ລຸກຊຳບວກ ຈະໃຫ້ການຊ່ວຍເຫຼືອລາວ ມູນຄ່າ 60 ລ້ານເອີໂຣ

ເພື່ອ​ທົບ​ທວນ​ການຈັດຕັ້ງ​ປະຕິ​ບັດ​ແຜນ​ງານ-ໂຄງການ​ຮ່ວມມື​ລະຫວ່າງ​ລັດຖະບານ​ລາວ ແລະ ລັດຖະບານ​ຣາ​ຊະ​ອານາຈັກ​ລຸກ​ຊຳ​ບວກ ປະຈຳ​ປີ 2016 ລາວ-ລຸກ​ຊຳ​ບວກ ໄດ້​ຮ່ວມ​ມື​ກັນນັບ​ແຕ່​ປີ 1996 ເປັນຕົ້ນ​ມາ ເຊິ່ງໃຫ້ການ​ຊ່ວຍເຫຼືອ​ປີ​ລະ 2 ລ້ານເອີ​ໂຣ ມາ​ຮອດ​ປັດຈຸບັນ​ ການຮ່ວມ​ມື​ໄດ້​ມີ​ການ​ຂະຫຍາຍຕົວ ໂດຍ​ສະເພາະແມ່ນ​ແຜນ​ຍຸດ​ທະສາດ​ການ​ຮ່ວມ​ມືທັງ​ສອງ​ຝ່າຍ​ໄລຍະ​ຍາວ (2016-2020) ໃນ​ມູນຄ່າ​ຫຼາຍ​ກວ່າ 60 ລ້ານ​ເອີ​ໂຣ ເປັນ​ເປົ້າ​ໝາຍ​ລວມ​ເພື່ອ​ລຶບລ້າງ​ຄວາມທຸກ​ຍາກ​ຢູ່ ​ສປປ ລາວ ເຊິ່ງ​ເປົ້າ​ໝາຍ​ດັ່ງກ່າວ ແມ່ນ​ສຸມ​ໃສ່​ການ​ພັດທະນາ​ທ້ອງຖິ່ນ​ຊົນນະບົດ ວຽກ​ງານ​ສາ​ທາລະນະ​ສຸກ ອາຊີວະ​ສຶກ​ສາ ການພັດທະນາ​ທັກ​ສະ​ການທ່ອງທ່ຽວ ປົກຄອງ ກົດໝາຍ ແລະ ການຮ່ວມ​ມື​ຫຼາຍ​ຝ່າຍ ໂດຍ​ໃຫ້ການຊ່ວຍເຫຼືອ​ຜ່ານ​ອົງການ​ສະຫະ​ປະຊາ​ຊາດ ອົງການ NGOs ແລະ ການ​ຊ່ວຍເຫຼືອ​ດ້ານ​ມະນຸດ​ສະທຳ.
ວັນ​ທີ 10 ມັງກອນ 2017 ທີ່​ກະຊວງ​ແຜນການ ແລະ ການລົງທຶນ (​ຜທ) ກົມ​ຮ່ວມ​ມື​ສາກົນ ກະຊວງ ​ຜທ ຈັດ​ກອງ​ປະຊຸມ​ຄະນະ​ກຳມາ​ທິ​ການ​ຮ່ວມ​ມື ລະຫວ່າງ​ລັດຖະບານ​ລາວ ແລະ ລັດຖະບານ​ຣາ​ຊະ​ອານາຈັກ​ລຸກຊຳ​ບວກ ໂດຍ​ເປັນ​ປະທານ​ຮ່ວມຂອງ​ທ່ານ ກິ​ແກ້ວ ຈັນທະ​ບູ​ຣີ ຮອງ​ລັດຖະມົນຕີ​ກະຊວງ​ແຜນການ ແລະ ການ​ລົງທຶນ ແລະ ທ່ານ​ນາງ Martine Schommer ຫົວໜ້າ​ກົມ​ຮ່ວມມື​ເພື່ອ​ການ​ພັດທະນາ​ ກະຊວງການ​ຕ່າງປະເທດ​ລຸກ​ຊຳ​ບວກ ມີບັນດາ​ຜູ້ຕາງໜ້າ​ອົງການ​ກ່ຽວຂ້ອງ​ເຂົ້າ​ຮ່ວມ.