ໂຄງການກໍ່ສ້າງເສັ້ນທາງລົດໄຟ ລາວ-ຈີນ ຕ້ອງປະຕິບັດຕາມລະບຽບ ແລະ ມາດຕະຖານທີ່ກຳນົດໄວ້

ເພື່ອ​ຮັບປະກັນ​ໃຫ້​ໂຄງການທາງ​ລົດໄຟ​ລາວ-ຈີນ ໄດ້​ສຳເລັດການ​ກໍ່ສ້າງ ແລະ ເປີດ​ໃຫ້​ບໍ​ລິການ​ທັນ​ກຳນົດ​ເວລາ ໃຫ້​ເປັນໂຄງການ​ຕົ້ນ​ແບບ​ທີ່​ພົ້ນ​ເດັ່ນ ໃນບັນດາ​ໂຄງການ​ຍຸດ​ທະ​ສາດ “ໜຶ່ງ​ແລວ​ທາງ ໜຶ່ງ​ເສັ້ນທາງ”.
ວັນ​ທີ 11 ມັງກອນ 2017 ຢູ່ທີ່​ກະຊວງ​ໂຍທາ​ທິ​ການ ແລະ ຂົນສົ່ງ (​ຍທຂ) ໄດ້​ຈັດ​ໃຫ້​ມີ​ກອງປະຊຸມ​ກ່ອນ​ການ​ກໍ່ສ້າງ ຊີ້​ແຈງລະບຽບ​ຕ່າງໆ ແລະ ມາດ​ຕະຖານ​ເຕັກນິກ​ພາກ​ສະໜາມ​ໂຄງການ​ກໍ່ສ້າງ​ເສັ້ນທາງ​ລົດໄຟ ລາວ-ຈີນ ພາຍ​ໃຕ້​ການ​ເປັນ​ປະທານຂອງ​ທ່ານ ລັດຕະນະມະນີ ຄູນນິ​ວົງ ຮອງ​ລັດຖະມົນຕີ​ກະຊວງ ​ຍທຂ ຫົວໜ້າ​ຄະນະ​ຄຸ້ມ​ຄອງ​ໂຄງການ​ກໍ່ສ້າງ​ເສັ້ນທາງ​ລົດໄຟ​ລາວ-ຈີນ ເຊິ່ງ​ມີ​ທ່ານ ຈ່າວ​ສຽງ ຜູ້​ອຳນວຍ​ການ​ໃຫຍ່​ບໍລິສັດ ທາງ​ລົດໄຟ ລາວ-ຈີນ ຈຳກັດ ພ້ອມ​ຕົວແທນ​ຈາກ​ກຸ່ມ​ບໍລິສັດ​ຮັບ​ເໝົາ​ກໍ່ສ້າງ ບໍລິສັດ​ທີ່​ປຶກສາ ສະ​ຖາ​ບັນ ສຳ​ຫຼວດ​ອອກ​ແບບ​ການ​ກໍ່ສ້າງ ແລະ ພະນັກງານ​ວິຊາ​ການ​ທັງສອງ​ຝ່າຍ​ເຂົ້າ​ຮ່ວມ.
ທ່ານ ຈ່າວ​ສຽງ ກ່າວ​ວ່າ: ໂຄງການ​ລົດໄຟ​ລາວ-ຈີນ ເປັນໂຄງການ​ທີ່​ການ​ນຳ​ສູງ​ສຸດ​ຂອງພັກ-ລັດຖະບານ​ສອງ​ປະເທດ ໄດ້ໃຫ້​ຄວາມ​ເອົາໃຈໃສ່ ແລະ ເປັນຜູ້​ຊຸກຍູ້​ໂຄງການ​ດັ່ງກ່າວ ເປັນໂຄງການ​ຮ່ວມ​ມື​ລະຫວ່າງ​ສອງລັດຖະບານ​ ທີ່​ເຊື່ອມ​ໂຍງ​ທາງດ້ານ​ພື້ນຖານ​ໂຄງ​ລ່າງ​ຄົມ​ມະ​ນາຄົມ ເຊື່ອມ​ຈອດ​ກັບ​ເສັ້ນທາງ​ລົດໄຟ ຢູ້​ຊີຫາ​ບໍ່​ຫ່ານ​ຂອງ ​ສປ ຈີນ ຢູ່​ຈຸດ​ເໜືອ​ສຸດ ແລະ ໄດ້​ເຊື່ອມ​ຕໍ່ກັບ​ເສັ້ນທາງ​ລົດໄຟ​ຂອງ​ປະເທດໄທຢູ່​ຈຸດ​ໃຕ້​ສຸດ ໃນ​ອະນາຄົດ​ຈະເປັນ​ສ່ວນ​ໜຶ່ງທີ່​ສຳຄັນ​ຂອງ​ເສັ້ນທາງ​ລົດໄຟ​ຜ່ານ​ອາຊີ​ສາຍ​ກາງ.
ໃນ​ໂອກາດ​ດຽວ​ກັນ​ນີ້ ທ່ານ ລັດຕະນະມະນີ ຄູນ​ນິ​ວົງ ກໍ່​ໄດ້ເນັ້ນ​ໜັກ​ໃຫ້​ບໍລິສັດ ທາງ​ລົດໄຟ ລາວ-ຈີນ ຈຳກັດ ແລະ ກຸ່ມ​ບໍ​ລິສັດ​ທີ່​ຮັບ​ເໝົາ​ການ​ກໍ່ສ້າງຈົ່ງ​ຄຳ ນຶງ​ເຖິງ​ຈັນ​ຍາ​ບັນ​ດ້ານ​ວິຊາ​ການໃຫ້​ສູງ ບໍລິສັດ​ຕ້ອງ​ປະຕິບັດ​ຕາມຄຳ​ສັ່ງ ຄຳ​ແນະນຳ ລະບຽບ​ວິໄນຕ່າງໆ​ຂອງ​ລັດຖະບານຂອງ ​ສປປ ລາວ ຕ້ອງ​ສົມທົບ​ກັບ​ອຳນາດ​ການ​ປົກຄອງ​ທ້ອງຖິ່ນ ແລະ ປະຊາຊົນ ຮັກສາ​ສະພາບ​ແວດລ້ອມ​ທຳ​ມະ​ຊາດ​ເປັນ​ພິເສດ.
ໂຄງການ​ກໍ່ສ້າງ​ທາງ​ລົດໄຟ ລາວ-ຈີນ ແຕ່​ບໍ່​ເຕັນ (ຊາຍ​ແດນ ລາວ-ຈີນ) ຫາ​ສະຖານີ​ນະຄອນຫຼວງ​ວຽງ​ຈັນ ຄວາມ​ຍາວ​ກວ່າ 417 ກິໂລແມັດ ເຊິ່ງ​ໄດ້​ອອກແບບ​ເປັນ​ທາງ​ລົດໄຟ​ມາດ​ຕະຖານ​ຊັ້ນ I ປະເພດ​ລາງ​ດ່ຽວ ການ​ກຳນົດ​ຄວາມ​ໄວ​ອອກ​ແບບສຳລັບ​ຂົນສົ່ງ​ໂດຍສານ​ເຂດ​ພູດອຍ​ແມ່ນ 160 ກິໂລແມັດ​ຕໍ່​ຊົ່ວໂມງ ຢູ່​ເຂດ​ທົ່ງພຽງ​ແມ່ນ 200 ກິໂລແມັດ​ຕໍ່​ຊົ່ວໂມງ ແລະ ຄວາມ​ໄວ​ອອກ​ແບບ​ສຳລັບ​ການຂົນສົ່ງ​ສິນຄ້າ 120 ກິໂລແມັດຕໍ່​ຊົ່ວໂມງ ການ​ກໍ່ສ້າງ​ປະກອບ​ມີກໍ່ສ້າງ​ຂົວ 167 ແຫ່ງ ຍາວ 61 ກວ່າ​ກິໂລແມັດ ກວມ 14,9% ກໍ່ສ້າງ​ທໍ່ 649 ແຫ່ງ ຍາວ 20 ກິໂລ​ແມັດ ກໍ່ສ້າງ​ອຸມົງ 75 ແຫ່ງ ຍາວ 197 ກິໂລແມັດ ກວມ 47,7% ໃນ​ນີ້ ອຸມົງ​ທີ່​ມີ​ຄວາມຍາວ​ກວ່າ​ໝູ່​ແມ່ນ​ປະມານ 12 ກິໂລ​ແມັດ ຢູ່​ເມືອງ​ກາສີ ແຂວງວຽງ​ຈັນ ມີ​ສະຖານີ​ທັງ​ໝົດ 32 ແຫ່ງ ໃນ​ນີ້ມີ 21 ສະຖານີ​ສຳລັບລົດໄຟ​ຫຼີກ​ກັນມີ 11 ສະຖານີ​ໂດຍສານ ແລະ ລວມ​ສະຖານີ​ສິນຄ້າອີກ 1 ແຫ່ງ ລວມ​ມູນ​ຄ່າ​ກໍ່ສ້າງຂອງ​ໂຄງການ 5,8 ຕື້​ໂດ​ລາ​ສະຫະ​ລັດ.