ຄະນະກໍາມາທິການແຫ່ງຊາດ ເພື່ອການພັດທະນາຊັບພະຍາກອນມະນຸດ ໄຂກອງປະຊຸມຄົບຄະນະ ຄັ້ງທີ V

     ກອງປະຊຸມຄົບຄະນະ ຄັ້ງທີ V ຂອງຄະນະກໍາມາທິການແຫ່ງຊາດ ເພື່ອພັດທະນາຊັບພະຍາກອນມະນຸດ ກະຊວງສຶກສາທິການ ແລະກີລາ ໄດ້ຈັດຂຶ້ນໃນຕອນເຊົ້າວັນທີ 27 ທັນວາ 2016 ທີ່ໂຮງແຮມລ້ານຊ້າງ ນະຄອນຫຼວງວຽງຈັນ ໂດຍການເປັນປະທານຂອງທ່ານນາງ ແສງເດືອນ ຫຼ້າຈັນທະບູນ ລັດຖະມົນຕີກະຊວງສຶກສາທິການ ແລະກີລາ ມີຄະນະກໍາມາທິການແຫ່ງຊາດ ເພື່ອພັດທະນາຊັບພະຍາກອນມະນຸດ ຄະນະປະສານງານບັນດາກະຊວງ ອົງການທຽບເທົ່າ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

     ທ່ານລັດຖະມົນຕີກະຊວງສຶກສາທິການ ແລະກີລາ ໄດ້ກ່າວຢູ່ທີ່ປະຊຸມວ່າ ກອງປະຊຸມໃນຄັ້ງນີ້ມີຄວາມສໍາຄັນຍິ່ງສໍາລັບຂະແໜງການສຶກສາ ເພື່ອຄົ້ນຄວ້າກ່ຽວກັບວິທີປະຕິບັດ ວິທີການຜັນຂະຫຽາຍ ແລະ ປະຕິບັດຍຸດທະສາດການພັດທະນາຊັບພະຍາກອນມະນຸດແຫ່ງຊາດ ແຕ່ນີ້ຮອດປີ 2025 ເຊິ່ງແມ່ນນະໂຍບາຍຂອງພັກ ແລະ ລັດຖະບານໃນໄລຍະ 10 ປີ ແຕ່ການຈັດຕັ້ງຜັນຂະຫຽາຍ ແລະ ປະຕິບັດຍຸດທະສາດັ່ງກ່າວຍັງບໍ່ເປັນຮູບປະທໍາ ແລະ ບໍ່ທັນເປັນເອກະພາບລະຫວ່າງຂະແໜງການຕ່າງໆນັບແຕ່ສູນກາງລົງຮອດທ້ອງຖິ່ນ ໂດຍສະເພາະແມ່ນການປະຕິບັດແຜນງານການພັດທະນາຊັບພະຍາກອນມະນຸດ 5 ປີ (2016-2020) ແລະ ແຜນແຕ່ລະປີໃຫ້ເປັນລະອຽດ ແລະ ສາມາດປະຕິບັດໄດ້ ເຊິ່ງແຜນງານດັ່ງກ່າວນີ້ຕ້ອງອີງໃສ່ສະພາບບັນຫາ ແລະ ນິຕິກໍາທີ່ມີແລ້ວ ໂດຍກວມເອົາທຸກຂະແໜງການທີ່ສໍາຄັນ ຕ້ອງກໍານົດແຈ້ງກ່ຽວກັບບຸກຄະລາກອນຢູ່ແຕ່ລະຂະແໜງການ ທັງນີ້ເພື່ອເຮັດໃຫ້ຮັບປະກັນແກ່ການປະຕິບັດຍຸດທະສາດດັ່ງກ່າວໃຫ້ມີປະສິດທິຜົນ ເພື່ອຜົນປະໂຫຽດຂອງຊາດ.

     ຜ່ານການຄົ້ນຄວ້າ ພິຈາລະນາ ປະກອບຄໍາຄິດຄໍາເຫັນຢ່າງກົງໄປກົງມາ ແລະ ສ້າງສັນ ບັນດາຄະນະຜູ້ແທນກອງປະຊຸມກໍມີຄວ່າມເປັນເອກະພາບກັນຮັບຮອງເອົາຮ່າງຍຸດທະສາດການພັດທະນາຊັບພະຍາກອນມະນຸດແຫ່ງຊາດ ຮອດປີ 2025 ສະບັບປັບປຸງ ພ້ອມທັງຮ່າງແຜນປະຕິບັດງານການພັດທະນາຊັບພະຍາກອນມະນຸດປີ 2016-2020 ແລະ ຂອບການຕິດຕາມ ແລະ ປະເມີນຜົນ ພ້ອມທັງນໍາເອົາດໍາລັດຂອງນາຍົກລັດຖະມົນຕີວ່າດ້ວຍການຈັດຕັ້ງປະຕິບັດ ແລະ ການເຄື່ອນໄຫວຂອງຄະນະກໍາມາທິການແຫ່ງຊາດ ເພື່ອພັດທະນາຊັບພະຍາກອນມະນຸດ ຂໍ້ຕົກລົງວ່າດ້ວຍການແບ່ງໜ້າທີ່ຄວາມຮັບຜິດຊອບຂອງຄະນະກໍາມາທິການແຫ່ງຊາດ ເພື່ອພັດທະນາຊັບພະຍາກອນມະນຸດໃນແຕ່ລະຂັ້ນໄປຈັດຕັ້ງຜັນຂະຫຽາຍເຂົ້າໃນວຽກງານໂຕຈິງໃຫ້ປາກົດຜົນເປັນຈິງເທື່ອລະກ້າວ.

ຂ່າວ/ພາບ: ເທບພະວົງ