ຕ້ານ ແລະ ສະກັດກັ້ນ ການຄ້າຂາຍເຖື່ອນທຸກຮູບແບບ

ວັນ​ທີ 30 ທັນວາ 2016 ພະແນກ​ອຸດສາຫະກຳ ແລະ ການຄ້າ ນະຄອນຫຼວງ​ວຽງ​ຈັນ ໄດ້​ຈັດກອງ​ປະຊຸມ​ສະຫຼຸບ​ການຈັດຕັ້ງ​ປະຕິ​ບັດ​ ວຽກ​ງານ​ອຸດສາຫະກຳ ແລະ ການ​ຄ້າ ປະຈຳ​ສົກ​ປີ 2015-2016 ທິດ​ທາງ​ແຜນການ​ປີ 2017 ຈັດ​ຂຶ້ນ​ທີ່​ພະ​ແນກ​ດັ່ງກ່າວ ເປັນ​ປະທານ​ຂອງ​ທ່ານ ເບີ​ລິນ ເພັດ​ຈັນທະ​ຣາດ ຫົວໜ້າ​ພະ​ແນກອຸດສາຫະກຳ ແລະ ການ​ຄ້າ ນວ.

ໃນ​ພິທີ ທ່ານ​ນາງ ວັນ​ມະນີ ພິມ​ມະ​ສານ ຮອງ​ຫົວໜ້າ​ພະແນກ​ອຸດສາຫະກຳ ແລະ ການຄ້າ ນວ ໄດ້​ຂຶ້ນ​ຜ່ານ​ບົດ​ສະຫຼຸບ ເຫັນ​ວ່າໃນ​ໜຶ່ງ​ປີຜ່ານມາ ​ໄດ້​ສຸມໃສ່​ປະກອບສ່ວນ​ພັດທະນາ​ເສດຖະ​ກິດ​ ຕາມ​ພາລະ​ບົດບາດ ແລະ ໜ້າທີ່​ຂອງ​ຕົນ ໂດຍ​ສະເພາະ ໄດ້ເອົາໃຈໃສ່​ຊຸກຍູ້​ສົ່ງເສີມ​ໃຫ້​ມີການ​ຜະລິດ-ທຸລະ​ກິດ ການ​ຜະລິດ​ເປັນ​ສິນຄ້າ ແລະ ບໍລິການປາຍ​ແຫຼມ​ໃໝ່ ຕາມ​ທິດ​ຍືນ​ຍົງ ໂດຍ​ຖື​ເປັນ​ສຳຄັນ​ໃນ​ການ​ສ້າງມູນ​ຄ່າ​ເພີ່ມ ໃຫ້​ແກ່​ຜະລິດ​ຕະພັນສິນຄ້າ​ທີ່​ເປັນ​ທ່າແຮງ​ຂອງ​ນະຄອນ​ຫຼວງ​ວຽງ​ຈັນ ຜ່ານ​ການ​ຈັດຕັ້ງ​ປະຕິບັດ ສາມາດ​ຍາດ​ໄດ້ຜົນງານ​ຫຼາຍ​ດ້ານ ເຊິ່ງ​ມັນ​ສະແດງໃຫ້​ເຫັນ​ສົກ​ປີ 2015-2016 ມູນຄ່າ​ການ​ຜະລິດ​ອຸດສາຫະກຳ ແລະ ຫັດຖະກຳ ມີ​ທັງ​ໝົດ 5.422 ຕື້​ກີບ ໄດ້​ແກ້​ໄຂ​ບັນຫາສິ່ງແວດລ້ອມ​ຂອງ​ບັນດາ​ໂຮງງານ ຈຳນວນ 10 ແຫ່ງ ແກ້​ໄຂໄດ້​ສຳເລັດ 3 ແຫ່ງ ລົງ​ກວດກາຂໍ​ຂຶ້ນ​ທະບຽນ​ທາດ​ເຄ​ມີ ຈຳນວນ 7 ໂຮງງານ ຈຳນວນ 163 ທາດ ຂໍ​ນຳ​ເຂົ້າ​ທາດ​ເຄ​ມີ ຈຳນວນ 15 ໂຮງງານ ມີ 121 ທາດ ມາ​ຮອດເດືອນ​ກັນຍາ 2016 ທົ່ວ​ນະຄອນຫຼວງ ມີ​ຕະຫຼາດ ແລະ ສູນ​ການຄ້າ​ທັງ​ໝົດ 98 ແຫ່ງ ໃນ​ນັ້ນ ມີຕະຫຼາດ​ປະສົມ​ທົ່ວ​ໄປ 87 ແຫ່ງ ໃນ​ນີ້ ຕະຫຼາດ​ໃຫຍ່ 9 ແຫ່ງ ກາງ 20 ແຫ່ງ ນ້ອຍ 57 ແຫ່ງ ແລະ ຕະຫຼາດນັດ 1 ແຫ່ງ ມີ​ສູນ​ການຄ້າ 26 ແຫ່ງ ເປີດ​ບໍລິການ​ແລ້ວ 11 ແຫ່ງ ກຳລັງ​ກໍ່ສ້າງ 6 ແຫ່ງ ຜ່ານ​ແບບແຜນ​ຜັງ 3 ແຫ່ງ ມີແຜນຜັງ​ແຕ່​ບໍ່​ທັນ​ກໍ່ສ້າງ 1 ແຫ່ງ ແລະ ຢຸດ​ເຊົາ​ກໍ່ສ້າງ 1 ແຫ່ງ ພ້ອມ​ນີ້ ຍັງ​ໄດ້​ເອົາໃຈໃສ່​ເຄື່ອນໄຫວ​ຕ້ານ ແລະ ສະກັດ​ກັ້ນ​ການຄ້າຂາຍ​ເຖື່ອນ​ທຸກ​ຮູບ​ແບບ ສາມາດ​ປະຕິບັດ​ມາດ​ຕະການ​ຕໍ່​ຜູ້​ລະເມີດ​ໄດ້ 61 ຫົວໜ່ວຍ ທຽບໃສ່​ປີຜ່ານ​ມາ ມີ 152 ຫົວໜ່ວຍ ເຫັນວ່າ​ຫຼຸດ​ລົງ 59,87% ໄດ້​ທຳລາຍສິນຄ້າ​ນຳ​ເຂົ້າ​ທີ່​ບໍ່​ຖືກຕ້ອງ​ຕາມລະບຽບ ສິນຄ້າ​ໝົດ​ກຳນົດ ແລະ ສິນຄ້າ​ເກືອດ​ຫ້າມ​ຢູ່​ສະໜາມ​ຂີ້ເຫຍື້ອ ຫຼັກ 32 ຈຳນວນ 3 ຄັ້ງ ມີ​ປະເພດ​ຢາສູບ ບັ້ງໄຟ​ພຸ ແລະ ວັດຖຸ​ທີ່​ພາໃຫ້​ເກີດ​ສຽງ​ດັງ ເຄື່ອງໃນ​ສັດ ສິນຄ້າ​ໝົດ​ອາຍຸ ລວມທັງ​ໝົດ 1.077 ກິ​ໂລ ແລະ 1.246 ກັບ ໄດ້​ຄວບ​ຄຸມ​ການເໜັງ​ຕີງ​ສິນຄ້າ ໂດຍ​ສະເພາະ​ປະເພດ​ຊີ້ນ ແລະ ອື່ນໆ.