ການຂາຍສິ້ນໄໝລາວ ໄດ້ຮັບຜົນກະທົບຍ້ອນມີການລອກຮຽນແບບ
ການຄ້າ-ການຂາຍທີ່ຖືກຕ້ອງຕາມກົດໝາຍ
ເປັນອາຊີບໜຶ່ງທີ່ສາມາດສ້າງລາຍຮັບໄດ້ດີເທົ່າທີ່ຄວນ
ໂດຍສະເພາະແມ່ນ ການຂາຍສິ້ນທີ່ເປັນສີໄມ້ລາຍມືຂອງຄົນລາວ ປັດຈຸບັນ
ການຂາຍສິ້ນໄດ້ມີຄວາມຫຍຸ້ງຍາກ
ເນື່ອງຈາກວ່າຕະຫຼາດສິ້ນຮຽນແບບເຂົ້າມາລາວຫຼາຍ
ເຮັດໃຫ້ຜົນການຕອບຮັບແມ່ຄ້າຂາຍສິ້ນບໍ່ໄດ້ຮັບຜົນດີ.ແມ່ອໍລະພິນ ໄຊຍະສອນ ໃຫ້ຮູ້ເມື່ອບໍ່ດົນນີ້ວ່າ: ດ້ວຍຄວາມຮັກມັກໃນການຄ້າ-ຂາຍ ທັງເປັນການປົກປັກຮັກສາລວດລາຍຂອງສິ້ນໝີ່ທີ່ມີມາແຕ່ພໍ່ແມ່ ປູ່ຍ່າ ຕານາຍ ໃຫ້ມີຄວາມຍືນຍົງ ປີ 2009 ຕົນຈຶ່ງຕັດສິນໃຈປະກອບອາຊີບຂາຍສິ້ນ ລົງທຶນເບື້ອງຕົ້ນຈຳນວນ 40 ລ້ານກີບ ໃນການອອກເຄືອຫູກ ພ້ອມທັງລາຍໃຫ້ເອື້ອຍນ້ອງແມ່ຍິງພາຍໃນບ້ານສະພາຍ ແລະ ບ້ານດອນໂຂງ ແຂວງຈຳປາສັກ ຕ່ຳໃຫ້ ຫຼັງຈາກນັ້ນ ຕົນກໍ່ເກັບຊື້ໃນລາຄາທີ່ເໝາະສົມ ແລ້ວສົ່ງໃຫ້ຮ້ານຂາຍສິ້ນໃນນະຄອນຫຼວງວຽງຈັນ ເຫັນວ່າໄດ້ຮັບຜົນດີ ແຕ່ປັດຈຸບັນ ຕະຫຼາດຕ່າງປະເທດເຂົ້າມາຫຼາຍ ເປັນຕົ້ນແມ່ນ ສິ້ນທີ່ຮຽນແບບລວດລາຍຂອງລາວ ເຮັດໃຫ້ການຄ້າຂາຍພົບຄວາມຫຍຸ້ງຍາກ ຕົນຈຶ່ງໄດ້ຢຸດຕິການສົ່ງສິ້ນຕາມຮ້ານ ແລະ ອີງຕາມຕົ້ນທຶນ ຈຶ່ງໄດ້ຫຼຸດຜ່ອນເຄືອຕ່ຳຫູກລົງ ເຊິ່ງຍັງເຫຼືອພຽງແຕ່ 5-10 ກີ່ເທົ່ານັ້ນ ໃນນີ້ ມີທັງເຄືອຫູກສິ້ນໝີ່ ແລະ ເຄືອຫູກສິ້ນໄໝມະນີກັດ ເພື່ອຂາຍໃຫ້ລູກຄ້າພາຍໃນບ້ານໄດ້ຊົມໃຊ້ ແລະ ທັງເປັນການຕອບສະໜອງຕາມຄວາມນິຍົມໃຫ້ລູກຄ້າທີ່ມີລາຍໄດ້ໜ້ອຍໄດ້ນຸ່ງສິ້ນງາມ ເຊິ່ງມີລາຄາຂາຍແຕ່ 2 ແສນຫາ 3 ແສນກີບ ເດືອນໜຶ່ງສາມາດສ້າງລາຍຮັບທັງຕົ້ນທຶນ ແລະ ກຳໄລປະມານ 5 ລ້ານຫາ 6 ລ້ານກີບ.
ແມ່ອໍລະພິນ ກ່າວຕື່ມອີກວ່າ: ເຖິງຢ່າງໃດກໍ່ຕາມ ໃນນາມສ່ວນຕົວ ຂໍຂອບໃຈມາຍັງການນຳ-ພັກ ລັດ ກໍ່ຄືສະພາການຄ້າ ແລະ ອຸດສາຫະກຳແຫ່ງຊາດລາວ ທີ່ໄດ້ໃຫ້ການສະໜັບສະໜູນຊີ້ທິດເຍືອງທາງ ເພື່ອຂະຫຍາຍຜະລິດຕະພັນຂອງຄົນລາວໃຫ້ເປັນທີ່ຮູ້ຈັກຢ່າງກວ້າງຂວາງ ໂດຍການຈັດງານວາງສະແດງຜະລິດຕະພັນສີໄມ້ລາຍມືຂອງຄົນລາວ ເຊິ່ງໃນແຕ່ລະປີຕົນໄດ້ເປັນຕົວແທນຂອງແຂວງຈຳປາສັກ ທີ່ໄດ້ນຳເອົາຜະລິດຕະພັນຂອງຕົນ ແລະ ແຂວງຈຳປາສັກເຂົ້າມາວາງສະແດງ ເປັນຕົ້ນແມ່ນສິ້ນ ໝີ່ສະພາຍ ແພຕັດເສື້ອສີທຳມະຊາດຈາກກຸ່ມຜ້າຝ້າຍ ພ້ອມນັ້ນ ຂໍເຊີນຊວນລູກຄ້າຜູ້ທີ່ມີຄວາມສົນໃຈກ່ຽວກັບຜະລິດຕະພັນຂອງແຂວງຈຳປາສັກ ສາມາດເບິ່ງໄດ້ທີ່ຮ້ານຂອງຂ້າພະເຈົ້າ ເຊິ່ງຕັ້ງຢູ່ສູນຫັດຖະກຳແຂວງຈຳປາສັກ (ຫຼັກ 7). (ຫນັງສືພິມວຽງຈັນໃຫ່ມ)
ການຂາຍສິ້ນໄໝລາວ ໄດ້ຮັບຜົນກະທົບຍ້ອນມີການລອກຮຽນແບບ
![]()
Reviewed by makarow
on
7:16:00 PM
Rating:
