຍ ​ປອ. ໄຊ​ສົມພອນ ພົມວິຫານ ກຳມະການ​ກົມການເມືອງ​ສູນ​ກາງ​ພັກ ປະທານສູນ​ກາງ​ແນວ​ລາວ​ສ້າງ​ຊາດ ບັນດາ​ກຳມະການ​ສູນ​ກາງ​ພັກ ຜູ້ແທນ​ສົມບູນ ແລະ ແຂກ​ຖືກເຊີນ.
ກອງ​ປະຊຸມ​ຄັ້ງ​ນີ້ ໄດ້​ສະຫຼຸບ​ຕີລາຄາ​ຜົນສຳເລັດ​ການຈັດຕັ້ງ​ປະຕິ​ບັດ ​ມະຕິ​ກອງ​ປະຊຸມ​ໃຫຍ່ ຄັ້ງ​ທີ II ຈາກ​ພຶດຕິ​ກຳ​ຕົວ​ຈິງ​ຕະຫຼອດໄລຍະ 5 ປີ (2011-2015) ພ້ອມທັງ​ກຳນົດ​ທິດ​ທາງ​ລວມ ຄາດໝາຍ​ສູ້​ຊົນ ແລະ ໜ້າທີ່​ວຽກງານຈຸດ​ສຸມ​ໃນ​ໄລຍະ 5 ປີ​ຕໍ່ໜ້າ (2016-2020).
ຕະຫຼອດ​ໄລຍະ 5 ປີ ຄະນະພັກ​ສູນ​ກາງ​ສະຫະພັນ​ແມ່ຍິງລາວ ໄດ້​ເອົາໃຈໃສ່​ສຶກ​ສາ​ອົບຮົມແນວ​ຄິດ-ການເມືອງ ນຳພາ​ຄົ້ນຄວ້າ​ເຊື່ອມ​ຊຶມ​ແນວທາງ​ນະ​ໂຍບາຍ ມະຕິ​ຄຳ​ສັ່ງ ກົດໝາຍ ແລະ ລະບຽບ​ການ​ຕ່າງໆ​ຂອງພັກ-ລັດເປັນ​ປົກກະຕິ ຊຸກຍູ້​ຂະບວນ​ການ​ວຽກ​ງານ 3 ດີ ປັດ​ຈຸບັນ ແມ່ຍິງ​ບັນດາເຜົ່າ​ໃນ​ເກນອາຍຸ​ເປົ້າ​ໝາຍ 15-45 ປີ ສາມາດ​ລົບ​ລ້າງ​ຄວາມ​ບໍ່​ຮູ້​ໜັງສື​ໄດ້ 942.018 ຄົນ ຍິງ 527.898 ຄົນ ຈົບ​ຊັ້ນ​ປະຖົມ​ບຳລຸງ 640.743 ຄົນ ຍິງ 338.739 ຄົນ ແລະ ພວມ​ສືບຕໍ່​ຮຽນ​ຕາມເງື່ອນໄຂ ພ້ອມ​ທັງ​ເປັນ​ເຈົ້າ​ການ ຄົ້ນຄວ້າ​ປະກອບ​ຄຳ​ເຫັນ​ຕໍ່​ຮ່າງກົດໝາຍ​ນິຕິ​ກຳ​ຕ່າງໆ ໂຄສະນາ ເຜີຍແຜ່​ລັດ​ຖະ​ທຳ​ມະນູນ ລວມທັງ​ສົນທິສັນຍາ​ທີ່​ພົວພັນ​ເຖິງ​ສິດຜົນ​ປະໂຫຍດ​ອັນ​ຊອບ​ທຳ​ຂອງແມ່ຍິງ ແລະ ເດັກນ້ອຍ ຂະຫຍາຍ​ວຽກ​ງານ​ໃຫ້​ຄຳ​ປຶກສາ ແລະ ປົກ​ປ້ອງ​ແມ່ຍິງ-ເດັກນ້ອຍ ໄດ້ 52 ບ້ານ 57 ເມືອງ 11 ແຂວງ ຈັດ​ອົບຮົມ​ຍົກ​ລະດັບຄວາມ​ຮູ້​ກ່ຽວ​ກັບ​ການ​ໃຫ້​ຄຳ​ປຶກສາ​ໄດ້ 18 ຄັ້ງ ມີ​ຜູ້​ເຂົ້າ​ຮ່ວມ 889 ຄົນ ຍິງ 294 ຄົນ.
ໄປ​ຄຽງ​ຄູ່​ກັນ​ນີ້ ກໍ່​ໄດ້​ສົ່ງເສີມການ​ສ້າງ​ວຽກ​ເຮັດ​ງານ​ທຳ ສ້າງເສດຖະກິດ​ຄອບຄົວຕາມ​ເງື່ອນໄຂ​ຕົວ​ຈິງ ຖືກ​ກົດໝາຍ ເປັນຕົ້ນ ການ​ປູກຝັງ​ລ້ຽງສັດ ຫັດຖະກຳ ການ​ຄ້າຂາຍ ແລະ ກິດຈະກຳອື່ນໆ ເອົາໃຈໃສ່​ສຶກ​ສາ​ອົບຮົມວິຊາ​ຊີບ​ໃຫ້​ແມ່ຍິງ​ຜູ້​ທຸກ​ຍາກດ້ອຍ​ໂອກາດ​ຢູ່​ ຂັ້ນ​ສູນ​ກາງ ແລະ ທ້ອງຖິ່ນ ໄດ້​ທັງ​ໝົດ 7.373 ຄົນ ຍິງ 7.293 ຄົນ.
ສຳລັບ​ຄາດໝາຍ​ສູ້​ຊົນ 5 ປີຕໍ່ໜ້າ ​ສືບຕໍ່​ແນວ​ຄິດ-ການເມືອງ​ໃຫ້​ຖັນ​ແຖວສະມາຊິກ​ພັກ ພະນັກງານ ປັບປຸງການຈັດຕັ້ງ ສູ້​ຊົນ​ຮັກສາ​ນາມ​ມະຍົດ​ໜ່ວຍ​ພັກ​ແຂງ-ຮູ້​ນຳພາ​ຮອບດ້ານ ສ້າງ​ສະມາຊິກ​ພັກ​ແຂງຮອບດ້ານ​ໃຫ້​ໄດ້ 90% ຂຶ້ນ​ໄປ ປັບປຸງ​ແບບແຜນ​ວິທີ​ເຮັດ​ວຽກຢ່າງ​ປະດິດ​ສ້າງ ປຸກລະດົມ​ແມ່ຍິງ​ລາວ​ບັນດາເຜົ່າ ​ເຂົ້າ​ຮ່ວມປະຕິບັດ​ມະຕິ​ກອງ​ປະຊຸມ​ໃຫຍ່ ຄັ້ງ​ທີ X ຂອງ​ພັກ ມະຕິ​ກອງ​ປະຊຸມ​ໃຫຍ່​ຜູ້​ແທນ​ແມ່ຍິງ​ປະຕິບັດແຜນ​ພັດທະນາແມ່ຍິງ 8 ແຜນ​ງານ 34 ໂຄງການ ຊຸກຍູ້​ຂະ​ບວນ​ການ​ຂໍ້​ແຂ່ງຂັນ 3 ດີ ຕິດ​ພັນ​ກັບ​ຂະ​ບວນ​ການແຂ່ງຂັນ​ຮັກ​ຊາດ ແລະ ພັດ​ທະນາຕາມ​ທິດ 3 ສ້າງ ໃຫ້​ເປັນ​ຂະບວນ​ກວ້າງຂວາງ ພ້ອມ​ທັງ​ເພີ່ມທະວີ​ການ​ພົວພັນ​ຮ່ວມ​ມື​ກັບ​ອົງການຈັດຕັ້ງ​ແມ່ຍິງ​ ບັນດາ​ປະເທດ​ເພື່ອນ​ມິດ​ຍຸດ​ທະ​ສາດ ປະເທດ​ອາ​ຊຽນ ແລະ ສາກົນ.
ກອງ​ປະຊຸມ​ຄັ້ງ​ນີ້ ຜູ້​ແທນ​ສົມບູນ​ຍັງ​ໄດ້​ໃຊ້​ສິດ​ປະຊາທິປະໄຕຂອງ​ຕົນ ​ປ່ອນ​ບັດ​ຄັດ​ເລືອກ​ເອົາຄະນະ​ພັກ​ສູນ​ກາງ​ສະຫະພັນ​ແມ່ຍິງ​ລາວ ສະໄໝ​ທີ III ຈຳນວນ 9 ສະຫາຍ ໃນ​ນັ້ນ ເລືອກ​ເອົາ​ຄະນະ​ປະຈຳ 3 ສະຫາຍ ໂດຍ​ເປັນເອກະສັນ​ເລືອກ​ເອົາ​ສະຫາຍ ​ດຣ. ນາງ ອິນ​ລາ​ວັນ ແກ້ວ​ບຸນພັນ ເປັນ​ເລຂາ ສະຫາຍນາງ ທຸມມາ​ລີ ວົງ​ພະຈັນ ເປັນ​ຮອງເລຂາ ທັງ​ເປັນ​ປະທານ​ກວດກາ ສະຫາຍ​ນາງ ຈອມ​ແພງ ພູມ​ປັນຍາ ເປັນ​ຄະນະ ແລະ ສະຫາຍນາງ ເຫຼັກ ແສນ​ຄຳ​ວົງສາ ເປັນຮອງ​ປະທານ​ກວດກາ.[post_ad]