ຈີນ​ປະ­ກາດ​ສືບ­ຕໍ່​ປາບ​ປາມ​ການ​ສໍ້​ລາດ​ບັງ​ຫຼວງ

ຕາມ​ຂ່າວ​ຈາກ​ປັກ​ກິ່ງ ເມື່ອ​ວັນ ທີ 28 ທັນ­ວາ​ນີ້ ທ່ານ​ເລ­ຂາ​ທິການ​ໃຫຍ່ພັກ​ກອມ​ມູ​ນິດ​ຈີນ ສີ ຈິ້ນ​ຜິງ ໄດ້​ເປັນ​ປະ­ທານກອງ​ປະຊຸມ​ຂອງ​ກົມ​ການ­ເມືອງ ຄະ­ນະບໍ­ລິ­ຫານ​ງານ​ສູນ​ກາງ​ພັກ​ກອມມູ​ນິດ​ຈີນ ເພື່ອ​ຄົ້ນ­ຄວ້າ​ກ່ຽວ​ກັບຄວາມ​ຊື່­ສັດ​ຢູ່ພາຍ​ໃນ​ພັກ ແລະ ຕ້ານ​ການ​ສໍ້​ລາດ​ບັງ​ຫຼວງ ກອງປະ­ຊຸມ​ດັ່ງ­ກ່າວ​ເນັ້ນ​ໜັກ​ວ່າ ໃນ​ປີ 2017 ທີ່​ຈະ​ມາ​ເຖິງ​ນີ້ ພັກ​ກອມມູ​ນິດ​ຈີນ ຈະ​ສືບ­ຕໍ່​ປັບ­ປຸງ​ການ​ດຳເນີນ​ຊີ­ວິດ​ການ­ເມືອງ​ພາຍ​ໃນ​ພັກຢ່າງ​ເຂັ້ມ​ງວດ ເພີ່ມ​ທະ­ວີ​ວຽກງານ​ການ​ຕິດ­ຕາມ​ກວດ­ກາພາຍໃນ​ພັກ ລົງ​ເລິກ​ການ​ປະ­ຕິ​ຮູບ​ອົງປະ­ກອບ​ການ​ຕິດ­ຕາມ​ກວດ­ກາແຫ່ງ​ຊາດ ເພີ່ມ​ທະ­ວີ​ການ​ຕິດຕາມ​ກວດ­ກາ​ສະ­ພາບ​ການ ການປະ­ຕິ­ບັດ​ກົດ​ລະ­ບຽບ ແລະ ຄວາມຮັບ­ຜິດ­ຊອບ ຫັນ​ບັນ­ຍາ­ກາດພາຍ​ໃນ​ພັກ​ໃຫ້​ໂປ່ງ​ໃສ​ຂາວ​ສະອາດ.
ຄຽງ​ຄູ່​ກັນ​ນັ້ນ ພັກ​ກອມ​ມູ​ນິດຈີນ ກໍ່​ຢືນ­ຢັນ​ເຖິງ​ຄວາມ​ຕັດ­ສິນໃຈ​ຍູ້​ໃຫ້­ການ​ສໍ້​ລາດ​ບັງ​ຫຼວງ​ຖອຍໄປ ແລະ ຄວບ​ຄຸມ​ສະ­ພາບ​ການສໍ້​ລາດ​ບັງ​ຫຼວງ ລົງ​ເລິກ​ການ​ກໍ່ສ້າງ​ຄວາມ​ຊື່­ສັດ ແລະ ຕ້ານການ​ສໍ້​ລາດ​ບັງ​ຫຼວງ​ຢູ່​ໃນ​ພັກ ຈາກ​ນັ້ນ​ກໍ່​ເປັນ​ການຊ່ວຍ​ໃຫ້​ປະຊາ​ຊົນ​ເຫັນ​ໄດ້​ເຖິງ​ປະ​ສິດ­ທິ​ຜົນຕົວ​ຈິງ​ຂອງ​ນະ­ໂຍ­ບາຍ​ຂອງ​ພັກ.